გავრცელებული ინფორმაციით, რუსთაველის გამზირზე ძალადობრივი ჯგუფები ჟურნალისტებს ფიზიკურ და სიტყვიერ შეურაცხყოფას აყენებენ. მედიასაშუალებები იუწყებიან, რომ ძალადობრივი ჯგუფის წევრები ჟურნალისტებს თავს ესხმიან, აგინებენ და ტერიტორიის დატოვებას აიძულებენ. 

• ტელეკომპანია „პირველის" ინფორმაციით, დაზიანებულია მაუწყებლის კუთვნილი ტექნიკა;
• ტელეკომპანია „ფორმულას” ინფორმაციით, მაუწყებლის ჟურნალისტს, გუგა დვალიშვილს მიკროფონი წაართვეს და ხელიდან გააგდებინეს, ოპერატორს კი მიაყენეს ფიზიკური შეურაცხყოფა;
• სცემეს „ფორმულას” სხვა გადამღები ჯგუფი - გიორგი გაბუნია და ლექსო ხომასურიძე;
• „რუსთავი 2”-ის ჟურნალისტებს ესროლეს ჯოხები;
• თავს დაესხნენ და თავში კეტი ჩაარტყეს „ტაბულას” ჟურნალისტს, მაკო ჯაბუას, რომელსაც ეცვა მაისური, წარწერით „პრესა". 
• სიტყვიერი შეურაცხყოფა მიაყენეს „ნეტგაზეთის” ჟურნალისტს, ლუკა პერტაიას;
• თავს დაესხნენ On.ge-ს ჟურნალისტს, თამთა კახაბერიძეს;
• პალიტრანიუსის ინფორმაციით, ნაცემია მედიასაშუალების ოპერატორი, მას დაზიანებები სახის არეში აქვს მიყენებული, დაზიანებულია ტელეარხის ვიდეოკამერა;
• ტელეკომპანია „იმედის" ინფორმაციით, აქციის მონაწილეები „იმედის“ ჟურნალისტსა და ოპერატორს ფიზიკურად დაუპირისპირდნენ;
• დაშავებულია რადიო თავისუფლების ორი ჟურნალისტი, დაზიანებულია მათი კუთვნილი ტექნიკა. ჟურნალისტ თორნიკე მანდარიას თავი აქვს გატეხილი და კბილები ჩამტვრეული. ოპერატორ დათო ქორიძეს კი დაზიანებული აქვს თავი და სახეზე რამდენიმე ადგილას ჰემატომა; 
• „პირველი არხის" ინფორმაციით, აქციაზე დაპირისპირებისას მათი ოპერატორი ილია თვალიაშვილი დაშავდა;
• ნაცემია „TV პირველის" ოპერატორი ალექსანდრე ლაშქარავა და დამტვრეულია აპარატურა;
• აჭარის საზოგადოებრივი მაუწყებლის ინფორმაციით, მათ გადამღებ ჯგუფს რადიკალურად განწყობილი მოქალაქეები თავს დაესხნენ. დაშავებულია ჟურნალისტი თიკო სუსარეიშვილი, რომელიც კონტრაქციის მიმდინარეობას აშუქებდა;
• დაშავდნენ მთავარი არხის ჟურნალისტები დეა მამისეიშვილი, ირაკლი ბახტაძე, ნინო გაზდელიანი, დათუნა ახალაძე, ანრი ჯოხარიძე, ქეთა ციცქიშვილი და თორნიკე ბარნაბიშვილი;
• „გურია ნიუსის” ინფორმაციით, დაუპირისპირდნენ მათ ჟურნალისტს მერაბ ცაავას;
• დაშავდნენ ტელეკომპანია „რუსთავი 2"-ის ჟურნალისტები მარიამ ქუმსიშვილი, მარიკა გოცირიძე, გიორგი პერტია​, სალომე ბოკუჩავა, ზურა მანაგაძე, ბექა ათაბეგაშვილი, ​​ნიკოლოზ ურუშაძე და შოთა სიკინჭალაშვილი;
• დაშავებულია „ინტერპრესნიუსის" ფოტოკორესპონდენტი გიორგი ნიკოლიშვილი;
• დაშავდნენ ტელეკომპანია „ფორმულას" ჟურნალისტები ნინო ვარძელაშვილი, რატი წვერავა, ლუკა ხაჩიძე; ოპერატორები ლევან ბრეგვაძე, ნიკოლოზ ქალიაშვილი, ზაზა კაპანაძე, გიორგი მაისაშვილი; ფოტოგრაფი ვახო ქარელი.

ქარტია მოუწოდებს შინაგან საქმეთა სამინისტროს, დაიცვას მედიის წარმომადგენლები ჟურნალისტურ საქმიანობაში უკანონო ხელისშეშლისაგან და ძალადობისგან.

ჟურნალისტური ეთიკის ქარტია მოუწოდებს ხელისუფლებას, დაიცვას ჟურნალისტთა უსაფრთხოება და პროფესიული საქმიანობის შესრულებისას მედიას შეუქმნას შესაბამისი სამუშაო პირობები, რათა მოქალაქეებს ჰქონდეთ შესაძლებლობა, მიიღონ ინფორმაცია მიმდინარე პროცესებთან დაკავშირებით.

ჟურნალისტური ეთიკის ქარტია ყოველთვის დაიცავს ჟურნალისტთა უფლებებს და გამოხატვის თავისუფლების მაღალ სტანდარტს.