ჟურნალისტური ეთიკის ქარტიის საბჭოს გადაწყვეტილებით, ჟურნალ "თბილისელების" ჟურნალისტმა ეკა ბარაბაძემ დაარღვია საქართველოს ჟურნალისტური ეთიკის ქარტიის მე-7 პრინციპი. ამ პრინციპის მიხედვით, ჟურნალისტს უნდა ესმოდეს მედიის მიერ დისკრიმინაციის წახალისების საფრთხე და ყველაფერი უნდა იღონოს დისკრიმინაციის თავიდან ასაცილებლად.

განმცხადებელი , თამარ ჯანჯღავა სადავოდ ხდიდა ჟურნალ "თბილისელებში" გამოქვეყნებულ სტატიას - " როგორ აქცია ქალმა ქმარ -შვილი მკვლელებად და რა გახდა სასტიკი დანაშაული მიზეზი" და მიჩნევდა, რომ დაირღვა ქარტიის მე-7 პრინციპი. საბჭომ განცხადება განიხილა 2015 წლის 19 დეკემბერს. ქარტიის სხდომაზე გამოცხადდა განმცხადებელი, მოპასუხე ჟურნალისტი სხდომას არ დასწრებია და არც შეპასუხება წარმოუდგენია.