საქართველოს ჟურნალისტური ეთიკის ქარტია მოუწოდებს მედიას, ხელი არ შეუწყონ  ანტიდასავლურ და ჰომოფობიურ კამპანიას.

 

ბოლო რამდენიმე დღეა ტელეკომპანიები: იმედი და POSTV აქტიურად და მანიპულაციურად აშუქებენ ევროპასა და ამერიკაში ლგბტქი ადამიანების უფლებებისა და გამოხატვის შესახებ ინფორმაციას და ავრცელებენ ღიად ჰომოფობიურ და ტრანსფობიურ გზავნილებს. ორივე ორგანიზაცია აქცენტს აკეთებს Gallup-ის კვლევაზე, რომლის მიხედვით, 1997-2003 წლებში დაბადებული ამერიკელი ახალგაზრდების დაახლოებით 21% საკუთარ თავს ლგბტქი თემის წევრად აიდენტიფიცირებს. იმედის ჟურნალისტების ამბობენ: „ისმის შეკითხვები, ხომ არ არის ეს იმის შედეგი, რომ სკოლაში ბავშვებს გენდერულ იდენტობაზე და სექსუალურ ორიენტაციაზე ესაუბრებიან”.

 

ჟურნალისტების მხრიდან ამ ტიპის განცხადებები მიანიშნებს იმაზე, თითქოს მიმდინარეობს „ლგბტ პროპაგანდა” და მანიპულაციური გაშუქების ნიმუშია. სინამდვილეში, „ლგბტ პროპაგანდა” არ არსებობს და ამ ტიპის მოსაზრებების გაჟღერება ჰომოფობიას, ბიფობიასა და ტრანსფობიას აძლიერებს. ის, რომ შესაძლოა, გაიზარდა ადამიანების რაოდენობა, რომლებიც ღიად საუბრობენ ორიენტაციასა თუ გენდერულ იდენტობაზე, მხოლოდ იმის შედეგი შეიძლება იყოს, რომ განათლების ხელმისაწვდომობის ზრდისა და რიგ ქვეყნებში ადამიანის უფლებრივი მდგომარეობის გაუმჯობესების გამო, ადამიანებმა უფრო მეტი გაიგეს საკუთარი იდენტობისა და უფლებების შესახებ და შეუძლიათ ამ თემაზე ხმამაღლა საუბარი. ეს სტატისტიკა ვერ აჩვენებს ლგბტქი ადამიანების რაოდენობის ზრდას, არამედ, აჩვენებს იმას, რომ უფრო ნაკლები ადამიანია იძულებული, დამალოს საკუთარი თავი.

 

გარდა ამ კვლევისა, ორივე ტელეკომპანიამ მანიპულაციურად გააშუქა ევროპარლამენტში დაგეგმილი გამოფენა — ისინი ეყრდნობიან ჟურნალისტ ჯეკ პეროკს, რომელმაც გამოფენას Twitter-ზე „სექსუალური გეი იესო” უწოდა. მარტივად გადამოწმებადია, რომ ეს არ ყოფილა გამოფენის სახელი და მეტიც, მოგვიანებით, თავად ამ ჟურნალისტმა გამოაქვეყნა ტელეკომპანია იმედის ფოტო და დაწერა: „ბუნდოვანია, რა მიმართულება აქვს ამ ქართულ არხს. როგორც ვხვდები, ამ არხთან აფილირებული პარტიები ცდილობენ გაიტანონ ანტი-ლგბტ კანონი”. 

 

აღსანიშნავია, რომ ამავე ჟურნალისტზე დაყრდნობით ინფორმაცია გამოაქვეყნა რუსთავი 2-მაც. 

 

რჩება შთაბეჭდილება, რომ პარლამენტში ალტ ინფოს კანონის რეგისტრაციის შემდგომ, ხელისუფლება ცდილობს, საზოგადოებაში გაავრცელოს ღიად პროპაგანდისტული მოსაზრებები ევროპისა და ამერიკის წინააღმდეგ.

 

ეთიკის ქარტია მოუწოდებს მედიას, არ ჩაერთონ დისკრიმინაციულ კამპანიაში, ნუ შეუწყობენ ხელს მანიპულაციური ინფორმაციის, ანტიდასავლური გზავნილების, ჰომოფობიისა და ტრანსფობიის გავრცელებას და ნუ გახდებიან იარაღი ხელისუფლების ხელში. მედია შესაძლოა მარტივად გახდეს სტერეოტიპების გაღრმავების ხელშემწყობი, თუკი თითოეულ შემთხვევას სიფრთხილით არ მოეკიდება და არ იფიქრებს გაშუქების კუთხესა თუ ტერმინოლოგიაზე. ჟურნალისტებს მგრძნობიარე, არადისკრიმინაციული გარემოს ჩამოყალიბებასა და სტერეოტიპების შემცირებაში მნიშვნელოვანი როლი აქვთ. მედიას აქვს სოციალური პასუხისმგებლობა, არა მხოლოდ არ გაამძაფროს დისკრიმინაცია, არამედ საინფორმაციო ქმედებებით ხელი შეუწყოს საზოგადოებაში არსებული ირაციონალური შიშებისა და ზიზღის წინააღმდეგ ბრძოლას.