საქართველოს ჟურნალისტური ეთიკის ქარტია აცხადებს ვაკანსიას პროექტების მენეჯერის პოზიციაზე.

სამუშაო დატვირთვა პროექტების მიხედვით.

ძირითადი მოვალეობები

• განახორციელოს პროექტები დამტკიცებული გეგმის მიხედვით
• მოამზადოს ფინანსური და პროგრამული ანგარიშები
• მოამზადოს და დააარქივოს პროექტებთან დაკავშირებული ადმინისტრაციული და ფინანსური დოკუმენტაცია
• დაეხმაროს ქარტიის დირექტორს საპროექტო განაცხადების მომზადებაში

საკვალიფიკაციო მოთხოვნები

• უნდა ჰქონდეს პროექტების მართვის გამოცდილება.
• უნდა ჰქონდეს უმაღლესი განათლება ბიზნესის მართვასა და ფინანსებში ან მომიჯნავე სფეროებში.
• უნდა ჰქონდეს ბიუჯეტის დაგეგმვისა და მონიტორინგის, ფინანსურ დოკუმენტებზე მუშაობის კარგი უნარები. 
• ეფექტურად უნდა აგვარებდეს ლოჯისტიკურ ამოცანებს ღონისძიებების ჩატარებისას.
• უნდა იყოს გუნდურად მომუშავე ძლიერი ინტერპერსონალური უნარებით.
• კარგად უნდა ფლობდეს ინგლისურ ენას.

ანაზღაურება შეთანხმებით.

დაინტერესებულმა პირებმა 2024 წლის 26 თებერვლამდე გამოგზავნეთ CV და სამოტივაციო წერილი შემდეგ მისამართზე ethicscharter@gmail.com

ელექტრონული წერილის სათაურის ველში (Subject) მიუთითეთ ვაკანსიის დასახელება.

საქართველოს ჟურნალისტური ეთიკის ქარტია ღრმა შეშფოთებას გამოთქვამს 2024 წლის 12 თებერვალს ოზურგეთში გაზეთ „ალიონის“ რედაქციაში ხანძრის გაჩენის მცდელობის გამო და საგამოძიებო ორგანოებს საქმის სწრაფად და ეფექტურად გამოძიებისკენ მოუწოდებს.

„ალიონის“ რედაქცია ოზურგეთში, ქალაქის ცენტრში მდებარე ისტორიულ შენობაშია განთავსებული, გაბრიელ ეპისკოპოსის ქუჩაზე. ამავე შენობაში მდებარეობს მუნიციპალიტეტის თოჯინების თეატრი და სხვადასხვა ორგანიზაციის ოფისები. სავარაუდოდ ღამით, უცნობმა პირებმა რედაქციაში ფანჯრიდან იოლად აალებადი სითხე და საწვავი შეაგდეს. გაზეთ „ალიონის“ რედაქტორის, ნუგზარ ასათიანის მიერ მოწოდებული ინფორმაციით, ოთახში ცეცხლი გაჩნდა, თუმცა ნესტის გამო ვერ გავრცელდა.

გაზეთი „ალიონი“ უნიკალურ არქივებს ფლობს, რომელთა განადგურება დიდი დანაკარგი იქნებოდა ისტორიის მკვლევარებისთვის. გამოძიება დაწყებულია სსს კოდექსის 187-ე მუხლის მეორე ნაწილის ა ქვეპუნქტით, რომელიც ცეცხლის წაკიდებით სხვისი ნივთის დაზიანებას ან განადგურებას გულისხმობს.

ყოველი ასეთი შემთხვევა ამძიმებს სამუშაო გარემოს რეგიონებში ჟურნალისტებისთვის, რომელთაც ისედაც ყოველდღიურად არაერთ გამოწვევასთან უწევთ გამკლავება, მათ შორის, ფიზიკური უსაფრთხოების კუთხით.

საქართველოს ჟურნალისტური ეთიკის ქარტიის საბჭოს გადაწყვეტილებით, „პირველი არხის" ჟურნალისტმა მარიამ ბერძენიშვილმა ქარტიის პირველი (ინფორმაციის სიზუსტე) პრინციპი დაარღვია. 

