საქართველოს ჟურნალისტური ეთიკის ქარტიის საბჭოს სამდივნომ დასაშვებად ცნო ანა კომლაძის განცხადება ტელეკომპანია “იმედის” არაიდენტიფიცირებული ჟურნალისტის წინააღმდეგ

12.03.2025

კატეგორია : ანონსი;

საქართველოს ჟურნალისტური ეთიკის ქარტიას ანა კომლაძემ ტელეკომპანია “იმედის” არაიდენტიფიცირებული ჟურნალისტის წინააღმდეგ განცხადებით მომართა.

სადავო ქარდი ტელეკომპანია “იმედის” ფეისბუქ გვერდზე 2025 წლის 5 მარტს გამოქვეყნდა. ის ანა კომლაძის თბილისის მერიიდან გათავისუფლებას ეხება.

განმცხადებელი დავობს ქარტიის პირველი (სიზუსტე), მეხუთე (შესწორება), მეშვიდე (დისკრიმინაცია) და მე-11 (ფაქტის განზრახ დამახინჯება) პრინციპების დარღვევაზე.

მოპასუხე ჟურნალისტად განისაზღვრა “იმედის” არაიდენტიფიცირებული ჟურნალისტი.

ქარტიის საბჭო განცხადებას ღია სხდომაზე განიხილავს და გადაწყვეტს, დაირღვა თუ არა სადავო ჟურნალისტურ პროდუქტში ქარტიის პრინციპები.

მსგავსი სიახლეები

საქართველოს ჟურნალისტური ეთიკის ქარტია სოლიდარობას უცხადებს „რადიო თავისუფლებას“ და ევროკავშირის ქვეყნების მთავრობებსა და კერძო ფონდებს მისი მხარდაჭერის თხოვნით მიმართავს

„რადიო თავისუფლება“ 75 წელზე მეტია, მილიონობით ადამიანისთვის
ევროპის, ცენტრალური აზიისა და ახლო აღმოსავლეთის იმ ქვეყნებში, სადაც
მათ მთავრობები ინფორმაციაზე წვდომას უზღუდავენ, მიუკერძოებელი ახალი
ამბებისა და სანდო ანალიზის მთავარი წყაროა.
საქართველოში „რადიო თავისუფლების“ როლი სრულიად განსაკუთრებულია.
დამოუკიდებლობის მოპოვების შემდგომ შესაძლებელი გახდა თბილისში
ადგილობრივი ბიუროს გახსნა, რომელიც მალევე იქცა ადგილობრივი
მედიალანდშაფტის ორგანულ და მნიშვნელოვან ნაწილად. „რადიო
თავისუფლების“ ქართული რედაქცია ადგილობრივი მედიასაშუალებების
მხარდამხარ წერს თანამედროვე ქართული მედიის ისტორიას.
საქართველოში მედიას წლებია, უკიდურესად პოლარიზებულ, ღიად მტრულ
და დამთრგუნველ გარემოში უწევს მუშაობა. „რადიო თავისუფლებამ“ ამ რთულ
პირობებშიც კი შეძლო მაღალი პროფესიული სტანდარტის დამკვიდრება,
ჩამოყალიბდა პროფესიის მეტრად, რომელზეც ჟურნალისტთა თაობები
იზრდებიან და რომელზეც სხვა ქართულ მედიასაშუალებებს აქვთ
სწორება.
„რადიო თავისუფლება“ ქმნის სივრცეს თავისუფალი აზრისა და
შინაარსიანი დებატებისათვის. ჟურნალისტები „რადიო თავისუფლებიდან“
რეგულარულად იღებენ პროფესიულ ჯილდოებს საუკეთესო
ნამუშევრებისთვის. „რადიო თავისუფლება“ იზიდავს ახალგაზრდებს სოციალურ
მედიაში განთავსებული მრავალფეროვანი ჟურნალისტური
ნამუშევრებით.
ქართული მედიასაშუალებები „ქართული ოცნების“ დამაზიანებელი
ქმედებების შედეგად დახურვის, ხოლო ქართული საზოგადოება “ქართული
ოცნების” მიერ შექმნილი პროპაგანდისტული საინფორმაციო ინფრასტრუქტურის
პირისპირ დარჩენის საფრთხის წინაშე არიან. ამ ფონზე კიდევ უფრო
იზრდება “რადიო თავისუფლების” როლი და
მისია.
„რადიო თავისუფლების“ გარეშე მედია საქართველოში უკიდურესად
გაღარიბდება, დაიკარგება საზოგადოების მრავალფეროვანი
ხმები.
ქარტია თხოვნით მიმართავს ევროპული ქვეყნების მთავრობებს და კერძო
ფონდებს, გამონახონ რესურსები „რადიო თავისუფლების“ შესანარჩუნებლად
იმ საზოგადოებებისათვის მრავალ ქვეყანაში, რომელთათვისაც ის იმედი და
საყრდენია და რომელთა ისედაც რთული ყოველდღიურობა „რადიო
თავისუფლების“ გარეშე კიდევ უფრო დამძიმდება.

19.03.2025

საქართველოს ჟურნალისტური ეთიკის ქარტიის საბჭოს სამდივნომ დასაშვებად ცნო იაკობ ლეჟავას განცხადება გაზეთების "ასავალ–დასავალისა" და "საქართველოს რესპუბლიკის" წინააღმდეგ

საქართველოს ჟურნალისტური ეთიკის ქარტიას იაკობ ლეჟავამ
გაზეთების “ასავალ-დასავალი” და “საქართველოს რესპუბლიკა” წინააღმდეგ
მომართა.

