სიახლეები
საქართველოს ჟურნალისტური ეთიკის ქარტიის საბჭოს სამდივნომ დასაშვებად სცნო ოზურგეთის მუნიციპალიტეტის მერიის განცხადება ტელეკომპანია "იმედის" ჟურნალისტების ირაკლი ჩიხლაძისა და ვარლამ წიკალურის წინააღმდეგ. სადავო გახდა სიუჟეტი, რომელიც 21 ოქტომბერს გადაცემაში "იმედის კვირა" გავიდა სახელწოდებით - "კაბინეტიდან გაქცეული ოზურგეთის არჩეული მერი - კონსტანტინე შარაშენიძე თანამშრომლებს "იმედის კვირისთვის" მიცემული ინტერვიუს გამო დევნის".

სადავო სიუჟეტი ოზურგეთის მერიაში არსებულ სავარაუდო კანონდარღვევაზე "იმედის" მიერ რამდენიმე ხნით ადრე მომზადებული მასალის გაგრძელება იყო. სიუჟეტში ჟურნალისტი ცდილობდა გაერკვია მართლაც დაისაჯა თუ არა აუდიტის სამსახურის უფროსი "იმედისთვის" მიცემული სიუჟეტის გამო.

განმცხადებელი მიიჩნევს, რომ ჟურნალისტებმა ქარტიის რამდენიმე პრინციპი დაარღვიეს: პირველი (სიზუსტე), მესამე (მიჩქმალვა), მეხუთე (შესწორება), მეშვიდე (დისკრიმინაცია), მეათე (პირადი ცხოვრების ხელშეუხებლობა), მეთერთმეტე (ფაქტის განზრახ დამახინჯება).

ქარტიის საბჭო განცხადებას ღია სხდომაზე განიხილავს

06.12.2018
საქართველოს ჟურნალისტური ეთიკის ქარტიის საბჭოს სამდივნომ დასაშვებად სცნო "საერთაშორისო გამჭვირვალობა - საქართველოს" თანამშრომლის, ლევან ნატროშვილის განცხადება ტელეკომპანია "იმედის" ჟურნალისტების წინააღმდეგ. სადავო გახდა  29 ნოემბერს საინფორმაციო გადაცემა „ქრონიკაში" გასული სიუჟეტი სათაურით „მესამე სექტორმა ყალბ მოწმობებთან დაკავშირებით გავრცელებული ცნობის არასანდოობა აღიარა". 

სიუჟეტი ეხება არასამთავრობო ორგანიზაციების მიერ წინაარჩევნო პერიოდში გამოვლენილ სავარაუდო დარღვევებს, მათ შორის ყალბი პირადობის მოწმობების დამზადების ფაქტს. "იმედის" მიერ მომზადებული მასალის მიხედვით, არასამთავრობო ორგანიზაციებმა აღიარეს, რომ ამ თემაზე მათ მიერ გავრცელებული ინფორმაცია არასანდო იყო.

ლევან ნატროშვილი მიიჩნევს, რომ "იმედმა" ქარტიის პირველი (სიზუსტე) დაარღვია და არასწორი ინფორმაცია გაავრცელა, მასალა იყო მანიპულაციური და შეცდომაში შეჰყავს აუდიტორია.

ქარტიის საბჭო განცხადებას ღია სხდომაზე განიხილავს.

03.12.2018
საქართველოს ჟურნალისტური ეთიკის ქარტია ეხმაურება არასამთავრობო ორგანიზაცია “ყოფილი პოლიტპატიმრები ადამიანის უფლებებისთვის” ოფისში ტელეკომპანია “რუსთავი 2-ის” ჟურნალისტებზე თავდასხმისა და პროფესიულ საქმიანობაში უკანონოდ ხელშეშლის ფაქტს.

