24.03.2020
23 მარტს, აჭარის ტელევიზიისა და რადიოს დირექტორმა ჟურნალისტ თეონა ხარაბაძეს შეუზღუდა ბათუმში საქმიანობა და დაუსაბუთებლად მიავლინა რეპორტიორად ქუთაისში, ოპერატორის გარეშე, და დაავალა მხოლოდ რადიოსა და ვებ-გვერდისთვის მუშაობა. თეონა ხარაბაძის თქმით, ბათუმიდან ქუთაისში გადაყვანა მისი სამსახურიდან წასვლის იძულების ტოლფასია, რადგან იგი სრულფასოვნად ვერ განახორციელებს თავის საქმიანობას.
23 მარტსვე, მაუწყებლის მენეჯმენტმა განუსაზღვრელი ვადით შეაჩერა არხის ერთ-ერთი ყველაზე გამორჩეული ტოქშოუ „ჰეშთეგი”, რომელიც მართავდა დისკუსიას აქტუალურ სოციალურ საკითხებზე. ეს გადაცემა ყველაზე მეტად გამოხატავდა საზოაგდოებრივი მაუწყებლის არსს და სარგებლობდა მაყურებელთა მაღალი ნდობით. ქარტია მიიჩნევს, რომ გადაცემის გაურკვეველი ვადით დახურვა გულისხმობს ამ გადაცემის შემოქმედებითი ჯგუფის დევნას.
ქარტია დაუშვებლად მიიჩნევს აჭარის ტელევიზიისა და რადიოს მენეჯმენტის მიერ ისეთ საკადრო პოლიტიკის გაგრძელებას, რომელიც ქმნის გაუსაძლის სამუშაო პირობებს, ახალი ამბების სამსახურიდან დევნის პროფესიონალ კადრებს და ანგრევს საზოგადოებრივი მაუწყებლის პრინციპებს. დღევანდელი საგანგებო მდგომარეობის პირობებში, როდესაც საზოგადოებრივი მაუწყებლის როლი განსაკუთრებულად მნიშვნელოვანია, ასეთი პოლიტიკის განხორციელება კიდევ უფრო ძაბავს ვითარებას.
