10  ივნისს საღამოს საინფორმაციო სააგენტოებით გავრცელდა ინფორმაცია მკვლელობის შესახებ. იმავე საღამოს ცნობილი გახდა, რომ შინაგან საქმეთა სამინისტრომ ცოლისა და მცირეწლოვანი შვილის მკვლელობაში ბრალდებული უკვე დააკავა. საინფო 10  ივნისს საღამოს საინფორმაციო სააგენტოებით გავრცელდა ინფორმაცია მკვლელობის შესახებ. იმავე საღამოს ცნობილი გახდა, რომ შინაგან საქმეთა სამინისტრომ ცოლისა და მცირეწლოვანი შვილის მკვლელობაში ბრალდებული უკვე დააკავა. საინფორმაციო სააგენტოების ნაწილის მიერ გავრცელებულ ინფორმაციაში მითითებულია, როგორც ბრალდებულის ისე მსხვერპლის ვინაობა და საცხოვრებელი ადგილი, რაც ოჯახის სხვა წევრების (მათ შორის ბავშვების) იდენტიფიცირების საშუალებას იძლევა.  შინაგან საქმეთა სამინისტროს ვებ-გვერდზე გამოქვეყნებულ ცნობაში ბრალდებული მოხსენიებულია ინიციალებითა, თუმცა დასახელებულია მსხვერპლის ვინაობა. საქართველოს ჟურნალისტური ეთიკის ქარტია სთხოვს მედიის წარმომადგენლებს, ფრთხილად მოეკიდონ მსგავს ინფორმაციას, ნუ ეცდებიან მსხვერპლისა და ბრალდებულის იდენტიფიცირებას, რადგან მათი საცხოვრებელი ადგილისა და ვინაობის დასახელება ამ ახალ ამბავს დამატებით ინფორმაციას ნამდვილად არ სძენს; იმ საინფორმაციო სააგენტოებს კი რომლებმაც ამ სახით უკვე გაავრცელეს ინფორმაცია, მოუწოდებს ტექსტის იმგვარად შესწორებისკენ, რომ შეუძლებელი იყოს ტრაგედიის მონაწილე პირების იდენტიფიცირება და ძველი სახით გავრცელებული ახალი ამბის ინტერნეტში მოძიება. მედია უნდა ეცადოს, რომ ასეთი მძიმე შემთხვევების შესახებ ინფორმაციის გავრცელებისას თუნდაც უნებლიედ რისკის ქვეშ არ დააყენოს ბავშვები. ქარტია ასევე მოუწოდებს შინაგან საქმეთა სამინისტროს, ანონიმურობა შეუნარჩუნოს არა მხოლოდ ბრალდებულს, არამედ მსხვერპლსაც. ჟურნალისტური ეთიკის ქარტია მადლობას უხდის იმ მედიასაშუალებებს, რომლებმაც გაითვალისწინეს ადამიანებისთვის ზიანის მიყენების საფრთხე და ინფორმაცია როგორც მსხვერპლის, ისე ბრალდებულის იდენტიფიცირების გარეშე გაავრცელეს.