“რუსთავი 2-ის” მიერ გავრცელებული ვიდეომასალიდან ჩანს, რომ ორგანიზაციის თავმჯდომარე ნანა კაკაბაძე ჟურნალისტებისგან მისი ოფისის დატოვებას ითხოვს მას შემდეგ, რაც მას დაუსვეს კითხვა, საიდან ფინანსდება მისი ორგანიზაცია, რომელმაც საპრეზიდენტო არჩევნებისთვის საარჩევნო უბნებზე ასობით დამკვირვებელი მიავლინა.

არასამთავრობო ორგანიზაციის თავმჯდომარის მხრიდან სიტყვიერი შეურაცხყოფის შემდეგ ორგანიზაციის წარმომადგენლებმა “რუსთავი 2-ის” გადამღებ ჯგუფს მუშაობის საშუალება აღარ მისცეს და ჟურნალისტი და ოპერატორი ოფისიდან ფიზიკური ძალის გამოყენებით გაიყვანეს. ტელეკომპანიის ცნობით, დაზიანებულია აპარატურა.

საქართველოს ჟურნალისტური ეთიკის ქარტია მიმართავს სამართალდამცავ ორგანოებს დროულად გამოიძიონ ეს საქმე და საზოგადოებას მიაწოდონ ინფორმაცია გამოძიების შედეგების შესახებ. ყოველი ასეთი შემთხვევის უყურადღებოდ დატოვება და დამნაშავე პირების დაუსჯელობა ახალისებს ძალადობას ჟურნალისტების წინააღმდეგ და აუარესებს სამუშაო გარემოს.

არასამთავრობო ორგანიზაციები, ისევე როგორც საჯარო უწყებები, დაინტერესებულნი უნდა იყვნენ უზრუნველყონ გამჭირვალობა და ითანამშრომლონ მედიასთან. ამასთან, მათ ხელი უნდა შეუწყონ მედიის წარმომადგენელთა პროფესიული საქმიანობის თავისუფლად განხორციელებას.

იმ შემთხვევაში, თუ ჟურნალისტი პროფესიული ეთიკის წესებს ან/და კანონით დადგენილ მოთხოვნებს დაარღვევს, ამისთვის არსებობს ცივილური ფორმები. დაუშვებელია ძალადობა და თავდასხმა.
30.11.2018
საქართველოს ჟურნალისტური ეთიკის ქარტია ყურადღებით აკვირდება 28 ნოემბრის საპრეზიდენტო არჩევნებს და მოუწოდებს სამართალდამცავ ორგანოებს, უზრუნველყონ ჟურნალისტთა უფლებების დაცვა. როგორც ცნობილი გახდა, ტვ პირველის ჟურნალისტს, თათია ჩაფიჩაძეს პროფესიული მოვალეობის შესრულებისას უცნობმა პირებმა მიაყენეს ფიზიკური შეურაცხყოფა. გამოძიება დაწყებულია სისხლის სამართლის კოდექსის 126-ე მუხლით, რაც მოიცავს ცემას ან სხვაგვარ ძალადობას.

ქარტია მიმართავს პოლიტიკურ ძალებს და მათ აქტივისტებს, მისცენ მედიას მუშაობის საშუალება, ასევე, შეახსენებს ყველა პირს, რომ სისხლის სამართლის კოდექსის 154-ე მუხლით აკრძალულია ჟურნალისტისთვის პროფესიულ საქმიანობაში ხელის შეშლა.

არჩევნების დღეს მედია მნიშვნელოვან როლს ასრულებს. სწორედ ის უზრუნველყოფს აუდიტორიის ინფორმირებას ამ დემოკრატიული პროცესის შესახებ. მისი მოვალეობაა, აჩვენოს ყველა ხარვეზი და კანონდარღვევა, ამიტომაც აუცილებელია, ჟურნალისტებმა შეძლონ მშვიდ ვითარებაში მუშაობა და პროფესიული საქმიანობის შეუფერხებლად განხორციელება.