მის წინააღმდეგ განმცხადებელი ანონიმურია. სადავო მასალა 2023 წლის 13 ოქტომბერს გავიდა ეთერში. 

განმცხადებლის პოზიციით, ჟურნალისტმა ინფორმაცია არასწორად გააშუქა.

განმცხადებელი მარიამ ბერძენიშვილის მიმართ ასევე დავობდა ქარტიის მეშვიდე (დისკრიმინაცია) და მეთერთმეტე (ფაქტის განზრახ დამახინჯება და პროფესიული საქმიანობისას ქრთამის ან საჩუქრის მიღება) პრინციპების დარღვევაზე, მაგრამ საბჭოს ამ ნაწილებზე დარღვევა არ დაუდგენია. ამასთან, განმცხადებელი დავობდა ქარტიის პირველ, მეშვიდე და მეთერთმეტე პრინციპზე „პირველი არხის" ჟურნალისტის ნიკა მუკბანიანის მიმართ, მაგრამ საბჭოს მის მიმართ დარღვევა არ დაუდგენია.

გადაწყვეტილების სამოტივაციო ნაწილი მოგვიანებით გამოქვეყნდება.

საქართველოს ჟურნალისტური ეთიკის ქარტიის საბჭოს გადაწყვეტილებით, POSTV-ს ჟურნალისტმა ქეთი მამრიკიშვილმა, ტელეკომპანია „იმედის" ჟურნალისტებმა მეგი ნარსავიძემ და ნათია სონღულაშვილმა, ტელეკომპანია „რუსთავი 2-ის" ჟურნალისტებმა ნათია ლაზაშვილმა, დავით კაკულიამ და შოთა ფალავანდიშვილმა ქარტიის პირველი (ინფორმაციის სიზუსტე) და მეთერთმეტე (ფაქტის განზრახ დამახინჯება) პრინციპი დაარღვიეს. 

მათ წინააღმდეგ ქარტიას კომპანია ,,ედისონ რისერჩის’’ მთავარმა მრჩეველმა ნინო ჯაფარიძემ მომართა, სადავო მასალები 2023 წლის 13 ნოემბერს გავიდა ეთერში. 

განმცხადებლის პოზიციით, ჟურნალისტებმა ინფორმაცია დაუბალანსებლად და მანიპულაციურად გააშუქეს, რაც რეპუტაციულ ზიანს აყენებდა ,,ედისონ რისერჩს’’ და არაკვალიფიციურ, მიკერძოებულ კვლევით ინსტიტუციად წარმოაჩენდა. 

გადაწყვეტილების სამოტივაციო ნაწილი მოგვიანებით გამოქვეყნდება.

საქართველოს ჟურნალისტური ეთიკის ქარტიის საბჭო 9 თებერვალს 3 საქმეს განიხილავს: 

19:00 საათი:  ნინო ჯაფარიძე „POSTV"-ს ჟურნალისტის ქეთი მამრიკიშვილის, „TV იმედის" ჟურნალისტების მეგი ნარსავიძის და ნათია სონღულაშვილის და „რუსთავი 2"-ის ჟურნალისტების ნათია ლაზაშვილის, დავით კაკულიას და შოთა ფალავანდიშვილის წინააღმდეგ

სადავო მასალები 2023 წლის 13 ნოემბერს გავიდა ეთერში. 

განმცხადებლის პოზიციით, ჟურნალისტებმა ინფორმაცია არასწორად და მანიპულაციურად გააშუქეს, რაც რეპუტაციულ ზიანს აყენებს კომპანიას და არაკვალიფიციურ, მიკერძოებულ კვლევით ინსტიტუციად წარმოაჩენს. 

განმცხადებელი დავობს ქარტიის პირველი (ინფორმაციის სიზუსტე) და მეთერთმეტე (ფაქტის განზრახ დამახინჯება) პრინციპის დარღვევაზე. 

