საქართველოს ჟურნალისტური ეთიკის ქარტიის საბჭოს გადაწყვეტილებით, ინტერნეტ გამოცემა fact2.ge-ს ჟურნალისტმა ბესო მახარაშვილმა ქარტიის პირველი (სიზუსტე) და მესამე (ფაქტების მიჩქმალვა) პრინციპი დაარღვია.

ქარტიას განცხადებით მომართა კომპანია iPlus-მა. ის მიიჩნევდა, რომ ეთიკური პრინციპები დარღვეული იყო Fact2.ge-ს მიერ გამოქვეყნებულ მასალაში სათაურით „IPHONE+“-ის მორიგი დაზარალებული?! ნანიკო ხაზარაძე: არც დამიშვია, რომ შეიძლებოდა, მეორადი ტელეფონი მოეყიდა, მაგრამ… " განმცხადებელი ასევე ფიქრობდა, რომ დარღვეული იყო ქარტიის მეხუთე პრინციპიც, რომელიც ჟურნალისტს არასწორი ინფორმაციის შესწორებას ავალდებულებს. მტკიცებულებების წარმოდგენისთვის საბჭომ IPLUS-ს დამატებითი დრო მისცა.

განმცხადებელმა წარმოადგინა სატელეფონო ჩანაწერი მედიასაშუალებასთან, თუმცა, საბჭომ მიიჩნია, რომ ამით არ დგინდებოდა მეხუთე პრინციპის დარღვევა, შესაბამისად, მხოლოდ პირველი და მესამე პრინციპი მიიჩნია დარღვეულად.