სიახლეები
საქართველოს ჟურნალისტური ეთიკის ქარტიის საბჭო 6 ივლისს 2 საქმეს ონლაინ განიხილავს:
18:00 საათი: ნინო კალანდია „POSTV"-ს ჟურნალისტის გური სულთანიშვილის წინააღმდეგ
სადავო მასალა 2023 წლის 30 მაისს გავიდა ეთერში.
განმცხადებლის პოზიციით, სადავო მასალაში გავრცელებული ინფორმაცია დისკრიმინაციულია შშმ პირების მიმართ და ახალისებს სიძულვილის ენას.
განმცხადებელი დავობს ქარტიის მეშვიდე (დისკრიმინაცია) პრინციპის დარღვევაზე.
18:00 საათი: მიშა მშვილდაძე ტელეკომპანია „იმედის" ჟურნალისტების ხატია ქვათაძის და გიორგი აბაზაძის წინააღმდეგ
სადავო მასალა 2023 წლის 22 მაისს გამოქვეყნდა.
განმცხადებლის პოზიციით, ჟურნალისტებმა ინფორმაცია არასწორად, კონტექსტიდან ამოჭრილად და მანიპულაციურად გააშუქეს.
განმცხადებელი დავობს ქარტიის პირველი (ინფორმაციის სიზუსტე), მეხუთე (შესწორება) და მეთერთმეტე (ფაქტის განზრახ დამახინჯება) პრინციპის დარღვევაზე.
სხდომა გაიმართება ონლაინ, პროგრამა Zoom-ის მეშვეობით. მასზე დასწრების მსურველებმა შეგიძლიათ მოთხოვნა გამოაგზავნოთ ელექტრონულ ფოსტაზე - ethicscharter@gmail.com
საქმის განხილვა ღიაა და ნებისმიერ მსურველს შეუძლია დასწრება.
05.07.2023
დღეს ზუსტად ორი წელი გავიდა მას
შემდეგ, რაც ღირსების მარშის წინააღმდეგ გამართულ აქციაზე ძალადობრივი
ჯგუფის წევრები მედიის წარმომადგენლებს დაესხნენ თავს, მიაყენეს
ფიზიკური და სიტყვიერი შეურაცხყოფა და დაუზიანეს ტექნიკა. მოძალადეები
თავს დაესხნენ თბილისი პრაიდის, სირცხვილიას და ადამიანის უფლებათა
სახლის ოფისებსაც.
ამ დღეს მედიის 50-ზე მეტი
წარმომადგენელი დაშავდა, მათ შორის იყო TV პირველის ოპერატორი, ლექსო
ლაშქარავა, რომელიც 2021 წლის 11 ივლისს გარდაიცვალა.
ქარტია მიიჩნევს, რომ 2021 წლის 5
ივლისს ხელისუფლებამ არ უზრუნველყო მედიის წარმომადგენლების დაცვა და
მოქალაქეების გამოხატვის თავისუფლება. უფრო მეტიც, საქართველოს
პრემიერმინისტრმა, ირაკლი ღარიბაშვილმა მისი განცხადებით მწვანე შუქი
აუნთო მოძალადეებს.
ამასთან, ეს საქმეები სათანადოდ არ
არის გამოძიებული. პროკურატურის წარმომადგენლების მიერ ერთ-ერთ
შეხვედრაზე გაჟღერებული ინფორმაციის თანახმად, პასუხისგებაში მიეცა 21
პირი, მიუხედავად იმისა, რომ საზოგადოება პირდაპირ ეთერში
უყურებდა, როგორ ძალადობდნენ სხვადასხვა პირები ჯგუფურად.
აღსანიშნავია, რომ დღემდე არ არიან
პასუხისგებაში მიცემული ძალადობის ორგანიზატორები, რომელთა ვინაობაც
საზოგადოებისთვის ცნობილია და რომლებიც დღესაც პირდაპირ ეთერში ჩადიან
დანაშაულს და მოუწოდებენ ხალხს ძალადობისკენ.