სხდომა გაიმართება ჰიბრიდულ ფორმატში, სხდომას შეგიძლიათ დაესწროთ ადგილზე: 

მისამართი - ბაქოს ქუჩა N4

სხდომას შეგიძლიათ შემოუერთდეთ ონლაინ პროგრამა Zoom-ის მეშვეობით. 

სხდომაზე ონლაინ დასწრების მსურველებმა შეგიძლიათ მოთხოვნა გამოაგზავნოთ ელექტრონულ ფოსტაზე - ethicscharter@gmail.com 

საქმის  განხილვა ღიაა და ნებისმიერ მსურველს შეუძლია დასწრება.

საქართველოს ჟურნალისტური ეთიკის ქარტია მწუხარებას გამოთქვამს ასურეთში მომხდარი ტრაგედიის გამო, რომელსაც ჩვენი კოლეგაც ემსხვერპლა, და უსამძიმრებს გარდაცვლილთა ოჯახის წევრებს, მეგობრებსა და კოლეგებს.

ქარტია თხოვს მედიასაშუალებებს, გაითვალისწინონ ის, თუ რა ტრავმა შეიძლება მიაყენონ ამ მძიმე კადრების ჩვენებით გარდაცვლილთა ახლობლებს და, ზოგადად, საზოგადოებას. ამგვარი შემთხვევები მედიამ პროფესიული სტანდარტის სრული დაცვით უნდა გააშუქოს, რაც გულისხმობს, რომ მედია სიფრთხილით უნდა მოეკიდოს ისეთი ვიზუალური მასალის ჩვენებას, რომელზეც ასახულია ადამიანთა ტრაგედია და ტანჯვა.

მედიამ უნდა გამოავლინოს თანაგრძნობა ამგვარი მოვლენების მონაწილე პირთა მიმართ და პატივი უნდა სცეს მათი პირადი ცხოვრების ხელშეუხებლობას. მედია ვალდებულია, ტრაგედიების გაშუქებისას ეთიკური გაშუქებით დაიცვას ბალანსი საზოგადოებრივ ინტერესსა და ტრაგედიის მონაწილე პირთა უფლებებს შორის.

ქარტია მოუწოდებს იმ მედია საშუალებებს, რომელთაც უკვე გაავრცელეს ტრაგედიის ამსახველი კადრები, წაშალონ ან დახურონ ისინი აუდიტორიისათვის, და ყველა ღონე იხმარონ მათი შემდგომი გავრცელების შესაზღუდად.

საქართველოს ჟურნალისტური ეთიკის ქარტიის საბჭოს გადაწყვეტილებით, „Georgian Press"-ის არაიდენტიფიცირებულმა ჟურნალისტმა ქარტიის პირველი (ინფორმაციის სიზუსტე) პრინციპი დაარღვია. 

მის წინააღმდეგ ქარტიას ესმა გუმბერიძემ მომართა, სადავო მასალა 2023 წლის 12 დეკემბერს გამოქვეყნდა. 

განმცხადებლის პოზიციით, ჟურნალისტმა ინფორმაცია არასწორად გააშუქა და არ გადაამოწმა, ამასთან, არ მოიძია ბრალდებაზე საპასუხო პოზიცია. 

განმცხადებელი დავობდა ქარტიის მესამე (დადასტურებული წყარო) პრინციპზეც, თუმცა მოხსნა მოთხოვნა მასთან დაკავშირებით.

გადაწყვეტილების სამოტივაციო ნაწილი მოგვიანებით გამოქვეყნდება.

საქართველოს ჟურნალისტური ეთიკის ქარტია აცხადებს ვაკანსიას მედიაკრიტიკის პლატფორმა mediachecker.ge-ს რედაქტორის პოზიციაზე.

სამუშაო დატვირთვა - სრული განაკვეთი.

