საქართველოს ჟურნალისტური ეთიკის ქარტიის საბჭო შაბათს, 25 იანვარს, ოთხი მედიაპროდუქტის ქარტიის პრინციპებთან შესაბამისობის საკითხს განიხილავს.

11:00 საათზე - ლელა გელხვიძე ნუცა მამულაშვილისა და  მარიკა ბაკურაძის წინააღმდეგ.

სადავო მასალა “იმედის დღის” ეთერში და მათ ფეისბუქ გვერდზე 2024 წლის 18 სექტემბერს გამოქვეყნდა. სიუჟეტში ნაჩვენებია არასრულწლოვნების გამოკითხვა.

განმცხადებელი დავობს ქარტიის მე-8 (ბავშვის უფლებები) პრინციპის დარღვევაზე.

12:00 საათზე - ქრისტინე ზამთარაძე თამარ ჩიკვატიას წინააღმდეგ.

სადავო მასალა “იმედის” ფეისბუქ გვერდზე 2024 წლის 16 ნოემბერს განთავსდა და ეხებოდა ცესკოს თავმჯდომარის გიორგი კალანდარიშვილის საცხოვრებელ სახლთან გამართულ პროტესტს.

განმცხადებელი დავობს ქარტიის პირველი (სიზუსტე); მეშვიდე (დისკრიმინაცია) და მე-11 (ფაქტის განზრახ დამახინჯება) პრინციპების დარღვევაზე. 

13:30 საათზე - კახა კუკავა თათია არაბიძის წინააღმდეგ.

სადავო მასალა “Sfero TV”-ის ფეისბუქ გვერდზე 2024 წლის 25 ოქტომბერს გამოქვეყნდა და უკავშირდება მევახშეობის საკითხებს.

განმცხადებელი დავობს ქარტიის პირველი (სიზუსტე) და მე-11 (ფაქტის განზრახ დამახინჯება) პრინციპების დარღვევაზე.

16:00 საათზე - თინა ცომაია და ნინო ივანიშვილი მაკა ცინცაძის წინააღმდეგ.

სადავო გადაცემა - “მოამბის საგანგებო ეთერი” “პირველ არხზე”  2024 წლის 15 დეკემბერს გავიდა.

განმცხადებლის მითითებით, ჟურნალისტმა რესპოდენტ ირაკლი ფიფიასთან დიალოგისას დაარღვია ქარტიის პირველი (სიზუსტე); მეშვიდე (დისკრიმინაცია); მეცხრე (მასალების გამიჯვნა) და მე-11 (ფაქტის განზრახ დამახინჯება) პრინციპები.

ქარტიის საბჭო განცხადებებს განიხილავს და გადაწყვეტს, დაირღვა თუ არა სადავო ჟურნალისტურ პროდუქტებში ქარტიის პრინციპები.

სხდომა გაიმართება ქარტიის ოფისში: ბაქოს ქ. #4. საქმის განხილვა ღიაა და ნებისმიერ მსურველს შეუძლია დასწრება.