ხელისუფლების წარმომადგენლები
აგრძელებენ აგრესიული რიტორიკითა და სიძულვილის ენით საუბარს, კვლავაც
გამოუძიებელია მედიის წარმომადგენლებზე თავდასხმის ათობით საქმე.
ასეთი მიდგომა კიდევ უფრო მეტად ახალისებს ძალადობას.
ქარტია მიიჩნევს, რომ
ჟურნალისტების უსაფრთხოების მხრივ საქართველოში საგანგაშო ვითარებაა
და მოუწოდებს ხელისუფლებას, დაუყოვნებლივ გადადგას ქმედითი ნაბიჯები
მედიაგარემოს გაჯანსაღებისთვის.
05.07.2023
მედიის ადვოკატირების კოალიცია
მკაცრად გმობს "ქართული ოცნების" მიერ მიღებულ
კანონს, რომელიც, მათ შორის, აჭარის ტელევიზიის მრჩეველთა საბჭოს
გაუქმებას ისახავს მიზნად. კანონი ძირს უთხრის საზოგადოებრივი
მაუწყებლის დამოუკიდებლობისა და გამოხატვის თავისუფლების პრინციპებს,
რომლებიც ნებისმიერი დემოკრატიული საზოგადოების ქვაკუთხედია.
შესაბამისად, მოვუწოდებთ საქართველოს პრეზიდენტს ვეტო დაადოს აღნიშნულ
კანონს.
მმართველი პარტიის მიერ რამდენიმე
კვირის წინ ყოველგვარი დასაბუთების გარეშე
ინიცირებული იყო კანონპროექტი, რომლის მიხედვითაც, მათ შორის,
სამეურვეო საბჭოს წევრთა რაოდენობა იზრდებოდა 9-დან 11-მდე, უქმდებოდა
სამეურვეო საბჭოს წევრად ერთ ვადაზე მეტი ხნით არჩევის აკრძალვა,
იზრდებოდა სამეურვეო საბჭოს თავმჯდომარისა და მოადგილის
უფლებამოსილების ვადები და ა.შ. აღნიშნული კანონპროექტი არ პასუხობდა
საზოგადოებრივი მაუწყებლის წინაშე დღეს არსებულ გამოწვევებს და
აგრძელებდა ხელისუფლების მიერ საზოგადოებრივი მაუწყებლის მიტაცების
პროცესს. გასულ კვირას კი მმართველმა პარტიამ დამატებითი ცვლილებები
შეიტანა დოკუმენტში, რომლის მიხედვით უქმდება აჭარის ტელევიზიის
მრჩეველთა საბჭო და მის კომპეტენციებს საზოგადოებრივი მაუწყებლის
სამეურვეო საბჭო ითავსებს. სამეურვეო საბჭოს წევრთა რაოდენობა 9
დან 11-მდე იზრდება, და აჭარის ავტონომიური რესპუბლიკის უმაღლეს
საბჭოს ერთის ნაცვლად სამი კანდიდატის დასახელების უფლებამოსილება
ენიჭება.
მედიის ადვოკატირების კოალიციას
მტკიცედ სჯერა, რომ მაშინ, როცა გამოწვევაა პოლარიზაცია და
დეზინფორმაცია, დამოუკიდებელი საზოგადოებრივი მაუწყებლის როლი
საზოგადოებისთვის მიუკერძოებელი და მრავალფეროვანი შინაარსის
მიწოდებაში გადამწყვეტია. მმართველი გუნდის არსებული პოლიტიკა და
ნაბიჯები კი, პირიქით, მიმართულია კერძო მედიისა და საზოგადოებრივი
მაუწყებლის კონტროლისაკენ და მათი პოლიტიკური მიზნებისთვის
გამოსაყენებლად.
ზემოაღნიშნულიდან გამომდინარე,
მედიის ადვოკატირების კოალიცია მოუწოდებს საქართველოს პრეზიდენტს
სალომე ზურაბიშვილს, ისარგებლოს კონსტიტუციით გარანტირებული უფლებით
და ვეტო დაადოს აღნიშნულ კანონს და ამით მხარი დაუჭიროს დამოუკიდებელი
და თავისუფალი საზოგადოებრივი მაუწყებლის პრინციპებს.