ძირითადი მოვალეობები

• ქარტიის საბჭოსთან და მენეჯმენტთან ერთად mediachecker.ge-ს განვითარებაზე ზრუნვა
• ყოველდღიური სარედაქციო საქმიანობის მართვა
• სარედაქციო გუნდის წევრებთან მუშაობა და მათ განვითარებაზე ზრუნვა
• Mediachecker.ge-ისთვის მასალების მომზადება

საკვალიფიკაციო მოთხოვნები

• სასურველია, რომ ჰქონდეს რედაქტორის რანგში პროფესიული გამოცდილება
• ჟურნალისტური კვლევის და წერის გამოცდილება - მინიმუმ 3 წელი
• უმაღლესი განათლება ჟურნალისტიკაში ან მომიჯნავე სპეციალობაში. უპირატესობა მიენიჭებათ მაგისტრის ხარისხის მქონე კანდიდატებს.
• ზედმიწევნით კარგად  უნდა იცნობდეს მედიაგარემოს
• კარგად უნდა ესმოდეს ახალი ტექნოლოგიების როლი მედიაში
• უნდა იყოს გუნდურად მომუშავე ძლიერი ინტერპერსონალური უნარებით
• უნდა ჰქონდეს კვლევის კარგი უნარები
• გამართულად უნდა საუბრობდეს და წერდეს ინგლისურად
• ანაზღაურება შეთანხმებით.

დაინტერესებულმა პირებმა 2024 წლის 15 თებერვლამდე გამოგზავნეთ CV და თქვენი ხედვა იმის თაობაზე, თუ როგორ უნდა უპასუხოს mediachecker.ge-მ ქართული მედიის წინაშე არსებულ გამოწვევებს შემდეგ მისამართზე ethicscharter@gmail.com

საქართველოს ჟურნალისტური ეთიკის ქარტიის საბჭო 2 თებერვალს 3 საქმეს განიხილავს: 

18:00 საათი: ესმა გუმბერიძე Georgian Press-ის წინააღმდეგ

სადავო მასალა 2023 12 დეკემბერს გამოქვეყნდა. 

განმცხადებლის პოზიციით, ჟურნალისტმა ინფორმაცია არასწორად გააშუქა და არ გადაამოწმა, ამასთან, არ მოიძია ბრალდებაზე საპასუხო პოზიცია. 

განმცხადებელი დავობს ქარტიის პირველი (ინფორმაციის სიზუსტე) და მესამე (დადასტურებული წყარო) პრინციპის დარღვევაზე. 

მეორე და მესამე საქმეზე საბჭოს გადაწყვეტილებით სხდომა დაიხურება, რადგან განმცხადებელი იქნება ანონიმური. 

სხდომა გაიმართება ჰიბრიდულ ფორმატში, სხდომას შეგიძლიათ დაესწროთ ადგილზე: 

მისამართი - ფრონტლაინი, ლადო ასათიანის 62. 

სხდომას შეგიძლიათ შემოუერთდეთ ონლაინ პროგრამა Zoom-ის მეშვეობით. 

სხდომაზე ონლაინ დასწრების მსურველებმა შეგიძლიათ მოთხოვნა გამოაგზავნოთ ელექტრონულ ფოსტაზე - ethicscharter@gmail.com 

საქმის  განხილვა ღიაა და ნებისმიერ მსურველს შეუძლია დასწრება.

საქართველოს ჟურნალისტური ეთიკის ქარტიის საბჭოს გადაწყვეტილებით, ტელეკომპანია „იმედის" გადაცემა „იმედის კვირის" წამყვანმა ირაკლი ჩიხლაძემ ქარტიის პირველი (ინფორმაციის სიზუსტე) და მეშვიდე (დისკრიმინაცია) პრინციპები დაარღვია.

მის წინააღმდეგ ქარტიას WISG-მა, თემიდამ, ქეთევან კაბულაშვილმა და სოფიკო გულედანმა მომართეს. სადავო მასალა 2023 წლის 17 სექტემბერს გავიდა ეთერში. 

განმცხადებლები განმარტავდნენ, რომ წამყვანმა დისკრიმინაციის წამახალისებელი ფრაზები გააჟღერა და არასწორი ინფორმაცია გაავრცელა. 

WISG და თემიდა დავობდნენ ქარტიის პირველი (ინფორმაციის სიზუსტე) და მეშვიდე (დისკრიმინაცია) პრინციპის დარღვევაზე. 

