ქარტიის საბჭოს განცხადება გურიაში, პრემიერის ვიზიტისას, მომხდარ ინციდენტზე
15.09.2015

კატეგორია : განცხადებები;
ჟურნალისტური ეთიკის ქარტიის საბჭო შეშფოთებულია, დღეს, 15 სექტემბერს, პრემიერის გურიაში ვიზიტისას მომხდარი ინციდენტით. ტელეკომპანია "მაესტროს" რეპორტიორის, ირაკლი ვაჩიბერიძის ინფორმაციით, ირაკლი ღარიბაშვილისთვის მის მიერ დასმული შეკითხვის გამო შსს-ს გურიის სამხარეო მთავარი სამმართველოს უფროსმა კობა ცერცვაძემ "გვერდზე გაიყვანა" და ახსნა-განმარტებები მოსთხოვა. როგორც ვაჩიბერიძე "ნეტგაზეთთან" საუბარში ამბობს, ინციდენტი მოჰყვა მის მიერ პრემიერ-მინისტრისთვის ნაციონალური მოძრაობის წევრების დაკავების შესახებ დასმულ შეკითხვას. მისივე ინფორმაციით, ფიზიკურ ძალადობას ადგილი არ ჰქონია, თუმცა ახსნა განმარტების მოთხოვნას თან მუქარაც ახლდა. საბჭო კიდევ ერთხელ შეახსენებს სახელმწიფო მოხელეებს, რომ ჟურნალისტისთვის პროფესიულ საქმიანობაში ხელის შეშლა სისხლის სამართლის კოდექსით დასჯადი ქმედებაა და მოუწოდებს სამართალდამცველ ორგანოებს, დროული და ადეკვატური რეაგირებისკენ ეს, ამ თვეში, სახელმწიფო მოხელეების მხრიდან ჟურნალიტებისთვის პროფესიულ საქმიანობაში ხელის შეშლის უკვე მეორე შემთხვევაა. 2 სექტემბერს ქარტიის საბჭომ გაავრცელა განცხადება, რომელიც ქედაში მომხდარ ინციდენტს შეეხებოდა. საჭიროდ მიგვაჩნია, კიდევ ერთხელ გავიმეორეთ ის, რაც 2 სექტემბრის განცხადებაში იყო აღნიშნული: სამწუხაროდ, ამგვარ ფაქტებს, თითქმის არასოდეს მოჰყვება სახელისუფლო ორგანოებისა და ხელისუფლების უმაღლესი პირების სათანადო რეაქცია. რეაგირების გარეშე დატოვებული შემთხვევები, უფრო მეტიც, მედიის მიმართ, უმაღლესი თანამდებობის პირების მხრიდან გამოთქმული ხშირი კრიტიკაც, შეიძლება ითქვას, რომ ახალისებს შედარებით დაბალ იერარქიულ კიბეზე მდგარ ჩინოვნიკებს. ჟურნალისტური ეთიკის ქარტიის საბჭო მიმართავს საქართველოს ხელისუფლებას, იზრუნოს იმაზე, რომ თითოეულ სახელმწიფო მოხელეს გააზრებული ჰქონდეს სიტყვისა და გამოხატვის თავისუფლების მნიშვნელობა და ისეთი დემოკრატიული ინსტიტუტის აუცილებლობა, როგორიც არის მედია.
ჩამოტვირთეთ PDF ვერსია

ჟურნალისტურ საქმიანობას თან სდევს შეცდომები, არაზუსტი დეტალების გავრცელება, რაც ზოგ შემთხვევაში სისწრაფის, უყურადღებობის, პროფესიონალიზმის ნაკლებობის, მწირი გამოცდილების ანდა სხვა მიზეზით არის გამოწვეული. პასუხისმგებლიანი მედია, რომლისთვისაც აუდიტორიის სანდოობა და რეპუტაცია მნიშვნელოვანია, ცდილობს მყისიერად შეასწოროს დაშვებული შეცდომა, ამცნოს აუდიტორიას და იზრუნოს ზუსტი ინფორმაციის გავრცელებაზე.

ქარტიაში განცხადების შემოტანა შეუძლია ნებისმიერ მოქალაქეს, რომელიც მიიჩნევს, რომ ჟურნალისტმა დაარღვია ეთიკური და პროფესიული სტანდარტები. ქარტიის საბჭო იხილავს განცხადებებს როგორც ქარტიის წევრი, ისე არაწევრი ჟურნალისტების მიმართ.