ასევე მოვუწოდებთ მმართველ
პარტიას, არ დაძლიოს ვეტო და საკუთარი ძალისხმევა და პოლიტიკა
წარმართოს თავისუფალი, უსაფრთხო და პლურალისტური მედია გარემოს
შესაქმნელად, რაც ხელისუფლების კონსტიტუციურ და კონვენციურ
ვალდებულებას წარმოადგენს.
04.07.2023
საქართველოს ჟურნალისტური ეთიკის
ქარტია მიიჩნევს, რომ აჭარის ტელევიზიისა და რადიოს მრჩეველთა საბჭოს
გაუქმება და საზოგადოებრივი მაუწყებლის სამეურვეო საბჭოს წევრების
9-დან 11-მდე გაზრდა ხელს შეუწყობს საზოგადოებრივი მაუწყებლის
სახელმწიფო ტელევიზიად ჩამოყალიბებას.
„მაუწყებლობის შესახებ“
საქართველოს კანონში განხორციელებული ცვლილებები თავდაპირველად
სამეურვეო საბჭოს წევრთა რაოდენობის 9-დან 11-მდე გაზრდას, სამეურვეო
საბჭოს წევრად ერთ ვადაზე მეტი ხნით არჩევის აკრძალვას, სამეურვეო
საბჭოს თავმჯდომარის და მოადგილის უფლებამოსილების ვადების გაზრდასა
და საზოგადოებრივი მაუწყებლის თანამშრომლების აჭარის ტელევიზიაში
დასაქმებას ითვალისწინებდა.
მოგვიანებით, კანონპროექტში შევიდა
ცვლილებები, რომლებიც, ზემოთ ხსენებულ პრობლემურ საკითხებთან ერთად,
ითვალისწინებს აჭარის ტელევიზიისა და რადიოს სამეთვალყურეო საბჭოს
გაუქმებას. აღნიშნული კი არსებული საზოგადოებრივი მაუწყებლის მოწყობის
პრინციპებს ეწინააღმდეგება და აჭარის ტელევიზიას საზოგადოებრივ
მაუწყებელს უქვემდებარებს.
ამასთან, სამეურვეო საბჭოს წევრთა
რაოდენობის 9-დან 11-მდე გაზრდით, მმართველ პარტიას ეყოლება მის მიერ
დასახელებული უმრავლესობა სამეურვეო საბჭოში, რაც ხელს შეუწყობს
საზოგადოებრივი მაუწყებლის სახელმწიფო ტელევიზიად
ჩამოყალიბებას.
პრობლემურია განხილვის პროცესიც.
მეორე მოსმენამდე საზოგადოებისთვის ცნობილი არ ყოფილა მრჩეველთა
საბჭოს გაუქმებასთან დაკავშირებით. კანონის მიღება მოხდა სწრაფად და
საზოგადოებას არ ჰქონია შესაძლებლობა, ჩართულიყო შეცვლილი
კანონპროექტის განხილვაში.
საქართველოს ჟურნალისტური ეთიკის
ქარტია მოუწოდებს საქართველოს პრეზიდენტს, ვეტო დაადოს „მაუწყებლობის
შესახებ“ საქართველოს კანონში განხორციელებულ ცვლილებებს.
03.07.2023
გავრცელებული ინფორმაციის თანახმად, კასპში, ქართული ოცნების მხარდამჭერებმა მთავარი არხის ჟურნალისტს, გიორგი ახალკაცს პირდაპირ ეთერში სიტყვიერი შეურაცხყოფა მიაყენეს.
საქართველოს ჟურნალისტური ეთიკის ქარტია მოუწოდებს შესაბამის უწყებებს, გააცნობიერონ თავიანთი ვალდებულება და უზრუნველყონ მედიასაშუალებებისთვის უსაფრთხო სამუშაო გარემო.