ქეთევან კაბულაშვილი და სოფიკო გულედანი დავობდნენ ქარტიის მეშვიდე (დისკრიმინაცია) პრინციპის დარღვევაზე. 

გადაწყვეტილების სამოტივაციო ნაწილი მოგვიანებით გამოქვეყნდება.

საქართველოს ხელისუფლებისა და მმართველი პარტიის ხელმძღვანელი პირების მხრიდან  სამოქალაქო ორგანიზაციებზე მიზანმიმართული თავდასხმა გრძელდება. ბოლო პერიოდში მაღალი პოლიტიკური თანამდებობის მქონე პირების მიერ გაკეთებული განცხადებები დეზინფორმაციის წინააღმდეგ მებრძოლი, საარჩევნო საკითხებსა და ადამიანის უფლებებზე მომუშავე ორგანიზაციების დისკრედიტაციას ისახავს მიზნად. იმის გათვალისწინებით, რომ მიმდინარე წელს ქვეყანაში დაგეგმილია არჩევნები, მსგავსი კამპანიები და მნიშვნელოვანი საკითხების პოლიტიკური მანიპულაციისთვის გამოყენება განსაკუთრებით საფრთხის შემცველია.  

20 იანვარს პარლამენტის თავმჯდომარემ შალვა პაპუაშვილმა პარლამენტში სპეციალური ბრიფინგი გამართა, სადაც სახალხო დამცველის აპარატთან არსებული ტოლერანტობის ცენტრის ხელმძღვანელს,  ბექა მინდიაშვილს თავს დაესხა. ამ ბრიფინგზე პარლამენტის თავმჯდომარის მხრიდან მადისკრედიტირებელი განცხადება გაკეთდა „საბჭოთა წარსულის კვლევის ლაბორატორიის“ (SovLab) და “სამოქალაქო იდეის” მიმართაც. 

რელიგიური თემების და ისტორიის ინსტრუმენტალიზაცია, დეზინფორმაცია, უფლებადამცველების და სამოქალაქო ორგანიზაციების წარმომადგენელთა სახელმწიფოს, რელიგიის და ეკლესიის მტრებად გამოცხადება არადემოკრატიული სახელმწიფოებისთვის დამახასიათებელი პრაქტიკაა, საზოგადოებაში პოლარიზაციის ხარისხს კიდევ უფრო ზრდის და ადამიანების რელიგიურ ნიადაგზე დაპირისპირების რისკებს შეიცავს. იმ პირობებში, როდესაც საქართველოს საპატრიარქომ მიზანშეუწონლად მიიჩნია სტალიანის გამოსახულებიანი ხატის ეკლესიაში არსებული ფორმით დატოვება და შესაბამისს ზომებსაც მიმართა, ხელისუფლების მიერ, იმ ორგანიზაციების და პირების წინააღმდეგ იერიში, ვინც პრობლემა გამოავლინა და საბჭოთა ტოტალიტარულ მემკვიდრეობას, როგორც კრემლის დეზინფორმაციის ერთ-ერთ ინსტრუმენტს ებრძვის, აზიანებს პროცესს, რომელიც გარე საფრთხეების წინააღმდეგ საზოგადოების კონსოლიდირებაზე უნდა იყოს მიმართული და არა შიდა დემოკრატიულ ინსტიტუტებთან ბრძოლაზე. ასევე შემაშფოთებელია, რომ ხელისუფლება მიზანმიმართილად ცდილობს რელიგიური ორგანიზაციები პოლიტიკური პროცესის აქტიურ მონაწილად აქციოს, რაც თავად რელიგიური ორგანიზაციების პოლიტიკურ ნეიტრალიტეტსა და დამოუკიდებლობასაც აზიანებს.

