საქართველოს ჟურნალისტური ეთიკის ქარტიის საბჭოს გადაწყვეტილებით, ტელეკომპანია „იმედის" გადაცემა „იმედის კვირის" წამყვანმა ირაკლი ჩიხლაძემ ქარტიის პირველი (ინფორმაციის სიზუსტე) და მეშვიდე (დისკრიმინაცია) პრინციპები დაარღვია.

მის წინააღმდეგ ქარტიას WISG-მა, თემიდამ, ქეთევან კაბულაშვილმა და სოფიკო გულედანმა მომართეს. სადავო მასალა 2023 წლის 17 სექტემბერს გავიდა ეთერში. 

განმცხადებლები განმარტავდნენ, რომ წამყვანმა დისკრიმინაციის წამახალისებელი ფრაზები გააჟღერა და არასწორი ინფორმაცია გაავრცელა. 

WISG და თემიდა დავობდნენ ქარტიის პირველი (ინფორმაციის სიზუსტე) და მეშვიდე (დისკრიმინაცია) პრინციპის დარღვევაზე. 

ქეთევან კაბულაშვილი და სოფიკო გულედანი დავობდნენ ქარტიის მეშვიდე (დისკრიმინაცია) პრინციპის დარღვევაზე. 

გადაწყვეტილების სამოტივაციო ნაწილი მოგვიანებით გამოქვეყნდება.

საქართველოს ხელისუფლებისა და მმართველი პარტიის ხელმძღვანელი პირების მხრიდან  სამოქალაქო ორგანიზაციებზე მიზანმიმართული თავდასხმა გრძელდება. ბოლო პერიოდში მაღალი პოლიტიკური თანამდებობის მქონე პირების მიერ გაკეთებული განცხადებები დეზინფორმაციის წინააღმდეგ მებრძოლი, საარჩევნო საკითხებსა და ადამიანის უფლებებზე მომუშავე ორგანიზაციების დისკრედიტაციას ისახავს მიზნად. იმის გათვალისწინებით, რომ მიმდინარე წელს ქვეყანაში დაგეგმილია არჩევნები, მსგავსი კამპანიები და მნიშვნელოვანი საკითხების პოლიტიკური მანიპულაციისთვის გამოყენება განსაკუთრებით საფრთხის შემცველია.  

20 იანვარს პარლამენტის თავმჯდომარემ შალვა პაპუაშვილმა პარლამენტში სპეციალური ბრიფინგი გამართა, სადაც სახალხო დამცველის აპარატთან არსებული ტოლერანტობის ცენტრის ხელმძღვანელს,  ბექა მინდიაშვილს თავს დაესხა. ამ ბრიფინგზე პარლამენტის თავმჯდომარის მხრიდან მადისკრედიტირებელი განცხადება გაკეთდა „საბჭოთა წარსულის კვლევის ლაბორატორიის“ (SovLab) და “სამოქალაქო იდეის” მიმართაც. 

რელიგიური თემების და ისტორიის ინსტრუმენტალიზაცია, დეზინფორმაცია, უფლებადამცველების და სამოქალაქო ორგანიზაციების წარმომადგენელთა სახელმწიფოს, რელიგიის და ეკლესიის მტრებად გამოცხადება არადემოკრატიული სახელმწიფოებისთვის დამახასიათებელი პრაქტიკაა, საზოგადოებაში პოლარიზაციის ხარისხს კიდევ უფრო ზრდის და ადამიანების რელიგიურ ნიადაგზე დაპირისპირების რისკებს შეიცავს. იმ პირობებში, როდესაც საქართველოს საპატრიარქომ მიზანშეუწონლად მიიჩნია სტალიანის გამოსახულებიანი ხატის ეკლესიაში არსებული ფორმით დატოვება და შესაბამისს ზომებსაც მიმართა, ხელისუფლების მიერ, იმ ორგანიზაციების და პირების წინააღმდეგ იერიში, ვინც პრობლემა გამოავლინა და საბჭოთა ტოტალიტარულ მემკვიდრეობას, როგორც კრემლის დეზინფორმაციის ერთ-ერთ ინსტრუმენტს ებრძვის, აზიანებს პროცესს, რომელიც გარე საფრთხეების წინააღმდეგ საზოგადოების კონსოლიდირებაზე უნდა იყოს მიმართული და არა შიდა დემოკრატიულ ინსტიტუტებთან ბრძოლაზე. ასევე შემაშფოთებელია, რომ ხელისუფლება მიზანმიმართილად ცდილობს რელიგიური ორგანიზაციები პოლიტიკური პროცესის აქტიურ მონაწილად აქციოს, რაც თავად რელიგიური ორგანიზაციების პოლიტიკურ ნეიტრალიტეტსა და დამოუკიდებლობასაც აზიანებს.