იმედი გვაქვს, თათია ჩაფიჩაძის შემთხვევა გამონაკლისი იქნება და მსგავსი ინცინდენტები აღარ დაფიქსირდება.
28.11.2018
საქართველოს ჟურნალისტური ეთიკის ქარტიის საბჭოს სამდივნომ დასაშვებად სცნო სოფიკო ყანჩაველის განცხადება ტელეკომპანია "ობიექტივის" ჟურნალისტის ქრისტი ქარჩხაძის წინააღმდეგ. სადავო სიუჟეტი ეხება წყალტუბოში კანალიზაციის სისტემის შესახებ. განმცხადებელი მიიჩნევს, რომ "ობიექტივმა" გადაუმოწმებელი ინფორმაცია გაავრცელა, რადგან არ დასტურდება რომ წყალტუბოში წყალი დაბუნძურებულია და კანალიზაციის სისტემა არ არსებობს.

შესაბამისად, განმცხადებლის აზრით, დარღვეულია ქარტიის შემდეგი პრინციპები: პირველი (სიზუსტე), მესამე (მიჩქმალვა), მეოთხე (ინფორმაციის მოპოვების კეთილსინდისიერება) და მეთერთმეტე (ფაქტის განზრახ დამახინჯება)

ქარტიის საბჭო საქმეს ღია სხდომაზე განიხილავს.


22.11.2018
საქართველოს ჟურნალისტური ეთიკის საბჭოს გადაწყვეტილებით, საზოგადოებრივი მაუწყებლის ვებსაიტის რედაქტორმა ირინა დეკანოიძემ ქარტიის პირველი (სიზუსტე) და მეხუთე (შესწორება) პრინციპი დაარღვია. 

მის წინააღმდეგ ქარტიას საპრეზიდენტო კანდიდატის, გრიგოლ ვაშაძის საარჩევნო შტაბის ხელმძღვანელმა გიორგი ვაშაძემ მომართა. ის სადავოდ ხდიდა მასალას, რომელიც საზოგადოებრივი მაუწყებლის ვებსაიტზე (1tv.ge) გამოქვეყნდა სათაურით "გიორგი ვაშაძე საყოველთაო ჯანდაცვაზე - ფულს ვასხამთ შავ ხვრელში, რადგან ვმკურნალობთ მომაკვდავ ადამიანს [ვიდეო]". ტექსტი ეხება გიორგი ვაშაძის მიერ პირველი არხის გადაცემა "პრეზიდენტის არჩევნები 2018-ში" გასულ კომენტარს, სადაც ის საყოველთაო ჯანდაცვაზე საუბრობს. გიორგი ვაშაძე მიიჩნევდა, რომ ვებგვერდზე გამოქვეყნებული ტექსტი არ შეესაბამებოდა მის კომენტარს.

ქარტიის საბჭოს მიიჩნია, რომ სათაური მანიპულაციური იყო, ვინაიდან შთაბეჭდილებას ქმნიდა, თითქოს გიორგი ვაშაძე აკრიტიკებს სახელმწიფოს მიერ „მომაკვდავი ადამიანის“ მკურნალობის იდეას. გადაცემაში კი  გიორგი ვაშაძე ნეგატიურად აფასებდა სახელმწიფოს იმ მიდგომას, რომლის თანახმადაც მნიშვნელოვანი სახსრები არ ხმარდება დაავადების პრევენციას, რათა თავიდან იქნას აცილებული ან/და შემცირებული ფატალური შედეგი. გიორგი ვაშაძე საზოგადოებას სთავაზობდა თავის ხედვას თუ როგორ შეიძლება მძიმე შედეგების შემცირება ხარჯების ეფექტურად გამოყენების გზით. საბჭოს აზრით, იმის გამო, რომ ჟურნალისტი სათაურში კონტექსტიდან ამოგლეჯილ ფრაზას იყენებს, ვაშაძის გამონათქვამი იცვლის აზრს და აუდიტორიას განსხვავებულ შთაბეჭდილებას უქმნის. ამასთან, საბჭომ ხაზი გაუსვა სათაურის მნიშვნელობას და თქვა, რომ "ძირითად შემთხვევებში სტატიის სათაური ცალკე ჟურნალისტური პროდუქტად უნდა განიხილებოდეს. მკითხველს აქვს მოლოდინი და ნდობა, რომ სათაური ზუსტად გადმოსცემს სტატიაში მოყვანილ ფაქტებსა და მოსაზრებებს. ზოგ შემთხვევაში შეიძლება არც ჩათვალოს საჭიროდ ტექსტის სრულად გაცნობა იმ დაშვებით, რომ სტატიის ძირითადი მიგნება მან უკვე წაიკითხა სათაურში"