აღსანიშნავია, რომ სამოქალაქო ორგანიზაციების მსგავსად, კოორდინირებული შეტევის სამიზნე საერთაშორისო დონორი ორგანიზაციებიც არიან. განსაკუთრებით საგანგაშოა პარლამენტის თავმჯდომარის მიერ აშშ-ის საერთაშორისო განვითარების სააგენტოზე (USAID)  თავდასხმა. იმ ფონზე, როდესაც ამერიკის მთავრობის და სხვა დასავლური სახელმწიფო და კერძო ფონდების ფინანსური დახმარებით საქართველოში არაერთი საკულტო ნაგებობის და კულტურული მემკვიდრეობის ძეგლის აღდგენა-შენარჩუნება მოხდა, ასეთი თავდასხმები არაკონსტრუქციულ ხასიათს ატარებს და აძლიერებს კრემლის პროგანდისტულ ნარატივს, რომელიც დასავლურ ცივილიზაციას ქართული იდენტობის მტრად სახავს.

მმართველი პარტიისა და ხელისუფლების წარმომადგენლების მხრიდან დონორი ორგანიზაციების მიმართ თავდასხმას არაერთხელ ჰქონდა ადგილი. დონორი ორგანიზაციების წინააღმდეგ წარმოებულ კამპანიაში აქტიურად არიან ჩართული საპარლამენტო უმრავლესობაში შემავალი ანტიდასავლური ჯგუფის, „ხალხის ძალის“, წევრები და პროსახელისუფლებო მედია ორგანიზაციები.

ე.წ. „რუსული კანონის“ შესახებ კანონპროექტების მიღებაზე უარის თქმის მიუხედავად, როგორც ჩანს, ხელისუფლება აგრძელებს სამოქალაქო საზოგადოების ორგანიზაციების დისკრედიტაციისა და ფინანსური მდგრადობის შეზღუდვის მცდელობას, რაც ქვეყანაში სამოქალაქო საზოგადოების ინსტიტუტის შესუსტებას ისახავს მიზნად.  

საგულისხმოა, რომ სამოქალაქო ორგანიზაციების წინააღმდეგ მიმართული მტრული რიტორიკა არ არის ახალი და ქვეყანაში სამოქალაქო საზოგადოების შეზღუდვის მიზნით, ხელისუფლების მიერ ორგანიზებული და კოორდინირებული შეტევის ფაქტობრივად უწყვეტ პროცესს წარმოადგენს. როგორც „სამართლიანი არჩევნების“ 2020 და 2021 წლების არჩევნებისთვის სოციალური მედიის მონიტორინგის შედეგებმა აჩვენა, ფეისბუქზე მმართველის პარტიის სასარგებლოდ და ოპოზიციის საწინააღმდეგოდ მოქმედი გვერდები იმავდროულად უარყოფითად წარმოაჩენდნენ ქვეყანაში სამოქალაქო ორგანიზაციების საქმიანობას. სოციალური მედიის კომპანია Meta-ს მიერ გასული წლის მაისში გამოქვეყნებული ანგარიშის მიხედვით, ფეისბუქიდან და ინსტაგრამიდან კოორდინირებულ არაავთენტურ ქცევაში ჩართვის გამო წაშლილი გვერდები/ანგარიშები/ჯგუფები, რომლებიც პროსამთავრობო, მათ შორის „უცხოეთის აგენტების“ კანონპროექტთან დაკავშირებულ, კამპანიას აწარმოებდნენ, საქართველოს მთავრობის ადმინისტრაციის სტრატეგიული კომუნიკაციების დეპარტამენტთან იყვნენ დაკავშირებული. 

გარდა იმისა, რომ სამოქალაქო საზოგადოების ძლიერი ინსტიტუტის არსებობა მნიშვნელოვანია ქვეყნის დემოკრატიული განვითარებისათვის, მას მნიშვნელოვანი როლი აკისრია ევროინტეგრაციის პროცესშიც. ევროკომისიის 2023 წლის გაფართოების პოლიტიკის შესახებ კომუნიკაციაში საქართველოსთვის განსაზღვრულ ნაბიჯებში განსაკუთრებული ყურადღება ეთმობა სამოქალაქო ორგანიზაციებთან თანამშრომლობასა და მათ ჩართულობას.  