აღსანიშნავია, რომ სამოქალაქო ორგანიზაციების მსგავსად, კოორდინირებული შეტევის სამიზნე საერთაშორისო დონორი ორგანიზაციებიც არიან. განსაკუთრებით საგანგაშოა პარლამენტის თავმჯდომარის მიერ აშშ-ის საერთაშორისო განვითარების სააგენტოზე (USAID)  თავდასხმა. იმ ფონზე, როდესაც ამერიკის მთავრობის და სხვა დასავლური სახელმწიფო და კერძო ფონდების ფინანსური დახმარებით საქართველოში არაერთი საკულტო ნაგებობის და კულტურული მემკვიდრეობის ძეგლის აღდგენა-შენარჩუნება მოხდა, ასეთი თავდასხმები არაკონსტრუქციულ ხასიათს ატარებს და აძლიერებს კრემლის პროგანდისტულ ნარატივს, რომელიც დასავლურ ცივილიზაციას ქართული იდენტობის მტრად სახავს.

მმართველი პარტიისა და ხელისუფლების წარმომადგენლების მხრიდან დონორი ორგანიზაციების მიმართ თავდასხმას არაერთხელ ჰქონდა ადგილი. დონორი ორგანიზაციების წინააღმდეგ წარმოებულ კამპანიაში აქტიურად არიან ჩართული საპარლამენტო უმრავლესობაში შემავალი ანტიდასავლური ჯგუფის, „ხალხის ძალის“, წევრები და პროსახელისუფლებო მედია ორგანიზაციები.

ე.წ. „რუსული კანონის“ შესახებ კანონპროექტების მიღებაზე უარის თქმის მიუხედავად, როგორც ჩანს, ხელისუფლება აგრძელებს სამოქალაქო საზოგადოების ორგანიზაციების დისკრედიტაციისა და ფინანსური მდგრადობის შეზღუდვის მცდელობას, რაც ქვეყანაში სამოქალაქო საზოგადოების ინსტიტუტის შესუსტებას ისახავს მიზნად.  

საგულისხმოა, რომ სამოქალაქო ორგანიზაციების წინააღმდეგ მიმართული მტრული რიტორიკა არ არის ახალი და ქვეყანაში სამოქალაქო საზოგადოების შეზღუდვის მიზნით, ხელისუფლების მიერ ორგანიზებული და კოორდინირებული შეტევის ფაქტობრივად უწყვეტ პროცესს წარმოადგენს. როგორც „სამართლიანი არჩევნების“ 2020 და 2021 წლების არჩევნებისთვის სოციალური მედიის მონიტორინგის შედეგებმა აჩვენა, ფეისბუქზე მმართველის პარტიის სასარგებლოდ და ოპოზიციის საწინააღმდეგოდ მოქმედი გვერდები იმავდროულად უარყოფითად წარმოაჩენდნენ ქვეყანაში სამოქალაქო ორგანიზაციების საქმიანობას. სოციალური მედიის კომპანია Meta-ს მიერ გასული წლის მაისში გამოქვეყნებული ანგარიშის მიხედვით, ფეისბუქიდან და ინსტაგრამიდან კოორდინირებულ არაავთენტურ ქცევაში ჩართვის გამო წაშლილი გვერდები/ანგარიშები/ჯგუფები, რომლებიც პროსამთავრობო, მათ შორის „უცხოეთის აგენტების“ კანონპროექტთან დაკავშირებულ, კამპანიას აწარმოებდნენ, საქართველოს მთავრობის ადმინისტრაციის სტრატეგიული კომუნიკაციების დეპარტამენტთან იყვნენ დაკავშირებული. 

გარდა იმისა, რომ სამოქალაქო საზოგადოების ძლიერი ინსტიტუტის არსებობა მნიშვნელოვანია ქვეყნის დემოკრატიული განვითარებისათვის, მას მნიშვნელოვანი როლი აკისრია ევროინტეგრაციის პროცესშიც. ევროკომისიის 2023 წლის გაფართოების პოლიტიკის შესახებ კომუნიკაციაში საქართველოსთვის განსაზღვრულ ნაბიჯებში განსაკუთრებული ყურადღება ეთმობა სამოქალაქო ორგანიზაციებთან თანამშრომლობასა და მათ ჩართულობას.  

2023 წლის 27 ნოემბერს ევროინტეგრაციის სამთავრობო კომისიამ დაამტკიცა  კომუნიკაციაში საქართველოსთვის განსაზღვრული ნაბიჯების განსახორციელებელი ღონისძიებების გეგმა, რომელშიც სამოქალაქო ორგანიზაციებთან შეხვედრებსა და ერთობლივ საქმიანობაზეა საუბარი. ამდენად, ხელისუფლების მხრიდან სამოქალაქო ორგანიზაციების მადისკრედიტირებელი რიტორიკა ხელს უშლის თანამშრომლურ გარემოს და ეწინააღმდეგება საქართველოს მთავრობის მიერვე ოფიციალურ დოკუმენტში გაცხადებულ პოლიტიკას.

მოვუწოდებთ საქართველოს პოლიტიკურ ხელისუფლებას, შეწყვიტოს სამოქალაქო ორგანიზაციებსა და ქვეყნის საერთაშორისო პარტნიორებზე თავდასხმები და ძალისხმევა მიმართოს ევროინტეგრაციის პროცესისთვის საჭირო რეკომენდაციების შესრულებაზე.