გადაწყვეტილებაში ყურადღება გამახვილდა იმაზეც, რომ სტატიის გამოქვეყნების დროს საქართველოში იყო წინასაარჩევნო პერიოდი და გიორგი ვაშაძე არჩევნების პროცესში ჩართული პოლიტიკური ძალის ლიდერი იყო, შესაბამისად, მისი პოზიციების მიმართ არსებობდა განსაკუთრებული საზოგადოებრივი ყურადღება. მის ნებისმიერ მოსაზრებას შესაძლოა გავლენა მოეხდინა ამომრჩევლის არჩევანზე. ამასთან, სოციალურ ქსელში ამ ინფორმაციის გაზიარებისას აბსოლუტურ უმრავლესობაში დარჩა შთაბეჭდილება, რომ აუდიტორიის დიდ ნაწილს მხოლოდ სათაური ჰქონდა წაკითხული და ამ გზით მიღებული ცნობის საფუძველზე აკრიტიკებდნენ და ლანძღავდნენ განმცხადებელს.

გიორგი ვაშაძე დავობდა მეხუთე პრინციპზეც (შესწორება), ვინაიდან რედაქტორისთვის მიმართვის მიუხედავად ტექსტი არ გასწორდა. ეს ფაქტი ირინა დეკანოიძემაც დაადასტურა და თქვა, რომ გიორგი ვაშაზეს შესთავაზა გაეგზავნა საკუთარი პოზიცია, რომელსაც ის ასევე განათავსებდა ვებგვერდზე.

საბჭო მიიჩნევს, რომ ასეთი შეთავაზება არ შეესაბამება შესწორების სტანდარტს, რომლის თანახმად, პასუხისმგებლიანი მედია, რომლისთვისაც აუდიტორიის სანდოობა და რეპუტაცია მნიშვნელოვანია, ცდილობს მყისიერად შეასწოროს დაშვებული შეცდომა, ამცნოს აუდიტორიას და იზრუნოს ზუსტი ინფორმაციის გავრცელებაზე. "მედიამ ინფორმაცია უნდა შეასწოროს მაშინვე, როგორც კი ცნობილი გახდება მისთვის ამ შეცდომის შესახებ და საჭირო არ უნდა იყოს სპეციალურად მიმართვა. ამასთან, გამოქვეყნებული მასალა უნდა შესწორდეს ისე, რომ აუდიტორიისთვის ცნობილი გახდეს თუ რა გასწორდა და არასწორი ინფორმაციის შემცველი ჟურნალისტური პროდუქტი აღარ უნდა იძებნებოდეს", - აღნიშნავს საბჭო.

გარდა სიზუსტისა და შესწორების პრინციპისა, გიორგი ვაშაძე დავობდა ქარტიის მეშვიდე და მეთერთმეტე პრინციპის დარღვევაზეც, თუმცა, საბჭომ ამ ორი პრინციპის დარღვევა არ დაადგინა. 

იხილეთ გადაწყვეტილების სრული ვერსია
19.11.2018
საქართველოს ჟურნალისტური ეთიკის ქარტიის საბჭოს გადაწყვეტილებით რუსთავი 2-ის ჟურნალისტმა მარიამ გაფრინდაშვილმა ქარტიის მერვე (ბავშვის ინტერესი) და მეათე (პირადი ცხოვრების ხელშეუხებლობა) პრინციპები დაარღვია. 