2023 წლის 27 ნოემბერს ევროინტეგრაციის სამთავრობო კომისიამ დაამტკიცა  კომუნიკაციაში საქართველოსთვის განსაზღვრული ნაბიჯების განსახორციელებელი ღონისძიებების გეგმა, რომელშიც სამოქალაქო ორგანიზაციებთან შეხვედრებსა და ერთობლივ საქმიანობაზეა საუბარი. ამდენად, ხელისუფლების მხრიდან სამოქალაქო ორგანიზაციების მადისკრედიტირებელი რიტორიკა ხელს უშლის თანამშრომლურ გარემოს და ეწინააღმდეგება საქართველოს მთავრობის მიერვე ოფიციალურ დოკუმენტში გაცხადებულ პოლიტიკას.

მოვუწოდებთ საქართველოს პოლიტიკურ ხელისუფლებას, შეწყვიტოს სამოქალაქო ორგანიზაციებსა და ქვეყნის საერთაშორისო პარტნიორებზე თავდასხმები და ძალისხმევა მიმართოს ევროინტეგრაციის პროცესისთვის საჭირო რეკომენდაციების შესრულებაზე.

მედიის ადვოკატირების კოალიცია გამოხატავს შეშფოთებას და მკაცრად გმობს თბილისში, ​კეკელიძის ქუჩაზე საცხოვრებელი სახლიდან გამოსახლების გაშუქების დროს ჟურნალისტების საქმიანობაში უკანონო ჩარევის ფაქტებს და ჟურნალისტის დაკავების შემთხვევას. აღნიშნული  ინციდენტები აუარესებს მედიაგარემოს და ჟურნალისტების ფუნდამენტური უფლებების აშკარა დარღვევას წარმოადგენს.

2024 წლის 23 იანვარს  თბილისში, კეკელიძის ქუჩაზე მდებარე საცხოვრებელი კორპუსიდან  გამოსახლების პროცესის გაშუქებისას, ონლაინ მედია „მაუწყებლის“ ჟურნალისტებზე პროფესიული მოვალეობის შესრულების დროს, პოლიციის მხრიდან ფიზიკურ ძალადობას ჰქონდა ადგილი. კერძოდ, “მაუწყებლის” ჟურნალისტი, რატი რატიანი ასრულებდა პროფესიულ მოვალეობას, რა დროსაც ის პოლიციელმა, უხეში ძალის გამოყენებით, ძირს ჩამოაგდო მანქანიდან. აღნიშნული ქმედებით ჟურნალისტის ჯანმრთელობასა და სიცოცხლეს საფრთხე შეექმნა. „მაუწყებლის” წარმომადგენელმა ეთიკის ქარტიასთან საუბრისას აღნიშნა, რომ სამართალდამცავები ფიზიკურად  გაუსწორდნენ კიდევ სამ ჟურნალისტს, მათ შორის, ნათია ქარჩილაძეს, ანი გიორგაძეს და გიორგი არობელიძეს. ასევე, პროფესიული მოვალეობის შესრულების დროს, დააკავეს „მთის ამბების” რედაქტორი, გელა მთივლიშვილი, რომელიც პოლიციის ვაკის რაიონულ სამმართველოშია გადაყვანილი. 

ჟურნალისტები მნიშვნელოვან როლს ასრულებენ საზოგადოების ინფორმირებაში. მედიის წარმომადგენლებისთვის  პროფესიულ საქმიანობაში უკანონოდ ხელის შეშლა და დაკავება როგორც ჟურნალისტების ინდივიდუალური უფლებების დარღვევას, ასევე დემოკრატიულ ინსტიტუტზე თავდასხმას წარმოადგენს. 

მედიის ადვოკატირების კოალიცია მოუწოდებს სპეციალურ საგამოძიებო სამსახურს სასწრაფოდ გამოიძიოს ჟურნალისტების მიმართ ძალადობის, პროფესიულ საქმიანობაში უკანონოდ ჩარევისა და უკანონო დაკავების შემთხვევები. მნიშვნელოვანია აღნიშნული ინციდენტების სწრაფი და საფუძვლიანი გამოძიება, რასაც დამნაშავე პირების იდენტიფიცირება და პასუხისგებაში მიცემა უნდა მოჰყვეს.