მედიის ადვოკატირების კოალიცია გამოხატავს შეშფოთებას და მკაცრად გმობს თბილისში, ​კეკელიძის ქუჩაზე საცხოვრებელი სახლიდან გამოსახლების გაშუქების დროს ჟურნალისტების საქმიანობაში უკანონო ჩარევის ფაქტებს და ჟურნალისტის დაკავების შემთხვევას. აღნიშნული  ინციდენტები აუარესებს მედიაგარემოს და ჟურნალისტების ფუნდამენტური უფლებების აშკარა დარღვევას წარმოადგენს.

2024 წლის 23 იანვარს  თბილისში, კეკელიძის ქუჩაზე მდებარე საცხოვრებელი კორპუსიდან  გამოსახლების პროცესის გაშუქებისას, ონლაინ მედია „მაუწყებლის“ ჟურნალისტებზე პროფესიული მოვალეობის შესრულების დროს, პოლიციის მხრიდან ფიზიკურ ძალადობას ჰქონდა ადგილი. კერძოდ, “მაუწყებლის” ჟურნალისტი, რატი რატიანი ასრულებდა პროფესიულ მოვალეობას, რა დროსაც ის პოლიციელმა, უხეში ძალის გამოყენებით, ძირს ჩამოაგდო მანქანიდან. აღნიშნული ქმედებით ჟურნალისტის ჯანმრთელობასა და სიცოცხლეს საფრთხე შეექმნა. „მაუწყებლის” წარმომადგენელმა ეთიკის ქარტიასთან საუბრისას აღნიშნა, რომ სამართალდამცავები ფიზიკურად  გაუსწორდნენ კიდევ სამ ჟურნალისტს, მათ შორის, ნათია ქარჩილაძეს, ანი გიორგაძეს და გიორგი არობელიძეს. ასევე, პროფესიული მოვალეობის შესრულების დროს, დააკავეს „მთის ამბების” რედაქტორი, გელა მთივლიშვილი, რომელიც პოლიციის ვაკის რაიონულ სამმართველოშია გადაყვანილი. 

ჟურნალისტები მნიშვნელოვან როლს ასრულებენ საზოგადოების ინფორმირებაში. მედიის წარმომადგენლებისთვის  პროფესიულ საქმიანობაში უკანონოდ ხელის შეშლა და დაკავება როგორც ჟურნალისტების ინდივიდუალური უფლებების დარღვევას, ასევე დემოკრატიულ ინსტიტუტზე თავდასხმას წარმოადგენს. 

მედიის ადვოკატირების კოალიცია მოუწოდებს სპეციალურ საგამოძიებო სამსახურს სასწრაფოდ გამოიძიოს ჟურნალისტების მიმართ ძალადობის, პროფესიულ საქმიანობაში უკანონოდ ჩარევისა და უკანონო დაკავების შემთხვევები. მნიშვნელოვანია აღნიშნული ინციდენტების სწრაფი და საფუძვლიანი გამოძიება, რასაც დამნაშავე პირების იდენტიფიცირება და პასუხისგებაში მიცემა უნდა მოჰყვეს. 

საქართველოს ჟურნალისტური ეთიკის ქარტია ეხმაურება 2024 წლის 23 იანვარს ქარტიის საბჭოს წევრის, „მთის ამბების” რედაქტორის, ჟურნალისტ გელა მთივლიშვილის დაკავებას პროფესიული მოვალეობის შესრულების დროს. ჟურნალისტი აღსრულების პოლიციის მიერ კეკელიძის ქუჩაზე საცხოვრებელი კორპუსიდან ხატიაშვილების ოჯახის გამოსახლების პროცესს აშუქებდა, რა დროსაც ის პოლიციისადმი დაუმორჩილებლობის მოტივით დააკავეს.  როგორც ქარტიისთვის ცნობილია, ადვოკატს, რომელიც სოციალური სამართლიანობის ცენტრს წარმოადგენს, გელა მთივლიშვილმა უთხრა, რომ დაკავებისას პოლიციელებმა მისი მოგუდვა სცადეს.  

ქარტია კატეგორიულად გმობს გელა მთივლიშვილისათვის თავისუფლების უკანონოდ აღკვეთისა და მასზე ფიზიკური ძალადობის ფაქტს და მოუწოდებს სამართალდამცავ უწყებებს, დაუყოვნებლივ გაათავისუფლონ დაკავებული ჟურნალისტი, ასევე სასწრაფოდ გამოიძიონ მისი დაკავებისას პოლიციელების მიერ ძალის გადამეტების ფაქტი. 

საქართველოს ჟურნალისტური ეთიკის ქარტია პოლიციას შეახსენებს მის ვალდებულებას, ჟურნალისტებს შეუქმნას უსაფრთხო გარემო მუშაობისას. 