ქარტიას არაერთხელ განუცხადებია, რომ ბოლო პერიოდში ჟურნალისტებზე გახშირებული თავდასხმების გამომწვევი ფაქტორები მედიის წარმომადგენლების მიმართ ჩადენილი დანაშაულების გაჭიანურებული და გამოუძიებელი საქმეებია. ასევე, თავდასხმები გამოწვეულია მმართველი პარტიის წარმომდგენლების აგრესიული დამოკიდებულებით ჟურნალისტების მიმართ.
30.06.2023
გავრცელებული ინფორმაციით, 2023
წლის 30 ივნისს, „ქართული ოცნების” დეპუტატმა, ლევან მგალობლიშვილმა
TV პირველის ჟურნალისტ ნანუკა ქაჯაიას სიტყვიერი შეურაცხყოფა მიაყენა.
მოგვიანებით, დეპუტატმა უარყო, რომ ჟურნალისტს აგინა.
აღსანიშნავია, რომ ეს არ არის
პირველი შემთხვევა, როდესაც მმართველი პარტიის წარმომადგენლები ქალ
ჟურნალისტებს თავს ესხმიან.
საქართველოს ჟურნალისტური ეთიკის
ქარტიას არაერთხელ განუცხადებია, რომ მედიაზე თავდასხმის გახშირებული
ფაქტების გამომწვევი ერთ-ერთი ფაქტორი სწორედ მმართველი პარტიის
წარმომადგენლების მხრიდან მედიასთან მსგავსი
დამოკიდებულებაა.
საქართველოს ჟურნალისტური ეთიკის
ქარტია მოუწოდებს პარლამენტის ეთიკის საბჭოს, შეისწავლოს აღნიშნული
ფაქტი და მოახდინოს შესაბამისი რეაგირება.
30.06.2023
მედიით გავრცელებული
ინფორმაციის
თანახმად, 29 ივნისს, კომიტეტის სხდომაზე, სადაც
კინემატოგრაფისტებმა საპროტესტო პერფორმანსი გამართეს, მედიის
წარმომადგენლები არ დაუშვეს. შედეგად, მათ არ მიეცათ შესაძლებლობა,
გადაეღოთ პროტესტის ამსახველი მასალა.
ეს არ არის პირველი შემთხვევა,
როცა აკრედიტებული ჟურნალისტები პარლამენტში თავიანთი მოვალეობების
შესრულებისას დაუსაბუთებელ დაბრკოლებებს აწყდებიან. მედიის
ადვოკატირების კოალიცია მიიჩნევს რომ ეს საგანგაშო ინციდენტი სერიოზულ
შეშფოთებას იწვევს საკანონმდებლო ორგანოში გამჭვირვალობასა და
დემოკრატიულ ღირებულებებთან დაკავშირებით. სამწუხაროა, რომ
საქართველოს პარლამენტი გახდა ქვეყანაში მედიის შეზღუდვის ერთ-ერთი
სიმბოლო.
მსგავს კრიტიკულ პროცესებზე მედიის
ხელმისაწვდომობის შეზღუდვით, პარლამენტი ზღუდავს საზოგადოების
კონტროლს, ხელს უშლის მოსახლეობას ინფორმირებულობას და ართმევს
შესაძლებლობას ჩაერთოს დემოკრატიულ პროცესში.
მედიის ადვოკატირების კოალიცია
მოუწოდებს საქართველოს პარლამენტის თავმჯდომარეს, ბატონ შალვა
პაპუაშვილს, უზრუნველყოს სათანადო სამუშაო პირობები მედიის
წარმომადგენლებისთვის. საქართველოს პარლამენტი ვალდებულია პატივი სცეს
პრესის თავისუფლებას, რომელიც აღიარებულია ეროვნული და საერთაშორისო
კანონებით.
30.06.2023
მედიის ადვოკატირების კოალიცია
ეხმიანება მმართველი პარტიის მიერ შემოთავაზებულ ცვლილებებს
“მაუწყებლობის შესახებ” კანონში, რომელიც ბევრ სადაო მუხლთან ერთად
აჭარის ტელევიზიის მრჩეველთა საბჭოს გაუქმებას ითვალისწინებს.
