ჟურნალისტური ეთიკის ქარტიის საბჭოს გადაწყვეტილებით, გაზეთ "ახალი ხარაგაულის" ჟურნალისტს მარიანა ბურჯალიანს არ დაურღვევია ქარტიის მე-11 პრინციპის მე-3 ნაწილი, რომლის თანახმადაც "ჟურნალისტმა უმძიმეს პროფესიულ დანაშაულად უნდა მიიჩნიოს შემდეგი ქმედება - პლაგიატი".

განმცხადებელი, ლაურა გოგოლაძე მიიჩნევდა, რომ გაზეთში "ახალი ხარაგაული" გამოქვეყნებული მასალის "ადგილობრივი ხელისუფლებისათვის ტყის საკუთრებაში გადაცემის შესახებ შეხვედრა გაიმართა" ძირითადი ნაწილი გადმოტანილია chemikharagauli.com-ზე გამოქვეყნებული ინფორმაციიდან: "გადაეცემა თუ არა ტყე ხარაგაულის მუნიციპალიტეტს". საბჭომ განცხადება განიხილა 2015 წლის 19 დეკემბერს და მიიჩნია რომ მარიანა ბურჯალიანს არ დაურღვევია ქარტიის მე-11 პრინციპის მე-3 ნაწილი. ქარტიის სხდომაზე არც ერთი მხარე არ გამოცხადებულა, ორივე პოზიცია დაფიქსირებული იყო წერილობითი ფორმით.