სიახლეები
საქართველოს ჟურნალისტური ეთიკის ქარტია ქმნის მედიასკოლას და იწყებს სტუდენტთა მიღებას. სკოლა ორიენტირებული იქნება დამწყები ჟურნალისტებისთვის პრაქტიკული უნარ-ჩვევების განვითარებაზე.

მონაწილეებს შესაძლებლობა ექნებათ 5 თვის განმავლობაში იმუშაონ სხვადასხვა მიმართულებით და გააშუქონ მიმდინარე მოვლენები. კურსის ფარგლებში სტუდენტები გაივლიან შემდეგ 5 მოდულს:

ახალი ამბების გაშუქება
  • რა არის ახალი ამბავი?
  • ინფორმაციის მოპოვება და გავრცელება
  • ინფორმაციის წყაროები
ინფორმაციის გადამოწმება
  • ინფორმაციის გადამოწმების ხერხები
  • არსებული მონაცემთა ბაზების გამოყენება (სახელმწიფო ტენდერები, საჯარო რეესტრი, აუდიტის სამსახური)
  • დოკუმენტებთან მუშაობა
  • კავშირის დადგენა გადაწყვეტილების მიმღებ პირებსა და კერძო პირებს/კომპანიებს შორის
წერის ტექნიკა
  • პრაქტიკული მუშაობისას წერის სტილის, სტრუქტურის დახვეწა
  • ფორმების მრავალფეროვნება
ეთიკური დილემები
  • საჯარო ინტერესის ტესტი მედიისთვის
  • ეთიკური საკითხები, რომლის გადაწყვეტაც ჟურნალისტს უწევს მუშაობისას
ამბის მოყოლის ფორმები
  • ინფორმაციის გადაცემის მულტიმედია ხერხები
  • პლატფორმები, რომელიც ვიზუალური მრავალფეროვნებისთვის შეიძლება იყოს გამოყენებული
თითოეულ მოდულს გაუძღვებიან გამოცდილი ჟურნალისტები - მაია მეცხვარიშვილი, გიორგი მგელაძე, ნინო ჯაფიაშვილი, ზვიად ქორიძე, ნათია კუპრაშვილი. მათ გარდა მოისმენენ სხვა პრაქტიკოსი რეპორტიორების მასტერ კლასებს და პრაქტიკულად მოამზადებენ ჟურნალისტურ მასალებს.

პროექტში მონაწილეობა უფასოა. კანდიდატი უნდა იყოს ბაკალავრიატის დამამთავრებელი ან/და მაგისტრატურის სტუდენტი ვისაც სურს, რომ გახდეს ჟურნალისტი.

მედიასკოლაში სწავლის მსურველებმა შეავსეთ სააპლიკაციო ფორმა. განაცხადების მიღების ბოლო ვადაა 2018 წლის 25 თებერვალი

პირველ ეტაპზე შერჩეულ აპლიკანტებთან გაიმართება გასაუბრება, რის შემდეგაც 15 საუკეთესო მოხვდება ჯგუფში. სწავლა 1 მარტიდან დაიწყება.

საკონტაქტო ინფორმაცია:
მისამართი: თბილისი, შიო მღვიმელის ქუჩა 6ბა
ტელეფონი: 2912870
E-mail: ethicscharter@gmail.com
07.02.2018
კოალიცია „მედიის ადვოკატირებისთვის“ მიმართავს საქართველოს პარლამენტს და საზოგადოებრივი მაუწყებლის სამეურვეო საბჭოს, მოახდინონ რეაგირება და ღიად დააფიქსირონ პოზიცია საზოგადოებრივი მაუწყებლის სამეურვეო საბჭოს წევრის, გიორგი იაკობაშვილის საჯარო განცხადებაზე,

05.02.2018
საქართველოს ჟურნალისტური ეთიკის ქარტიის საბჭოს გადაწყვეტილებით ტელეკომპანია "რუსთავი 2-ის" ჟურნალისტმა თამთა დოლენჯაშვილმა ქარტიის პირველი პრინციპი დაარღვია, რომელიც ჟურნალისტს ზუსტი ინფორმაციის გადაცემას ავალდებულებს. 