საქართველოს ჟურნალისტური ეთიკის ქარტია ეხმაურება 2024 წლის 23 იანვარს „მაუწყებლის“ ჟურნალისტებზე პროფესიული მოვალეობის შესრულების დროს პოლიციის მხრიდან ფიზიკური ძალადობის ფაქტებს. ჟურნალისტი რატი რატიანი პირდაპირ ეთერში  აშუქებდა აღსრულების პოლიციის მიერ კეკელიძის ქუჩაზე საცხოვრებელი კორპუსიდან ხატიაშვილების ოჯახის გამოსახლების პროცესს, რა დროსაც ის პოლიციელმა უხეში ძალის გამოყენებით ძირს ჩააგდო, რითაც სერიოზული საფრთხე შეუქმნა მის ჯანმრთელობასა და სიცოცხლეს. როგორც „მაუწყებლის” წარმომადგენელმა ეთიკის ქარტიას უთხრა, პარალელურად, სამართალდამცავები ფიზიკურად  გაუსწორდნენ ამ მედიასაშუალების კიდევ სამ ჟურნალისტს - ნათია ქარჩილაძეს, ანი გიორგაძეს და გიორგი არობელიძეს. 

საქართველოს ჟურნალისტური ეთიკის ქარტია კატეგორიულად გმობს ჟურნალისტებზე ფიზიკური ძალადობის ფაქტს. პოლიციის ამგვარი ქმედება ახალისებს ჟურნალისტების მიმართ ძალადობას ქვეყანაში, სადაც ჟურნალისტების წინააღმდეგ ჩადენილი ათობით დანაშაული დღემდე გამოუძიებელია. ის ასევე ძირს უთხრის ქვეყნის მისწრაფებას, გახდეს ევროპული და ევროატლანტიკური სტრუქტურების სრულფასოვანი წევრი, სადაც სრულად არის დაცული სიტყვისა და გამოხატვის თავისუფლება და ჟურნალისტების პროფესიული უფლებები. 

შინაგან საქმეთა სამინისტროს შევახსენებთ, რომ საქართველოს სისხლის სამართლის კოდექსის 154-ე მუხლის მიხედვით, ჟურნალისტისთვის პროფესიულ საქმიანობაში უკანონოდ ხელის შეშლა დასჯადია. მოვუწოდებთ შინაგან საქმეთა სამინისტროს და სხვა შესაბამის უწყებებს, სწორი კვალიფიკაცია მისცენ ამ ძალადობრივ ქმედებას და დაუყოვნებლივ დაიწყონ  გამოძიება, რათა მოძალადე პოლიციელებმა კანონის მთელი სიმკაცრით აგონ პასუხი.  

საქართველოს ჟურნალისტური ეთიკის ქარტიის საბჭო 25 იანვარს 2 საქმეს განიხილავს: 

19:00 საათი: WISG, თემიდა და ქეთევან კაბულაშვილი, სოფიკო გულედანი ტელეკომპანია „იმედის" ჟურნალისტის ირაკლი ჩიხლაძის წინააღმდეგ 

სადავო მასალა 2023 წლის 17 სექტემბერს გავიდა ეთერში. 

განმცხადებლების პოზიციით, წამყვანმა დისკრიმინაციის წამახალისებელი ფრაზები გააჟღერა. 

WISG და თემიდა დავობენ ქარტიის პირველი (ინფორმაციის სიზუსტე) და მეშვიდე (დისკრიმინაცია) პრინციპის დარღვევაზე. 

ქეთევან კაბულაშვილი და სოფიკო გულედანი დავობენ ქარტიის მეშვიდე (დისკრიმინაცია) პრინციპის დარღვევაზე. 

სხდომა გაიმართება ჰიბრიდულ ფორმატში, სხდომას შეგიძლიათ დაესწროთ ადგილზე: 

მისამართი - ფრონტლაინი, ლადო ასათიანის 62. 

სხდომას შეგიძლიათ შემოუერთდეთ ონლაინ პროგრამა Zoom-ის მეშვეობით. 

სხდომაზე ონლაინ დასწრების მსურველებმა შეგიძლიათ მოთხოვნა გამოაგზავნოთ ელექტრონულ ფოსტაზე - ethicscharter@gmail.com 

საქმის  განხილვა ღიაა და ნებისმიერ მსურველს შეუძლია დასწრება.

