13 ნოემბერს გაიმართა ჟურნალისტური ეთიკის ქარტიის საბჭოს სხდომა. სხდომაზე განიხილებოდა საქმე "ფოთის მაჟორიტარი დეპუტატის, ეკა ბესელიას ბიურო Tspress-ის ჟურნალისტების ელისო ჯანაშიასა და იზა სალაყაიას წინააღმდეგ".

დეპუტატის ბიურომ განცხადებით მიმართა საქართველოს ჟურნალისტური ეთიკის ქარტიის საბჭოს, განმცხადებელი მიუთითებდა, რომ ჟურნალისტებმა ელისო ჯანაშიამ და იზა სალაყაიამ დაარღვიეს ქარტიის პრინციპები. განცხადებას ერთვოდა 9 სადავო სტატია:
1. "ფოთის მაჟორიტარის უკანონო მოთხოვნა საკრებულოს"
2. "მაჟორიტარი და მერი საკადრო წმენდაზე ცალ-ცალკე თათბირობენ"
3. "დაპირისპირება ბესელიასა და მის ფავორიტ მერს შორის"
4. "მაჟორიტარის კადრი რესურსცენტრის უფროსად ან მერის მოადგილედ განიხილება"
5. "თვალთვალი და მუქარა სამართალდამცავთა მხილების გამო"
6. "ნეპოტიზმი და პოლიტიკური დანიშვნები ფოთის მერიაში"
7. "TSPRESS მაჟორიტარის დაუსაბუთებელ ბრალდებებს პასუხობს"
8. "იცავს თუ არა ეკა ბესელიას ფოთის პროკურორის აგარაკის წინ პოლიცია"
9. "ბესელიას ბიუროსთვის ჩამორთმეული Toyota – Prado მერის "ბავშვობის მეგობარ" მოადგილეს გადაეცა".

საერთო ჯამში. განმცხადებელი მიიჩნევდა, რომ ადგილი ჰქონდა ქარტიის პრინციპების დარღვევის 22 ფაქტს. საბჭომ იმსჯელა და მიიღო გადაწყვეტილება, რომ ქარტიის პრინციპები დაირღვა მხოლოდ სამ სტატიაში, იზა სალაყაიას მიერ ორ სტატიაში დაირღვა ქარტიის სამი პრინციპი, ხოლო ელისო ჯანაშიას მიერ ერთ სტატიაში დაირღვა ერთი პრინციპი.