თამთა დოლენჯაშვილის წინააღმდეგ ქარტიაში განცხადება შეიტანა "საქართველოს სოციალურ მუშაკთა ასოციაციამ". მათი უკმაყოფილება გამოიწვია 14 იანვარს, საინფორმაციო გამოშვება "კურიერში" გასულმა სიუჟეტმა. მასალა ეხებოდა სოციალურად დაუცველთა ბაზაში მოქალაქეთა რეგისტრაციას, რომელსაც სოციალური აგენტი ახორციელებს. ჟურნალისტმა კი პასუხისმგებელ პირად მოიხსენია სოციალური მუშაკი.

განმცხადებელი აღნიშნავს, რომ სოციალური მუშაკი არის პროფესიონალი, რომელიც ეუფლება სოციალური მუშაობის პროფესიას აკადემიურ დონეზე და მუშაობს სხვადასხვა სამიზნე ჯგუფთან, მათ გასაძლიერებლად და სოციალური კეთილდღეობის გასაუმჯობესებლად. სოციალური აგენტი კი არის პოზიცია, რომელზეც ნებისმიერი პროფესიის ადამიანს შეუძლია დასაქმდეს და მისი ფუნქცია მხოლოდ ოჯახების სოციალურ-ეკონომიკური მდგომარეობის აღრიცხვით შემოიფარგლება."ჟურნალისტისა და წამყვანის მიერ სოციალური მუშაკის არასწორ და ნეგატიურ კონტექსტში მოხსენიება საზოგადოებას არასწროს აზრს უქმნის პროფესიაზე და ახდენს სოციალური მუშაკების დისკრედიტირებას", - ნათქვამია განცხადებაში.

საბჭომ განხილვის შემდეგ პირველი პრინციპის დარღვევა დაადგინა. გადაწყვეტილების სამოტივაციო ნაწილი მოგვიანებით გამოქვეყნდება.
05.02.2018
საქართველოს ჟურნალისტური ეთიკის ქარტიის საბჭოს სამდივნომ დასაშვებად სცნო სოფიო ბაჩილავას განცხადება ტელეკომპანია "ობიექტივის" წინააღმდეგ.  სადავო მასალა 30 იანვარს გავიდა ეთერში, ტელეკომპანიის ფეისბუქ გვერდზე კი მეორე დღეს გამოქვეყნდა. სიუჟეტი ეხება მძიმე სოციალურ პირობებში მცხოვრებ მცირეწლოვან ბავშვებს. 

განმცხადებელი მიიჩნევს, რომ ბავშვების იდენტიფიცირება და ჟურნალისტის მიერ გამოთქმული შეფასებები შეიძლება გახდეს შემდგომში მათი დისკრიმინაციის და ბულინგის მაპროვოცირებელი. შესაბამისად, მისი აზრით, დარღვეულია ქარტიის მეშვიდე (დისკრიმინაცია) და მერვე (ბავშვის ინტერესი) პრინციპები.

ქარტიის საბჭო საქმეს ღია სხდომაზე განიხილავს.
05.02.2018
1 თებერვალი, 2018

თომას კენტს, რადიო თავისუფლების პრეზიდენტს
ნენად პეჯიკს, რადიო თავისუფლების ვიცე-პრეზიდენტს

ბატონო პრეზიდენტო,
ბატონო ვიცე-პრეზიდენტო,

02.02.2018
საქართველოს ჟურნალისტური ეთიკის ქარტიის საბჭოს სამდივნომ დასაშვებად სცნო მარგალიტა ბაშარულის განცხადება ჟურნალ "თბილისელებში" გამოქვეყნებული სტატიის ავტორის, ქეთი კაპანაძის წინააღმდეგ. სადავო სტატია გამოქვეყნდა 22 - 28 იანვრის ნომერში სათაურით "ვინ მოუკლა მამა და გაუუპატიურა და მარეკ დუდაევს და მოკლეს თუ არა ის შურისძიების მიზნით". მასალაში მარეკ დუდაევის მკვლელობის ერთ-ერთ ვერსიად დასახელებულია კონფლიქტი ტარიელ ბაშარულთან, რომელიც მასალის მიხედვით "მსხვილი კონტრაბანდისტია".

განმცხადებელი აღნიშნავს, რომ სტატიაში ნახსენები "ვერსიები ტარიელ ბაშარულზე არის არასწორი, სრულიად ცილისმწალებლური და გადაუმოწმებელი, ვინაიდან ტარიელ ბაშარულს ისევე როგორც უამრავ ადამიანს ახლგორში აქვს საკუთარი ბიზნესი, რომელიც შემოიფარგლება მაღაზიის მომარაგებით და ხილ-ბოსტნეულის გადაზიდვით და არანაირი კავიშირი არ აქვს არც კონტრაბანდასთან და არც მარეკ დუდაევთან". 