ინტერესით ველოდი ჟურნალისტთა ეთიკის საბჭოს გადაწყვეტილებას. მიმაჩნია, რომ ქარტიის პირველი პრინციპი არ დამირღვევია. რეპორტაჟზე მუშაობისას მოვუსმინე ყველა მხარეს, ვისაც პირდაპირი ან ირიბი შეხება ჰქონდა გარდაცვლილი არასრუწლოვნის საქმესთან. მაყურებელს სწორედ მხარეთა მიერ მოწოდებული ინფორმაცია მივაწოდე. ჟურნალისტი მოსამართლე არ არის, რომ საქმეზე ჭეშმარიტება და სიმართლე დაადგინოს.  მთავარია  მიკერძოებული არ იყოს რომელიმე მხარის მიმართ. თამამად შემიძლია ვთქვა, რომ არც ერთი მხარის მიმართ მიკერძოებული არ ვარ. მე გავაშუქე მომხდარი ფაქტი, ვიკვლევდი მიზეზებს რატომ მოხდა ეს ტრაგედია, რა სისტემური პრობლემები არსებობს, ვისი პასუხისმგებლობა იკვეთება და რა უნდა გაკეთდეს მომავალში, რომ მსგავსი პრობლემის წინაშე, რომელიც შესაძლოა ფატალურად დასრულდეს, ბავშვები და მათი ოჯახები არ აღმოჩნდნენ. დიახ, სწორედ გარდაცვლილის ინტერესებს ვიცავდი,  რომლის ჯანმრთელობის და სიცოცხლის დაცვა ევალებოდა ყველას.  მათ შორის, სკოლას და სხვა სახელმწიფო ინსტიტუციებს.  მათ კი ეს ვერ უზრუნველყვეს. ცნობილია, რომ გოგონა  სექსუალური ძალადობის მსხვერპლი იყო. მასზე ორი წლის განმავლობაში ბაბუა ძალადობდა. ცნობისთვის, ამის პირდაპირი მტკიცებულება არ არსებობდა, მაგრამ ბავშვის ჩვენება გახდა ბრალის წარდგენის მთავარი საფუძველი.  (სასამართლომ ბაბუას 16 წელი მიუსაჯა).  ამით იმის თქმა მსურს, რომ როცა საბჭო ადგენს თითქოს ჩემს რეპორტაჟში არ იყო ბულინგის დამადასტურებელი მტკიცებულება და გარდაცვლილის მამის ნაამბობი სარწმუნოდ საკმარისი არ აღმოჩნდა,  ვერ დავეთანხმები. ვფიქრობ, გადაწყვეტილება ზედაპირულია.  არადა პრობლემა ღრმა არის. თუკი ბულინგის პირდაპირი მტკიცებულება არ არსებობს,  ჟურნალისტს დადასტურებლად ვერავინ ჩაეწერება, ხოლო ბრალდების ადრესატი/ადრესატები ფაქტს უარყოფენ, ამიტომ ამბავი არ გავაშუქოთ? მივჩქმალოთ? არსებული პრობლემები არ გამოვავლინოთ? ხელი დავაფაროთ შესაძლო დამნაშავეებს? და ამით დაზარალებული კიდევ უფრო რთულ მდგომარეობაში აღმოჩნდეს? გამოდის, რომ საბჭო ამ გადაწყვეტილებით პოტენციურ მსხვერპლებს ეუბნება, რომ თუ მათ არ გააჩნიათ შესაბამისი მტკიცებულებები, ხმის ამოღება უშედეგოა, იმთავითვე წაგებულ ბრძოლაში ერთვებიან?! ამით რა შედეგამდე მივალთ? - კიდევ უფრო წავახალისებთ მოძალადეებს, მსხვერპლები კი, რომლებსაც ზოგჯერ წლები სჭირდებათ გამბედაობის მოსაკრებად, რომ მოძალადის წინააღმდეგ ხმა ამოიღონ, კიდევ უფრო უარესად დაშინდებიან. მათ ამით ვუკლავთ იმედს, რომ მიიღონ საზოგადოების მხარდაჭერა.

ვთვლი, რომ ბულინგის თემა აქტიურად უნდა შუქდებოდეს მედიის მიერ, რადგან მწვავედ დგას სკოლებში. მთავარი პრობლემა არის ის, რომ ბულინგის იდენტიფიკაცია რთულია. ხშირად მთავარ ბულერად გვევლინება მასწავლებელი, ხოლო ირიბ ბულერებად მოსწავლეები. (კონკრეტული მაგალითები მაქვს, თუმცა, ეს თეკლას საქმესთან შემხებლობაში არ არის). ამით იმის თქმა მინდა, რომ  ხშირ შემთხვევაში ბულინგი შეიძლება ზედაპირზე არ ჩანდეს. მისი გამოვლენა რთულია. ამ დროს ნაკლებად ან თითქმის არ არსებობს  მტკიცებულებები, ამას  გვიდასტურებენ პრაქტიკოსი იურისტებიც. თუმცა, მახვილ თვალს არ გამოეპარება ის სიმპტომები, რაც ბულინგის მსხვერპლს თან სდევს - ბავშვი მოწყენილია, დაღვრემილი, ცუდად ჭამს, ცუდად სძინავს, აქვს შიში, შფოთვა, მენტალური ჯანმრთელობა ირყევა ანუ ქცევაში მკვეთრი ცვლილებები ვლინდება - რაც თეკლას შემთხვევაში სახეზე იყო. სკოლის, მშობლის ცნობით ბავშვი ფსიქოლოგთან დაჰყავდათ. გარდაცვლილის თანასკოლელებიც გვიამბობდნენ, რომ გოგონა გაკვეთილებზე ცუდად ხდებოდა, ჰაერი არ ჰყოფნიდა, პანიკური შეტევები ეწყებოდა, საგაკვეთილო პროცესიდან სკოლის ექიმთან მიჰყავდათ. სწორედაც რომ სკოლის ექიმთან შეხვედრა ვთხოვე დირექტორს ბატონ დანდურიშვილს, რაზეც მან უარი თქვა. შეუძლებელი აღმოჩნდა სკოლის ექიმის ჩანაწერების ნახვაც, რომელიც ამ კითხვებს უპასუხებდა. დირექტორმა ამ თხოვნაზეც უარით გამისტუმრა. 

