საზოგადოებრივი მაუწყებლის „აჭარის ტელევიზიის“ ინფორმაციით, თურქეთ-საქართველოს საზღვარზე თურქული მხარის წარმომადგენლებმა მათ ჟურნალისტებს ფიზიკური შეურაცხყოფა მიაყენეს.

 

ჟურნალისტები აცხადებენ, რომ მებაჟეებმა ერთ-ერთ მათგანს წაართვეს პასპორტი, მობილური ტელეფონი და აღარ უბრუნებდნენ, ცდილობდნენ მიკროფონის და კამერის წართმევასაც. მათივე ინფორმაციით, მოქალაქეები თურქეთის მხრიდან ფიზიკურ შეურაცხყოფაზეც საუბრობენ და ჟურნალისტები სწორედ ამ ამბის გასაშუქებლად ცდილობდნენ სარფის საბაჟოს გადაკვეთას.

 

დაუშვებელია ჟურნალისტისთვის საქმიანობაში ხელის შეშლა, განსაკუთრებით მაშინ, როცა ის ადგილზე საზოგადოებისთვის ინფორმაციის მიწოდების მიზნით იმყოფება. საქართველოს ჟურნალისტური ეთიკის ქარტიის საბჭო ქართულ და თურქულ მხარეს ინციდენტის დროულად შესწავლისა და მკაცრი რეაგირებისკენ მოუწოდებს.