სადავო გახდა 25 წლის გოგოს მკვლელობის საქმეზე მომზადებული სიუჟეტი, სადაც ნაჩვენებია 6 წლის ბავშვის მიერ სასამართლოსთვის მიცემული ჩვენება დედის მკვლელობის შესახებ. განმცხადებელი, პარტნიორობა ადამიანის უფლებებისთვის, მიიჩნევდა, რომ ბავშვის საუკეთესო ინტერესი დარღვეული იყო, ვინაიდან შეიცავდა პირადი ცხოვრების მძიმე დეტალებს. 

ქარტიის საბჭომ განმცხადებლის მოსაზრებები გაიზიარა და ორივე პრინციპის დარღვევა დაადგინა. გადაწყვეტილების სამოტივაციო ნაწილი მოგვიანებით გამოქვეყნდება.
18.11.2018
საქართველოს ჟურნალისტური ეთიკის ქარტიის საბჭოს სამდივნომ დასაშვებად სცნო დავით მახარაშვილის განცხადება "რუსთავი 2-ის" ჟურნალისტების, თამარ ბაღაშვილის და დიანა ჯოჯუას მიმართ. სადავო მასალა 2018 წლის 16 ნოემბერს გავიდა "კურიერის" ეთერში და ეხებოდა მმართველი პარტიის მიერ სამხედროების მისამართით გაკეთებულ განცხადებებს. დავით მახარაშვილს ამ სიუჟეტის იმ ნაწილთან აქვს პრეტენზია, რომელიც თბილისის მერის, კახა კალაძის ბრიფინგს ეხება. განმცხადებელი მიიჩნევს, რომ საინფორმაციო გამოშვებაში არასწორი ინფორმაცია გავრცელდა, როდესაც თქვეს, რომ კახა კალაძე ქართველ სამხედროებს 2008 წლის ომის დროს საკუთარი თანამებრძოლების მიტოვებაში ადანაშაულებს. 

განმცხადებელი მიიჩნევს, რომ ამ მასალაში დარღვეული ქარტიის პირველი (სიზუსტე), მესამე (მიჩქმალვა) და მეთერთმეტე (ფაქტის განზრახ დამახინჯება) პრინციპები.

ქარტიის საბჭო განცხადებას ღია სხდომაზე განიხილავს.

18.11.2018
საქართველოს ჟურნალისტური ეთიკის ქარტიის საბჭოს გადაწყვეტილებით, ტელეკომპანია "რუსთავი 2-ის" ჟურნალისტმა მარიკა გოცირიძემ ქარტიის მერვე პრინციპი დაარღვია. ამ პრინციპის თანახმად, ჟურნალისტი ვალდებულია, დაიცვას ბავშვის უფლებები; პროფესიული საქმიანობისას უპირატესი მნიშვნელობა მიანიჭოს ბავშვის ინტერესებს, არ მოამზადოს და არ გამოაქვეყნოს ბავშვების შესახებ ისეთი სტატიები ან რეპორტაჟები, რომლებიც საზიანო იქნება მათთვის.

მარიკა გოცირიძის წინააღმდეგ ქარტიას მიმართა "სუიციდის პრევენციის ასოციაციამ". ორგანიზაცია სადავოდ ხდიდა "კურიერის" ეთერში გასულ სიუჟეტს, რომელშიც ახალი ინტერნეტ თამაში არასრულწლოვნებისთვის სახიფათოდ და სუიციდის მაპროვოცირებლად არის წარმოჩენილი. 

საქმის განხილვისას საბჭომ დაადგინა მერვე პრინციპის დარღვევა. განმცხადებელი თავდაპირველად მიიჩნევდა, რომ პირველი პრინციპიც (სიზუსტე) დარღვეული იყო, თუმცა მოგვიანებით მოხსნა ეს პრინციპი.