სამწუხაროდ, ჩვენს სკოლებში არ არსებობს ანტიბულინგური პროგრამები, რომელიც დაეხმარება სისტემას დანერგოს ისეთი ნორმები, რაც ბულინგის გამოვლენას დაეხმარება და  ეფექტური რეაგირების მექანიზმები იარსებებს. მეტიც, სკოლების უმრავლესობა ჩაკეტილია, მშობლები ხშირად ვაწყდებით წინააღდეგობას სკოლის მხრიდან, როცა გვინდა ჩავრთოთ სხვადასხვა ორგანიზაციები თუ მანდატურის სამსახური, რომლის ქვემდებარეა ფსიქოლოგის სამსახური. მათ შეუძლიათ სკოლებში ჩაატარონ როგორც თეორიული, ასევე პრაქტიკული სავარჯიშოები, ბავშვების ცნობიერების დონე აამაღლონ, საჭიროების შემთხვევაში ფსიქოლოგების ჯგუფმა ბავშვებთან იმუშაონ. ამ გზით მოსწავლეებს აუხსნიან რა არის ბულინგი, არ დაჩაგროს სხვა, ჰქონდეს განსხვავებულის მიმღებლობა. პრობლემა სისტემურია, კომპლექსური. საჭიროებს აქტიურ გაშუქებებს მედიის მხრიდან, რადგან საქმე ეხება ბავშვებს, მათ ფსიქიკას და მომავალს.

რაც შეეხება მე-11 პრინციპის დარღვევას, ამ ნაწილში მიმაჩნია, რომ არ დამირღვევია არასრულწლოვნების ინტერესი, რადგან სიუჟეტში მათი იდენტიფიცირება შეუძლებელია, ბავშვები გადაღებულია ზურგიდან, მათი სახეები დაფარულია, ხმები შეცვლილი. ამიტომ ვთვლი, რომ ამ ნაბიჯით რომელიმე ბავშვის ინტერესი არ დამირღვევია.  არც ზიანი მივაყენე.

საქართველოს ჟურნალისტური ეთიკის ქარტიისა და ორგანიზაცია „ქალები საერთო მომავლისთვის - საქართველო” (WECF) ერთობლივი ძალისხმევის შედეგად, შემუშავდა ფემიციდის გაშუქების საერთო სტანდარტისა და მისი განხორციელებისთვის საჭირო რეკომენდაციების შემცველი მემორანდუმი. აღნიშნული დოკუმენტი ღიაა ხელმოსაწერად მედიის ნებისმიერი წარმომადგენლისთვის. 

საქართველოს ჟურნალისტური ეთიკის ქარტიისა და WECF Georgia-ს ურთიერთთანამშრომლობა მიზნად ისახავდა შემუშავებულიყო ერთიანი შიდა სტანდარტი, რომელიც ხელმომწერი მედიების სარედაქციო პოლიტიკის ნაწილი გახდება და დაეხმარება ჟურნალისტებს ეთიკურ გაშუქებაში.

დოკუმენტზე ხელმომწერ მედია ორგანიზაციებსა და ჟურნალისტებს, გააზრებული აქვთ პასუხისმგებლობა და თანხმდებიან ფუნდამენტურ და ფაქტობრივ მოცემულობებზე, რაც პირდაპირ კავშირშია ეთიკურ პასუხისმგებლობასთან, სიზუსტესა და სენსიტიურ გაშუქებასთან. 

დოკუმენტი შეგიძლიათ ნახოთ აქ 

ხელმომწერები არიან: 

NEWS. On.ge

გურია NEWS

ნეტგაზეთი 

მედია აპრილი 

ტელეკომპანია კავკასია 

JAMnews

რადიო მარნეული 

ჩაიხანა 

AT.GE 

ტაბულა 

მთავარი არხი 

პალიტრა მედია 

მედიაჩეკერი 

Project 64 

სტუდია მონიტორი 

JRC 

კახეთის ხმა 

QARTLI.GE

სამხრეთის კარიბჭე 

ტვ მონიტორინგი 

ფორმულა 

პუბლიკა 

TV9NEWS.GE 

ტვ ზარი 

TOK TV 

საქართველოს რეგიონულ მაუწყებელთა ალიანსი

ნინო ზაუტაშვილი 

საქართველოს ჟურნალისტური ეთიკის ქარტიის სამდივნომ Georgian Press-ის ჟურნალისტის წინააღმდეგ განცხადება დასაშვებად ცნო, განმცხადებელია ესმა გუმბერიძე. 

სადავო მასალა 2023 12 დეკემბერს გამოქვეყნდა. 