აღნიშნული კანონპროექტი ცალსახად ეწინააღმდეგება საზოგადოებრივი
მაუწყებლის ფუნდამენტურ პრინციპებს, გამოუსწორებელ ზიანს აყენებს
ქვეყანაში საზოგადოებრივი მაუწყებლის არსებულ მოდელს და სამეურვეო
საბჭოს თავმჯდომარის ვასილ მაღლაფერიძის ძალაუფლების განმტკიცებას
ემსახურება.
მმართველი პარტიის მიერ რამდენიმე
კვირის წინ საჯარო დისკუსიისა და ყოველგვარი დასაბუთების გარეშე
ინიცირებული იყო კანონპროექტი, რომლის
მიხედვითაც, მათ შორის, სამეურვეო საბჭოს წევრთა რაოდენობა იზრდებოდა
9-დან 11-მდე, უქმდებოდა სამეურვეო საბჭოს წევრად ერთ ვადაზე მეტი
ხნით არჩევის აკრძალვა, იზრდებოდა სამეურვეო საბჭოს თავმჯდომარისა და
მოადგილის უფლებამოსილების ვადები და ა.შ. აღნიშნული კანონპროექტი
კრიტიკულად იყო შეფასებული მედიისა და სამოქალაქო სექტორის მიერ,
ვინაიდან ის არ პასუხობდა საზოგადოებრივი მაუწყებლის წინაშე დღეს
არსებულ გამოწვევებს და აგრძელებდა ხელისუფლების მიერ საზოგადოებრივი
მაუწყებლის მიტაცების პროცესს. ნაცვლად იმისა, რომ არსებული
კანონპროექტი გაეწვია, “ქართულმა ოცნებამ” კანონპროექტში დამატებითი
ცვლილებები შეიტანა, რომლის მიხედვით აჭარის ტელევიზიის მრჩეველთა
საბჭო
უქმდება და მის კომპეტენციებს საზოგადოებრივი მაუწყებლის
სამეურვეო საბჭო ითავსებს. სამეურვეო საბჭოს წევრების რაოდენობა
9 დან 11-მდე იზრდება, და აჭარის ავტონომიური რესპუბლიკის უმაღლეს
საბჭოს ერთის ნაცვლად სამი კანდიდატის დასახელების უფლებამოსილება
ენიჭება.
აჭარის ტელევიზიის შექმნა თავის
დროზე მნიშვნელოვან პროგრესულ ნაბიჯად იქნა მიჩნეული და დადებითად
შეფასდა ადგილობრივი და საერთაშორისო საზოგადოების მიერ. ნათია
კაპანაძის ხელმძღვანელობით ტელევიზიამ ცალსახად პროგრესი განიცადა
და ის პოლარიზებულ მედია სივრცეში მიუკერძოებელი და ობიექტური
სარედაქციო პოლიტიკით გამოირჩეოდა. “ქართული ოცნებისთვის” მიუღებელი
აღმოჩნდა ნეიტრალური ტელევიზიის არსებობა. ჯერ დაუსაბუთებლად
გაათავისუფლეს ნათია კაპანაძე, შემდეგ კი, როცა უკვე ტელევიზიას
გიორგი კოხრეიძე ხელმძღვანელობდა, დაიწყო კრიტიკული ჟურნალისტების
დევნა, შევიწროება და
გათავისუფლება. დღეს მმართველი პარტია უპრეცედენტოდ ამცირებს
აჭარის ტელევიზიის დამოუკიდებლობის ხარისხს, აუქმებს რა ადგილობრივ
მრჩეველთა საბჭოს.
შემოთავაზებული
კანონპროექტი ეწინააღმდეგება დემოკრატიის ძირითად ღირებულებებს და
იმ პრინციპებს, რომლებზეც დაფუძნებულია საზოგადოებრივი მაუწყებლის
ევროპული მოდელი. მმართველი პარტიის მფარველობით განხორციელებულმა
ქმედებებმა აჭარის ტელევიზიის ჟურნალისტების დევნის კუთხით უკვე
შეარყია ნდობა მედიაგარემოს მიმართ. ეს უკანასკნელი შემოთავაზებული
ცვლილება მხოლოდ ამძაფრებს ამ საკითხს, კიდევ უფრო ზღუდავს მედიის
მრავალფეროვნებას და აძლიერებს ხელისუფლების კონტროლს
საზოგადოებისთვის ხელმისაწვდომ ინფორმაციაზე. თავისუფალი და
დამოუკიდებელი საზოგადოებრივი მაუწყებელი აუცილებელია ნებისმიერი
დემოკრატიის ფუნქციონირებისთვის. კონსტიტუციური ორგანიზაცია დაცული
უნდა იყოს პოლიტიკური ჩარევისგან, რაც მას საშუალებას მისცემს
ავტონომიურად იმოქმედოს და ემსახუროს საზოგადოებრივ
ინტერესებს.