გადაწყვეტილების სამოტივაციო ნაწილი მოგვიანებით გამოქვეყნდება.
17.11.2018
საქართველოს ჟურნალისტური ეთიკის ქარტიის საბჭოს გადაწყვეტილებით, "პრაიმ ტაიმის" ჟურნალისტმა თამთა ონოფრიშვილმა ქარტიის პირველი პრინციპი დაარღვია, რომლის თანახმადაც ჟურნალისტმა პატივი უნდა სცეს ადამიანის უფლებას, მიიღოს ზუსტი ინფორმაცია და ასევე მეცხრე პრინციპი, რომელიც სარეკლამო და სარედაქციო მასალების გამიჯვნას ავალდებულებს რედაქციას. 

თამთა ონოფრიშვილის წინააღმდეგ ქარტიას მიმართა ვასილ ცინაძემ. ის მიიჩნევდა, რომ არასწორი ინფორმაცია გაავრცელა სტატიით "QNET ლეგალური ბიზნესია და ფინანსურ პირამიდასთან მას არანაირი კავშირი არ აქვს". ვასილ ცინაძის აზრით, სტატია ეყრდნობა მხოლოდ "QNET-ის" წამომადგენლის მიერ მოწოდებულ ინფორმაციას და არა ფაქტებს. 

ქარტიის საბჭოს მიერ საქმის განხილვას ესწრებოდა მხოლოდ განმცხადებელი, მოპასუხე გამოცემის რედაქტორმა ქარტიის კითხვებს ტელეფონით უპასუხა.
17.11.2018
საქართველოს ჟურნალისტური ეთიკის ქარტიის საბჭოს გადაწყვეტილბით, ტელეკომპანია რუსთავი 2-ის ჟურნალისტმა დავით დვალიშვილმა ქარტიის მერვე (ბავშვის ინტერესი) და მეათე (პირადი ცხოვრების ხელშეუხებლობა) პრინციპები დაარღვია. 

სადავო გახდა გურიაში არასრულწლოვნის სუიციდის შესახებ 18 აგვისტოს მომზადებული სიუჟეტი. ამ მასალის გამო დავით დვალიშვილის წინააღმდეგ ქარტიამ ორი განცხადება მიიღო. ორგანიზაციები, სუიციდის პრევენციის ცენტრი და პარტნიორობა ადამიანის უფლებებისთვის (PHR) მიიჩნევდნენ, რომ სიუჟეტი არ შეესაბამებოდა მედიის ეთიკურ პრინციპებს, ვინაიდან გასაჯაროვდა პირადი ცხოვრების ისეთი დეტალები, რომლის გამოქვეყნებითაც დაცული არ იყო ბავშვის საუკეთესო ინტერესი. 

ქარტიის საბჭომ დაადგინა მერვე და მეათე პრინციპის დარღვევა, თუმცა არ გაიზიარა განმცხადებლების არგუმენტაცია მეშვიდე პრინციპის (დისკრიმინაცია) დარღვევასთან დაკავშირებით და გადაწყვიტა, რომ სადავო სიუჟეტში ეს პრინციპი დარღვეული არ ყოფილა.

საქმის განხილვას ესწრებოდა PHR-ის წარმომადგენელი, მოპასუხე ჟურნალისტმა საბჭოს კითხვებს ტელეფონის მეშვეობით უპასუხა. 

გადაწყვეტილების სამოტივაციო ნაწილი მოგვიანებით გამოქვეყნდება
17.11.2018
17-18 ნოემბერს ჟურნალისტური ეთიკის ქარტია და გაეროს ბავშვთა ფონდი (UNICEF) მართავენ სემინარს უფროსკლასელებისათვის - “მედიაწიგნიერება და კრიტიკული აზროვნება”

ორდღიანი სემინარი იმართება თბილისში, განათლების მულტიმედია ცენტრში. (მის.: ალ. ჭავჭავაძის 10). პრაქტიკულ ტრენინგებში მონაწილეობენ XI და XII კლასების მოსწავლეები თბილისისა და რეგიონების სკოლებიდან.