განმცხადებლის პოზიციით, ჟურნალისტმა ინფორმაცია არასწორად გააშუქა და არ გადაამოწმა, ამასთან, არ მოიძია ბრალდებაზე საპასუხო პოზიცია. 

განმცხადებელი დავობს ქარტიის პირველი (ინფორმაციის სიზუსტე) და მესამე (დადასტურებული წყარო) პრინციპის დარღვევაზე. 

ქარტიის საბჭო განცხადებებს ღია სხდომაზე განიხილავს და გადაწყვეტს დაირღვა თუ არა ქარტიის პრინციპები.

მედიის ადვოკატირების კოალიცია ეხმიანება საზოგადოებრივი მაუწყებლის ხელმძღვანელობის გადაწყვეტილებას, დახუროს სხვადასხვა გადაცემა საზოგადოებასთან სათანადო კომუნიკაციისა და ახსნა-განმარტების გარეშე. აღნიშნული შემთხვევა ერთგვარი გაგრძელებაა საზოგადოებრივი მაუწყებლის გარშემო განვითარებული მოვლენებისა, რომელიც კიდევ უფრო აძლიერებს შეფასებას, რომ მაუწყებელი მმართველი პარტიის, „ქართული ოცნების”, ზეგავლენის ქვეშ არის, ვერ ასრულებს მასზე დაკისრებულ მისიას, იყოს პოლიტიკურად ნეიტრალური, ობიექტური და მიუკერძოებელი მედია, და ის 2024 წლის საპარლამენტო არჩევნებს მოუმზადებელი ხვდება. 

საზოგადოებრივი მაუწყებლის ხელმძღვანელობის გადაწყვეტილებით დაიხურა რამდენიმე გადაცემა, კერძოდ: „დღის კოდი“, „ფერმა“, „თავისუფალი ხედვა გიორგი გვიმრაძესთან ერთად“, „ჰოპლა, ჩვენ ვცოცხლობთ,“ „ნატალიასთან და დათუნასთან ერთად“, „კაცები”, არხი „ტელესკოლა“ და „გორგილაძის აუტანელი სიმსუბუქე". აღნიშნული გადაწყვეტილება მენეჯმენტმა საზოგადოებისთვის  შესაბამისი განმარტების გარეშე მიიღო. მოგვიანებით გავრცელებულ განცხადებაში მენეჯმენტმა აღნიშნა, რომ ცვლილებები ფინანსური რესტრუქტირაზაციის გამო ხორციელდებოდა და “... რომელიმე გადაცემის ირგვლივ საკითხის პოლიტიზება” არ უნდა მომხდარიყო. საგულისხმოა, რომ პასუხგაუცემელია თუ რატომ სახელდება ფინანსური რესტრუქტურიზაცია გადაცემების დახურვის მთავარ მიზეზად, რატომ ხდება ეს 2024 წელს, მაშინ როცა მაუწყებლის დაფინანსების არსებული მოდელი და ბიუჯეტი ორი წელი მნიშვნელოვნად არ შეიცვლება. ასევე, თუკი საკითხი ფინანსურია, რატომ არ შეთანხმდა „რესტრუქტურიზაციით” გამოწვეული დახურვა სამეურვეო საბჭოსთან. ფაქტია, რომ საზოგადოებრივმა მაუწყებელმა მორიგ ჯერზეც არ და ვერ შეძლო ანგარიშვალდებულების მინიმალური სტანდარტის დაკმაყოფილება. კრიტიკული იყო საზოგადოების დამოკიდებულება, მათ შორის, გორგილაძის გადაცემის დახურვასთან დაკავშირებით, რომელიც საზოგადოებაში ცნობილია საკუთარი კრიტიკული შეფასებებით „ქართული ოცნების” ცალკეული გადაწყვეტილებების მიმართ, როგორიც იყო, მაგალითად, „რუსული კანონის” მიღება. 

საზოგადოებრივი მაუწყებლის დამოუკიდებლობა სახელმწიფო უწყებებისაგან, ასევე პოლიტიკური და არსებითი კომერციული გავლენისაგან საქართველოს კონსტიტუციით არის გარანტირებული. მაუწყებლის პროგრამები უნდა იყოს მიუკერძოებელი, ობიექტური და პლურალისტური, რომელიც საქართველოს საზოგადოებრივ ინტერესებს ემსახურება და დემოკრატიულ დისკურსს უწყობს ხელს. გამჭვირვალობისა და სათანადო განმარტებების გარეშე პროგრამების დახურვა, განსაკუთრებით იმ გადაცემებისა, რომელთა ავტორები ხელისუფლების მიმართ კრიტიკული დამოკიდებულებით გამოირჩევიან, ამცირებს მაუწყებლის მიმართ ნდობის ხარისხს და ამყარებს ეჭვებს მის პოლიტიკურ მიკერძოებულობასთან დაკავშირებით.