მედიის ადვოკატირების კოალიცია
მოუწოდებს მმართველ პარტიას გაითვალისწინოს ის პოტენციური მძიმე
შედეგები, რაც ამ ცვლილებას შეიძლება მოჰყვეს, როგორც დემოკრატიის
პრინციპების, ასევე საზოგადოებრივი მაუწყებლებისთვის შესაძლებლობის,
სრულფასოვნად შეასრულონ თავიანთი ფუნქცია, შეზღუდვით. “ქართულმა
ოცნებამ” სასწრაფოდ უნდა გაიწვიოს აღნიშნული კანონპროექტი და ამგვარი
რეგრესული ინიციატივების წამოყენების ნაცვლად, გადადგას ნაბიჯები
ევროკავშირის 12 რეკომენდაციის და, კონკრეტულად, მედიასთან
დაკავშირებული პუნქტების შესასრულებლად.
29.06.2023
მედიის ადვოკატირების კოალიცია
პოზიტიურად აფასებს საქართველოს პარლამენტის მიერ 28 ივნისს
„მაუწყებლობის შესახებ“ კანონში ცვლილებების, რომლებიც, სხვა
საკითხებთან ერთად, პასუხის უფლებას, მარეგულირებლის გადაწყვეტილების
დაუყოვნებლივ აღსრულებასა და სიძულვილის ენის რეგულირებას შეეხება,
პირველი მოსმენით
მიღებას. მნიშვნელოვანია, რომ “მმართველმა პარტიამ” ამჯერად
გაითვალისწინა როგორც ევროპის საბჭოს დამოუკიდებელი ექსპერტების,
ასევე მედიისა და სამოქალაქო სექტორის წარმომადგენლების
რეკომენდაციები.
აუდიოვიზუალური მედიის სფეროში
სიძულვილის ენის, პასუხის უფლებისა თუ კომუნიკაციების კომისიის
გადაწყვეტილების დაუყოვნებლივი აღსრულების საკითხები მნიშვნელოვან
გამოწვევას წარმოადგენდა.
სამწუხაროდ, პარლამენტმა 2022 წლის დეკემბერში “მაუწყებლობის
შესახებ” კანონში აღნიშნულ საკითხებთან დაკავშირებული ცვლილების
მიღებისას მედიის და სამოქალაქო სექტორის ლეგიტიმური მოსაზრებები არ
გაითვალისწინა.
ევროპის კავშირთან ასოცირების
შეთანხმების საფუძველზე საქართველოს აუდიოვიზუალური მედიის
მომსახურების დირექტივის იმპლემენტაციის ვალდებულება ჰქონდა აღებული,
რომელიც სხვადასხვა საკითხთან ერთად სიძულვილის ენის რეგულაციას
ითვალისწინებდა. სამოქალაქო და მედიის სექტორის წარმომადგენლები
ემხრობოდნენ აღნიშნული საკითხის მოწესრიგებას თანარეგულაციის
პრინციპების გათვალისწინებით, რაც თანხვედრაშია ევროპულ
დირექტივასთან. აღნიშნულ პოზიციას იზიარებენ
ევროპის საბჭოს დამოუკიდებელი ექსპერტებიც, მიიჩნევდნენ რა მას,
ქვეყანაში არსებული კონტექსტის გათვალისწინებით, ეფექტურ გზად
სიძულვილის ენის წინააღმდეგ საბრძოლველად. კოალიციამ და მედია
საშუალებებმა ალტერნატიული კანონპროექტიც კი მოამზადეს ამ საკითხთან
დაკავშირებით, რომელიც, სამწუხაროდ, მმართველმა პარტიამ გასული წლის
დეკემბერში ცვლილებების მიღებისას არ გაითვალისწინა. მედიის
წარმომადგენლებისთვის პრობლემური იყო ასევე მარეგულირებლის
გადაწყვეტილების დაუყოვნებლივ აღსრულებისა და პასუხის უფლების
საკითხებიც. ჯერ კიდევ ვენეციის კომისია კრიტიკულად აფასებდა
“ელექტრონული კომუნიკაციების შესახებ” კანონში მსგავს დებულებას და
პარლამენტს მისი გაუქმებისაკენ მოუწოდებდა. არსებული
კანონპროექტი კი კომპრომისულ ვერსიას შეიცავს, რომელიც მნიშვნელოვნად
აზღვევს იმ რისკებს, რომელიც შეიძლება პრაქტიკაში
წარმოიშვას.
