11.09.2024
საქართველოს ჟურნალისტური ეთიკის ქარტიას მზია კობერიძემ
განცხადებით მომართა “ტვ მონიტორინგის” ჟურნალისტების
წინააღმდეგ.
სადავო მასალა მათ ფეისბუკ და
იუთუბ გვერდებზე 13 და 14 აგვისტოს გამოქვეყნდა. ის ეხებოდა
“გორმედის” სამშობიაროში 30 წლამდე მშობიარე ქალბატონის გარდაცვალების
ფაქტს.
განმცხადებელი დავობს ქარტიის პირველი (სიზუსტე) პრინციპის
დარღვევაზე.
მისი განმარტებით, აღნიშნული გადაცემა ემსახურებოდა მხოლოდ
"გორმედის" პოზიციის დაფიქსირებას, 30 წლის გარდაცვლილის მშობლების და
ახლობლების გაღიზიანებას და საზოგადოების შეცდომაში შეყვანასა და
მოტყუებას.
მიუხედავად ქარტიის საბჭოს სამდივნოს არაერთი მცდელობისა,
მოპასუხე მედია საშუალებამ ქარტიის სამდივნოს არ აცნობა სადავო
მასალებზე პასუხისმგებელი ჟურნალისტების/რედაქტორების ვინაობა და,
გამომდინარე აქედან, პასუხისმგებლად განისაზღვრა “ტვ მონიტორინგის”
არაიდენტიფიცირებული ჟურნალისტი.
ქარტიის საბჭო განცხადებას ღია სხდომაზე განიხილავს და
გადაწყვეტს, დაირღვა თუ არა სადავო ჟურნალისტურ პროდუქტში ქარტიის
პრინციპები.