სადავო სტატია (გვ. 8-9)
თავდაპირველად გაზეთმა “ასავალ-დასავალი” 2025 წლის 10 თებერვალს
გამოაქვეყნა თავის ყოველკვირეულ გაზეთში, ხოლო შემდეგ 2025 წლის 14
თებერვალს “საქართველოს რესპუბლიკამ”
გადაბეჭდა (გვ. 6).

განმცხადებელი ორივე შემთხვევაში ქარტიის პირველი
(სიზუსტე); მეხუთე (შესწორება); მე-10 (პირადი ცხოვრების
ხელშეუხებლობა) და მე-11 (ფაქტის განზრახ დამახინჯება) პრინციპების
დარღვევაზე დავობს.

განმცხადებლის მხრიდან მოპასუხე
რედაქტორებად/ჟურნალისტებად გაზეთ “ასავალ-დასავალის” შემთხვევაში
განისაზღვრნენ მთავარი რედაქტორი ლაშა ნადარეიშვილი და ჟურნალისტი
ჯაბა ხუბუა, ხოლო გაზეთ “საქართველოს რესპუბლიკის” შემთხვევაში,
მთავარი რედაქტორი სპარტაკ ქობულია.

ქარტიის საბჭო განცხადებას ღია სხდომაზე განიხილავს
და გადაწყვეტს, დაირღვა თუ არა სადავო ჟურნალისტურ პროდუქტში ქარტიის
პრინციპები.

18.03.2025

ჟურნალისტური ეთიკის ქარტია გმობს ჟურნალისტ გელა მთივლიშვილზე თავდასხმას და შსს-ს მოძალადე თანამშრომლის მთელი სიმკაცრით დასჯისკენ მოუწოდებს

15 მარტს „მთის ამბების“ რედაქტორს, ჟურნალისტ გელა
მთივლიშვილს ავტობანზე, წეროვანთან, შსს-ს შეიარაღებული
თანამშრომელი თავს დაესხა. ჟურნალისტი თბილისში
ბრუნდებოდა, რა დროსაც მას თეთრი ფერის პიკაპი აედევნა, რომელიც
საავარიო სიტუაციას ქმნიდა. მთივლიშვილმა მანქანა გააჩერა. პიკაპიდან
შსს-ს შეიარაღებული თანამშრომელი და მისი თანმხლები პირი გადმოხტნენ.
შსს-ს თანამშრომელი ჟურნალისტს აგინებდა და ემუქრებოდა. მთივლიშვილმა
გადაღება დაიწყო, რა დროსაც მას შსს-ს თანამშრომელმა სამჯერ დაარტყა
და მისთვის ტელეფონის წართმევას შეეცადა. ეს პირი თვითმხილველებსაც
დაუპირისპირდა და მათ ვიდეოს წაშლა მოთხოვა.
ბოლო თვეების განმავლობაში გახშირებული თავდასხმები
ჟურნალისტებზე „ქართული ოცნების“ მიერ დამოუკიდებელი მედიის მიმართ
გაღვივებული სიძულვილის პირდაპირი შედეგია. არავინ დასჯილა
ჟურნალისტების ცემისა და შეურაცხყოფის გამო, რაც მოძალადეებს ფართო
ასპარეზს აძლევს.
ეს არ არის გელა მთივლიშვილზე თავდასხმის პირველი
შემთხვევა. ის თავისი პროფესიული საქმიანობის გამო მანამდეც გამხდარა
ძალოვანი უწყებების წარმომადგენელთა თუ სხვადასხვა ძალადობრივი ჯგუფის
აგრესიის სამიზნე.
თავდამსხმელის იდენტიფიცირება მარტივია -
თვითმხილველების მიერ გადაღებულ ვიდეოში ის კარგად ჩანს, ისევე როგორც
გარკვევით ჩანს მისი ავტომობილის სახელმწიფო ნომრები.
ქარტია სოლიდარობას უცხადებს გელა მთივლიშვილს, შსს-ს კი
მოუწოდებს, ამჯერად მაინც გამოიჩინოს პროფესიონალიზმი და დროულად
დააყენოს მისი მოძალადე თანამშრომლის პასუხისმგებლობის
საკითხი.

15.03.2025

შემოგვიერთდით Facebook-ზე

როგორ შევიტანოთ განცხადება ქარტიაში?

ქარტიაში განცხადების შემოტანა შეუძლია ნებისმიერ მოქალაქეს, რომელიც მიიჩნევს, რომ ჟურნალისტმა დაარღვია ეთიკური და პროფესიული სტანდარტები. ქარტიის საბჭო იხილავს განცხადებებს როგორც ქარტიის წევრი, ისე არაწევრი ჟურნალისტების მიმართ.

შესწორების სტანდარტი მედიაში - სახელმძღვანელო წესები

ჩამოტვირთეთ PDF ვერსია

ჟურნალისტურ საქმიანობას თან სდევს შეცდომები, არაზუსტი დეტალების გავრცელება, რაც ზოგ შემთხვევაში სისწრაფის, უყურადღებობის, პროფესიონალიზმის ნაკლებობის, მწირი გამოცდილების ანდა სხვა მიზეზით არის გამოწვეული. პასუხისმგებლიანი მედია, რომლისთვისაც აუდიტორიის სანდოობა და რეპუტაცია მნიშვნელოვანია, ცდილობს მყისიერად შეასწოროს დაშვებული შეცდომა, ამცნოს აუდიტორიას და იზრუნოს ზუსტი ინფორმაციის გავრცელებაზე.