მისასალმებელია საქართველოს
პარლამენტის მიერ 28 ივნისს პირველი მოსმენით მიღებული
კანონპროექტი, რომელიც მედიის, სამოქალაქო სექტორისა და
ევროპის საბჭოს დამოუკიდებელი ექსპერტების მიერ შეთავაზებულ
რეკომენდაციას ემყარება. აღნიშნული ცვლილება პოზიტიურ წვლილს შეიტანს
ევროინტეგრაციის პროცესში. ასევე მნიშვნელოვანია, რომ კომუნიკაციების
კომისიამ დაჩქარებულად, მედიისა და სამოქალაქო სექტორის სრულყოფილი
ჩართულობით, მიიღოს შესაბამისი ცვლილებები მაუწყებელთა “ქცევის
კოდექსში”, ეფექტური თანარეგულაციის მექანიზმის
შესაქმნელად.
29.06.2023
გავრცელებული ინფორმაციის თანახმად, ფორმულას ერთ-ერთ
დამფუძნებელს, მიშა მშვილდაძეს უცნობი პირი თავს დაესხა და ფიზიკურად
გაუსწორდა.
საქართველოს ჟურნალისტური ეთიკის ქარტია მოუწოდებს საგამოძიებო
უწყებებს, დროულად და ეფექტიანად გამოიძიონ მიშა მშვილდაძეზე
თავდასხმის ფაქტი.
ქარტია კიდევ ერთხელ აცხადებს, რომ ბოლო პერიოდში მედიის
წარმომადგენლებზე გახშირებული თავდასხმების გამომწვევი ფაქტორები
ხელისუფლების მხრიდან მედიის წარმომადგენლების მიმართ აგრესიული
რიტორიკა და დანაშაულების გაჭიანურებული და გამოუძიებელი
საქმეებია.
ქარტია მიუთითებს, რომ ქვეყანაში მედიის წარმომადგენლებისთვის
უსაფრთხო სამუშაო გარემოს უზრუნველყოფა ხელისუფლების პასუხისმგებლობა
და ვალდებულებაა.
27.06.2023
საქართველოს ჟურნალისტური ეთიკის ქარტიის საბჭო 28 ივნისს 3 საქმეს ონლაინ განიხილავს:
18:00 საათი: მიშა მშვილდაძე ტელეკომპანია „იმედის" ჟურნალისტების ხატია ქვათაძის და გიორგი აბაზაძის წინააღმდეგ
სადავო მასალა 2023 წლის 22 მაისს გამოქვეყნდა.
განმცხადებლის პოზიციით, ჟურნალისტებმა ინფორმაცია არასწორად, კონტექსტიდან ამოჭრილად და მანიპულაციურად გააშუქეს.
განმცხადებელი დავობს ქარტიის პირველი (ინფორმაციის სიზუსტე), მეხუთე (შესწორება) და მეთერთმეტე (ფაქტის განზრახ დამახინჯება) პრინციპის დარღვევაზე.
19:00 საათი: ვალერიან ვაჩეიშვილი „გურიის მოამბის" წინააღმდეგ
სადავო მასალები მედიასაშუალებამ 2023 წლის 9 და 24 მაისს გამოაქვეყნა.