სემინარი იმართება პროექტის - “ბავშვთა საკითხების გაშუქება - კონტენტ ანალიზი და მედიაწიგნიერება” ფარგლებში. პროექტს ახორციელებს საქართველოს ჟურნალისტური ეთიკის ქარტია გაეროს ბავშვთა ფონდის ფინანსური მხარდაჭერით.

სემინარის მიზანია დაეხმაროს ახალგაზრდებს გახდნენ მედიაწიგნიერები, კრიტიკულად მოაზროვნენი, რათა შეძლონ იმის ინტერპრეტაცია და გააზრება, რასაც ხედავენ, კითხულობენ და ისმენენ. სწავლებისას გამოყენებული იქნება მედიაწიგნიერების სახელმძღვანელო, რომელიც შემუშავდა გაეროს ბავშვთა ფონდის კოსოვოს ოფისის მიერ შედგენილი პროგრამის PONDER-ის ადაპტირების შედეგად. სახელმძღვანელოს ქართული ვერსია მომზადდა საქართველოს ჟურნალისტური ეთიკის ქარტიის მიერ გაეროს ბავშვთა ფონდის საქართველოს ოფისის მხარდაჭერით და მედია ექსპერტთა ჯგუფის მონაწილეობით.

მედიაწიგნიერების შესახებ სემინარი დაეხმარება ახალგაზრდებს, აიმაღლონ ცოდნის დონე მასობრივი კომუნიკაციის და ახალი ტექნოლოგიების შესახებ, გააძლიერებს მათ უნარს კრიტიკულად გაანალიზონ რა კავშირი არსებობს მედიას, აუდიტორიასა და ინფორმაციას შორის.

პრაქტიკული სავარჯიშოების შესრულებით მონაწილეები შეძლებენ დაინახონ:

  • როგორ ანიჭებს ადამიანი სხვადასხვა მნიშვნელობას მოვლენას, საკითხს, მონაცემს თუ ინფორმაციას
  • როგორ იცვლება ტექნოლოგიების განვითარებასთან ერთად მედია და მისი ურთიერთკავშირი აუდიტორიასთან.
  • რა გავლენა აქვს სურათებს მოვლენათა აღქმისას, როგორ შეიძლება ფოტოები იქნას გამოყენებული მანიპულაციისთვის და როგორ ცვლის კონტექსტი, დრო, ადგილი, სოციალური გარემო ერთი და იმავე კადრის აღქმას.

სემინარს გაუძღვებიან:
  • ნათია კუპრაშვილი, ჟურნალისტიკის რესურს ცენტრის აღმასრულებელი დირექტორი;
  • ნინო დანელია, ილიას უნივერსიტეტის პროფესორი

***
საკონტაქტო ინფორმაცია
ნინო ნარიმანიშვილი, პროექტის კოორდინატორი
ტელ: 593926429
ელ.ფოსტა: narimanishvili.n@gmail.com
16.11.2018

შემოგვიერთდით Facebook-ზე

ჩამოტვირთეთ PDF ვერსია

ჟურნალისტურ საქმიანობას თან სდევს შეცდომები, არაზუსტი დეტალების გავრცელება, რაც ზოგ შემთხვევაში სისწრაფის, უყურადღებობის, პროფესიონალიზმის ნაკლებობის, მწირი გამოცდილების ანდა სხვა მიზეზით არის გამოწვეული. პასუხისმგებლიანი მედია, რომლისთვისაც აუდიტორიის სანდოობა და რეპუტაცია მნიშვნელოვანია, ცდილობს მყისიერად შეასწოროს დაშვებული შეცდომა, ამცნოს აუდიტორიას და იზრუნოს ზუსტი ინფორმაციის გავრცელებაზე.

ქარტიაში განცხადების შემოტანა შეუძლია ნებისმიერ მოქალაქეს, რომელიც მიიჩნევს, რომ ჟურნალისტმა დაარღვია ეთიკური და პროფესიული სტანდარტები. ქარტიის საბჭო იხილავს განცხადებებს როგორც ქარტიის წევრი, ისე არაწევრი ჟურნალისტების მიმართ.