შესაბამისად, განმცხადებელი მიიჩნევს, რომ დარღვეულია ქარტიის პირველი პრინციპი (სიზუსტე).

ქარტიის საბჭო განცხადებას ღია სხდომაზე განიხილავს.
01.02.2018
საქართველოს ჟურნალისტური ეთიკის ქარტის საბჭოს სამდივნომ დასაშვებად სცნო ანა გაბელაიას განცხადება შემდეგი ვებსაიტების წინააღმდეგ - for.ge, reportiori.ge, digest.pia.ge, kvira.ge. სადავო გახდა მათ მიერ გიორგი გიორგანაშვილის ("ბახალა") საქმეზე მომზადებული მასალა, რომლის თანახმადაც მათ მოიპოვეს დოკუმენტი, სადაც "ბახალა" აღიარებს 45 აბი სუბოტექსის ქონას.

განმცხადებელი მიიჩნევს, რომ სტატიებით აუდიტორია გამიზნულად "მოატყუეს", მიაწოდეს ოქმი, რომელიც მხარეების დავის საგანია შესაბამისად, მისი აზრით, დარღვეულია ქარტიის რამდენიმე პრინციპი - პირველი (სიზუსტე), მესამე (მიჩქმალვა), მეხუთე (შესწორება) და მე-11 (ფაქტის განზრახ დამახინჯება).

30.01.2018
საქართველოს ჟურნალისტური ეთიკის ქარტიის საბჭოს გადაწყვეტილებით გამოცემა "რეიტინგის" ჟურნალისტმა თამარ ბოჭორიშვილმა ქარტიის პირველი (სიზუსტე) და მეხუთე (შესწორება) პრინციპები დაარღვია. 

მის წინააღმდეგ ქარტიას ნინო ვეზდენმა მიმართა. მისი განცხადების თანახმად, 12 დეკემბერს "რეიტინგმა" ფეისბუქ გვერდზე გამოაქვეყნა გამოკითხვა, სადაც რესპონდენტებს ეკითხებოდნენ თუ რამდენჯერ ჰქონიათ სექსი ერთ ღამეში. ვიდეოს სათაური იყო "ყველაზე მეტკერ 13-ჯერ მქონია ღამეში სექსი ... რეკორდი მოვხსენი" - ქართველი გოგონას "აღიარება", რომელიც სოციალურ ქსელში ძალიან პოპულარულია". ვიდეოს ფოტოდ ერთვოდა განმცხადებლის, ნინო ვეზდენის სურათი. ვეზდენიც მონაწილეობდა გამოკითხვაში, თუმცა მას არ ეკუთვნის სათაურად გატანილი ციტატა. განმცხადებლის თქმით, ფოტოსა და სათაურის კომბინაციით იქმნებოდა შთაბეჭდილება, რომ თითქოს მისი ციტატა იყო, რის გამოც მიიღო კრიტიკა და შეურაცხყოფა აუდიტორიისგან.

საქმის სამოტივაციო ნაწილი უახლოეს პერიოდში გამოქვეყნდება.
27.01.2018
ჟურნალისტური ეთიკის ქარტია იწვევს ჟურნალისტებს

ტრენინგში მონაწილეობის მისაღებად

კონფლიქტების გაშუქება

ორდღიანი ტრენინგი გაიმართება 24-25 თებერვალს თბილისში, ქარტიის ოფისში (შიო მღვიმელის 6ბ). ტრენინგში მონაწილეობის მიღება შეუძლიათ ჟურნალისტებს როგორც თბილისიდან, ასევე რეგიონებიდან.

25.01.2018
საქართველოს ჟურნალისტური ეთიკის ქარტიის საბჭოს გადაწყვეტილებით გიორგი გაბუნიას ქარტიის მეშვიდე პრინციპი არ დაურღვევია 2017 წლის 24 დეკემბერს, "რუსთავი 2-ის" გადაცემა "P.S.-ის" სიუჟეტის წარდგენისას, როდესაც დავით ნარმანიას შესახებ უარყოფითი შეფასებები გააკეთა.  გიორგი გაბუნიას წინააღმდეგ ქარტიას ბაჩო ნადირაძემ მიმართა.

