კატეგორია : განცხადებები;
7 დეკემბერს „ტვ პირველის“ ჟურნალისტი მაკა ჩიხლაძე და ოპერატორი გიორგი შეწირული პირდაპირ ეთერში მუშაობდნენ ბესიკის ქუჩიდან, როცა მათ თავს დაესხნენ შავებში ჩაცმული ნიღბიანი პირები. თავდამსხმელმა მაკა ჩიხლაძე ძირს დააგდო, ხოლო გიორგი შეწირული რამდენიმე პირმა სცემა. ისინი ოპერატორს ფეხს ურტყამდნენ თავსა და მუცელში. პოლიციამ, რომელიც იქვე იყო, სამსახურებრივი გულგრილობა გამოიჩინა და მედიის წარმომადგენლები არ დაიცვა. მაკა ჩიხლაძე და გიორგი შეწირული საავადმყოფოში გადაიყვანეს, სადაც მათ კვლევებს უტარებენ. ორივე მათგანს ტვინის შერყევა აქვს.
„ტვ პირველის“ ინფორმაციით, თავდამსხმელები „ქართული ოცნების“ ე.წ. ტიტუშკები იყვნენ, რომლებმაც მანამდე პროევროპული აქციის მონაწილეებს სცემეს.
„ქართული ოცნების“ მიერ წლების განმავლობაში სიძულვილის მეთოდურად გაღვივებამ და ძალადობრივი ჯგუფების კულტივირებამ შედეგად ის გამოიღო, რომ ქვეყანაში ჟურნალისტებს აღარ აქვთ უსაფრთხოდ მუშაობის საშუალება.
ჟურნალისტური ეთიკის ქარტია სოლიდარობას უცხადებს “ტვ პირველს” და „ქართულ ოცნებას“ ჟურნალისტებთან ანგარიშსწორების შეწყვეტისა და ძალადობრივი ჯგუფების თარეშის ალაგმვისკენ მოუწოდებს.