განმცხადებლის პოზიციით, ჟურნალისტმა ინფორმაცია არასწორად გააშუქა მისი დისკრედიტაციის მიზნით.
განმცხადებელი დავობს ქარტიის პირველი (ინფორმაციის სიზუსტე), მესამე (დადასტურებული წყარო), მეხუთე (შესწორება), მეშვიდე (დისკრიმინაცია), მერვე (ბავშვთა უფლებები), მეათე (პირადი ცხოვრების ხელშეუხებლობა) და მეთერთმეტე (ფაქტის განზრახ დამახინჯება) პრინციპის დარღვევაზე.
სხდომა გაიმართება ონლაინ, პროგრამა Zoom-ის მეშვეობით. მასზე დასწრების მსურველებმა შეგიძლიათ მოთხოვნა გამოაგზავნოთ ელექტრონულ ფოსტაზე - ethicscharter@gmail.com
საქმის განხილვა ღიაა და ნებისმიერ მსურველს შეუძლია დასწრება.
27.06.2023
საქართველოს ჟურნალისტური ეთიკის ქარტიის სამდივნომ ონლაინ მედია-პლატფორმა, „მაუწყებელის” ჟურნალისტის წინააღმდეგ განცხადება დასაშვებად ცნო, განმცხადებელია შპს ევოლუშენ ჯორჯია.
სადავო მასალა 2023 წლის 2 ივნისს გამოქვეყნდა.
განმცხადებლის თქმით, ჟურნალისტმა გაავრცელა არასწორი ინფორმაცია, მასალაში დასახელებულ ბრალდებებზე კი მას პასუხის გაცემის შესაძლებლობა არ ჰქონია.
განმცხადებელი დავობს ქარტიის ქარტიის პირველი (ინფორმაციის სიზუსტე) და მეთერთმეტე (ფაქტის განზრახ დამახინჯება) პრინციპის დარღვევაზე.
ქარტიის საბჭო განცხადებას ღია სხდომაზე განიხილავს და გადაწყვეტს დაირღვა თუ არა ქარტიის პრინციპები.
27.06.2023
შემოგვიერთდით Facebook-ზე
ჩამოტვირთეთ PDF ვერსია
ჟურნალისტურ საქმიანობას თან სდევს შეცდომები, არაზუსტი დეტალების გავრცელება, რაც ზოგ შემთხვევაში სისწრაფის, უყურადღებობის, პროფესიონალიზმის ნაკლებობის, მწირი გამოცდილების ანდა სხვა მიზეზით არის გამოწვეული. პასუხისმგებლიანი მედია, რომლისთვისაც აუდიტორიის სანდოობა და რეპუტაცია მნიშვნელოვანია, ცდილობს მყისიერად შეასწოროს დაშვებული შეცდომა, ამცნოს აუდიტორიას და იზრუნოს ზუსტი ინფორმაციის გავრცელებაზე.
ჟურნალისტურ საქმიანობას თან სდევს შეცდომები, არაზუსტი დეტალების გავრცელება, რაც ზოგ შემთხვევაში სისწრაფის, უყურადღებობის, პროფესიონალიზმის ნაკლებობის, მწირი გამოცდილების ანდა სხვა მიზეზით არის გამოწვეული. პასუხისმგებლიანი მედია, რომლისთვისაც აუდიტორიის სანდოობა და რეპუტაცია მნიშვნელოვანია, ცდილობს მყისიერად შეასწოროს დაშვებული შეცდომა, ამცნოს აუდიტორიას და იზრუნოს ზუსტი ინფორმაციის გავრცელებაზე.
ქარტიაში განცხადების შემოტანა შეუძლია ნებისმიერ მოქალაქეს, რომელიც
მიიჩნევს, რომ ჟურნალისტმა დაარღვია ეთიკური და პროფესიული
სტანდარტები. ქარტიის საბჭო იხილავს განცხადებებს როგორც ქარტიის
წევრი, ისე არაწევრი ჟურნალისტების მიმართ.