ქარტიის მე-7 პრინციპის თანახმად, "ჟურნალისტს უნდა ესმოდეს მედიის მიერ დისკრიმინაციის წახალისების საფრთხე; ამიტომ ყველაფერი უნდა იღონოს ნებისმიერი პირის დისკრიმინაციის თავიდან ასაცილებლად რასის, სქესის, სექსუალური ორიენტაციის, ენის, რელიგიის, პოლიტიკური და სხვა შეხედულებების, ეროვნული ან სოციალური წარმოშობის საფუძველზე ან რაიმე სხვა ნიშნით". საბჭომ მსჯელობის შემდეგ მიიჩნია, რომ სადავო მასალაში რაიმე ნიშნით დისკრიმინაცია არ მომხდარა.

გადაწყვეტილების სამოტივაციო ნაწილი მოგვიანებით გამოქვეყნდება.
18.01.2018
ხელმომწერი ორგანიზაციები მივესალმებით საქართველოს პრეზიდენტის გადაწყვეტილებას ვეტო დაადოს “მაუწყებლობის შესახებ” კანონში შესატან ცვლილებებს, რომელიც სხვა საკითხებთან ერთად ითვალისწინებს საზოგადოებრივი მაუწყებელისთვის გაუმჭვირვალე შესყიდვების პროცედურებს, კომერციული რეკლამისა თუ სპონსორობის განთავსების დროის გაზრდას და სხვა პრობლემატურ საკითხებს.
16.01.2018
საქართველოს ჟურნალისტური ეთიკის ქარტიის საბჭოს სამდივნომ დასაშვებად სცნო მოქალაქე მარიამ გელაშვილის განცხადება საზოგადოებრივი მაუწყებლის ჟურნალისტის, სოფო ზედელაშვილის წინააღმდეგ. სადავო მასალა 6 იანვარს გავიდა "მოამბის" ეთერში და ეხებოდა ნიკო ნიკოლაძის საცხოვრებელ სახლს, რომელსაც მასალის თანახმად, "დღეს მუზეუმის სტატუსიც კი არ აქვს მინიჭებული. შენობაში მიმდინარე სარემონტო სამუშაოებმა კი, შესაძლოა, ისტორიული მნიშვნელობის კულტურული მემკვიდრეობის ძეგლი მთლიანად დააზიანოს."

განმცხადებელი მარიამ გელაშვილი მიიჩნევს, რომ  ჟურნალისტმა არაზუსტი ინფორმაცია გაავრცელა.  "სიუჟეტი იყო დაუბალანსებელი, დაეყრდნო ერთპირონულად მხოლოდ ერთი პირის ინტერვიუს, არ იყო წარმოდგენილი მეორე მხარის პოზიცია, არც მეზობლებთან გადაამოწმა, არც მერიასთან და ამასთან არ გაეცნო დეტალურად საქმის არსს."

ჟურნალისტური ეთიკის ქარტიის საბჭო განცხადებას განიხილავს და მიიღებს გადაწყვეტილებას დაირღვა თუ არა ქარტიის პრინციპები.

სადავო მასალა

11.01.2018

შემოგვიერთდით Facebook-ზე

ჩამოტვირთეთ PDF ვერსია

ჟურნალისტურ საქმიანობას თან სდევს შეცდომები, არაზუსტი დეტალების გავრცელება, რაც ზოგ შემთხვევაში სისწრაფის, უყურადღებობის, პროფესიონალიზმის ნაკლებობის, მწირი გამოცდილების ანდა სხვა მიზეზით არის გამოწვეული. პასუხისმგებლიანი მედია, რომლისთვისაც აუდიტორიის სანდოობა და რეპუტაცია მნიშვნელოვანია, ცდილობს მყისიერად შეასწოროს დაშვებული შეცდომა, ამცნოს აუდიტორიას და იზრუნოს ზუსტი ინფორმაციის გავრცელებაზე.

ქარტიაში განცხადების შემოტანა შეუძლია ნებისმიერ მოქალაქეს, რომელიც მიიჩნევს, რომ ჟურნალისტმა დაარღვია ეთიკური და პროფესიული სტანდარტები. ქარტიის საბჭო იხილავს განცხადებებს როგორც ქარტიის წევრი, ისე არაწევრი ჟურნალისტების მიმართ.