კოალიცია შეშფოთებით აღნიშნავს იმ მოვლენებს, რომლებიც წინ უძღოდა პროგრამის დახურვას, როგორებიცაა მმართველი პარტია „ქართული ოცნების” მიერ აჭარის ტელევიზიის მრჩეველთა საბჭოს გაუქმება და მცდელობა,  შეეცვალა დაფინანსების მოდელი, რომელიც მიზნად ისახავდა ტელევიზიის მთავრობაზე დამოკიდებულების გაზრდას. მართალია, აღნიშნული გადაწყვეტილება არ იყო სისრულეში მოყვანილი და საბოლოოდ სხვა მოდელზე მოხდა შეთანხმება. თუმცა, აღნიშნული გადაწყვეტილებაც არ იყო საჯარო დისკუსიის და ფართო კონსენსუსის საგანი. 

საზოგადოებრივი მაუწყებლის მენეჯმენტისა და მმართველი პარტიის დამოკიდებულებამ და ქმედებებმა ნოყიერი ნიადაგი შექმნეს მაუწყებელში ხელისუფლების სასარგებლო პოლიტიკური ჩარევისა და მანიპულაციისთვის. ტელევიზია არ ფუნქციონირებს, როგორც ჭეშმარიტად დამოუკიდებელი და ანგარიშვალდებული მედია, არის ხელისუფლების ზეგავლენის ქვეშ და ეს განსაკუთრებით საშიშია იმ ფონზე, როდესაც ვუახლოვდებით კრიტიკულ 2024 წლის საპარლამენტო არჩევნებს.

კოალიცია მოუწოდებს საზოგადოებრივი მაუწყებლის გენერალურ დირექტორს და სამეურვეო საბჭოს, უზრუნველყოს მაუწყებლის პლურალისტური და ობიექტური საინფორმაციო პოლიტიკა, მედიის საქმიანობის გამჭვირვალობა, რეალური ანგარიშვალდებულება საზოგადოების მიმართ და მისი მონაწილეობა დიალოგში. 

კოალიცია, ასევე,  მოაწოდებს მმართველ პარტია „ქართულ ოცნებას”, შეწყვიტოს ტელევიზიის საქმიანობაში ჩარევა, საზოგადოებრივი მაუწყებლის იდეის დისკრედიტაცია და ხელი შეუწყოს პლურალისტურ გარემოს შექმნას ქვეყანაში.

საქართველოს ჟურნალისტური ეთიკის ქარტიის სამდივნომ TV მონიტორინგის და TV პირველის ჟურნალისტების წინააღმდეგ განცხადებები დასაშვებად ცნო, განმცხადებელია ააიპ საზოგადოება ბილიკი. 

სადავო მასალები TV პირველის ეთერში 2023 წლის 5 ნოემბერს გავიდა ეთერში, სადავო მასალა TV მონიტორინგის ეთერში 2023 წლის 31 ოქტომბერს გავიდა ეთერში. 

განმცხადებლის პოზიციით, ჟურნალისტებმა ინფორმაცია არასწორად გააშუქეს და არ გადაამოწმეს. 

განმცხადებელი დავობს ქარტიის პირველი (ინფორმაციის სიზუსტე) და მერვე (ბავშვთა უფლებები) პრინციპის დარღვევაზე. 

ქარტიის საბჭო განცხადებებს ღია სხდომაზე განიხილავს და გადაწყვეტს დაირღვა თუ არა ქარტიის პრინციპები.

ქარტიის საბჭოს თავმჯდომარე ნანა ბიგანიშვილი გახდა, მან ამ პოზიციაზე ხატია ღოღობერიძე შეცვალა. ნანა ბიგანიშვილი ქარტიის საბჭოს ერთი წლის ვადით უხელმძღვანელებს.

ნანა ბიგანიშვილი ქარტიის საბჭოს თავმჯდომარე იყო 2018-2020 წლებშიც. 

მან დაამთავრა თბილისის ივ. ჯავახიშვილის სახელმწიფო უნივერსიტეტის სოციალური ფსიქოლოგიის ფაკულტეტი ( 2001).

2002 წელს საგამოძიებო ჟურნალისტიკის სკოლის დამთავრების შემდეგ მუშაობა გაზეთში „ახალ ვერსია” გააგრძელა რეპორტიორად. 2003 წლიდან სამაუწყებლო კომპანია „რუსთავი 2”- ის გადაცემის „60 წუთი” ჟურნალისტი იყო. 2006 – 2007 წელს მუშაობდა გადაცემაში „ბიზნესკურიერი“ ჟურნალისტად. 2005 წლიდან დღემდე არის „სტუდია მონიტორის” ერთ-ერთი დამფუძნებელი და გამგეობის წევრი.

2012 წელს ჟურნალისტური გამოძიებისთვის „გაუმჭვირვალე რეაბილიტაცია” დაჯილდოვდა კოლუმბიის უნივერსიტეტის პროფესორის ჯოშუა ფრიდმანისა და GIPA-ს მთავარი პრიზით.

საქართველოს ჟურნალისტური ეთიკის ქარტიის საბჭოს წევრად აირჩიეს 2023 წლის 9 დეკემბერს, ქარტიის წევრთა საერთო კრებაზე.