ქარტიის სამდივნომ დასაშვებად სცნო ანა ცხოვრებოვას, ნინო კვინტრაძის, მარიამ მჭედლიშვილის, გიგა ბენიას და ნუცა შუბაშვილის განცხადება  ნიკა ლალიაშვილის წინააღმდეგ.

განცხადების თანახმად, ნიკა ლალიაშვილის გადაწყვეტილებით, 2020 წლის 1 მარტიდან, ტელეკომპანია “მაესტროს” გადაცემა “ბიზნესი” დაიხურა, ამ გადაწყვეტილების მიღებამდე, ადგილი ჰქონდა გადაცემის სარედაქციო ფორმატში ჩარევის მცდელობას ნიკა ლალიაშვილის მხრიდან, ასევე მითითებებს როგორ გაშუქებულიყო საკითხი ისე, რომ მმართველი გუნდის ინტერესი არ დაზარალებულიყო.

განმცხადებლის განმარტებით, „ბაგების საბაგირო კვლავ ექსპლუატიციის მოლოდინშია” არის ერთ-ერთი მასალა, რომელიც წინ უძღოდა დირექტორის გადაწყვეტილებას.

გამომდინარე აქედან, განმცხადებელი მიიჩნევს, რომ ნიკა ლალიაშვილის მიერ დარღვეულია ქარტიის მეორე პრინციპი, რაც მოიზრებს რომ: “დაუშვებელია ჟურნალისტის იძულება პროფესიული საქმიანობისას აზრი გამოხატოს ან მოიქცეს საკუთარი სინდისის წინააღმდეგ.”

ქარტიის საბჭო განცხადებას ღია სხდომაზე განიხილავს და გადაწყვეტს ადგილი ჰქონდა თუ არა ქარტიის პრინციპის დარღვევას.

2020 წლის 28 მარტს, TV პირველის გადაცემა ,,დღის ამბებში” ამირან გამყრელიძესა და პაატა იმნაძესთან ინტერვიუების დროს დასმული კითხვების გამო, ჟურნალისტები საზოგადოების ერთი ნაწილის მხრიდან შეურაცხყოფისა და უსაფუძვლო კრიტიკის საგანი გახდნენ. 

ტელეკომპანია “მთავარის” გადაცემის წამყვანის - ნანუკა ჟორჟოლიანის წინააღმდეგ შემოსული განცხადება, ქარტიის საბჭოს სამდივნომ დასაშვებად სცნო. განცხადება ჟურნალისტის წინააღმდეგ კავშირმა “საფარი”, გრიგოლ ჩიქოვანმა და ნინო ჩიქოვანმა შემოიტანეს.

სადავო მასალა “ნანუკას შოუ”-ში მთავარ არხზე, 2020 წლის 11 მარტს გავიდა და ის ხაშურში, 05 მარტს მომხდარ შემთხვევას - ყოფილი ქმრის მიერ, ცოლის ცივი იარაღით დაჭრას ეხებოდა.

განმცხადებლის განმარტებით, ჟურნალისტის მიერ გადაცემაში მოწვეულმა სტუმარმა ისაუბრა მსხვერპლის ცხოვრების ისეთ ინტიმურ დეტალებზე, როგორიცაა მისი პირადი ცხოვრება, ბავშვებთან მისი დამოკიდებულება, მისი ურთიერთობა მეუღლესთან, ასევე ხაზი გაესვა პიროვნულ მახასიათებლებსა და ქცევებს. განმცხადებლის აზრით, გადაცემაში მოყოლილი ამბებით ხდებოდა ბავშვის პირადი ცხოვრების დეტალების გასაჯაროებაც. მისი თქმით, გადაცემაში ასევე შეინიშნებოდა სტერეოტიპების წამახალისებელი ტენდენცია. კერძოდ, დანაშაულის გამამართლებელი განცხადების გაჟღერებით, თითქოს დანაშაული განპირობებილი იყო ქალის “არასწორი” საქციელით, აღრმავებდა საზოგადოებაში ამ საკითხზე არსებულ წარმოდგენებს.

განმცხადებლის აზრით სადავო მასალაში დარღვეულია ქარტიის მეშვიდე (დისკრიმინაციის წახალისება) და მეათე (პირადი ცხოვრების ხელშეუხებლობის) პრინციპები.

სადავო მასალას ქარტიის საბჭო ღია სხდომაზე განიხილავს და გადაწყვეტს ადგილი ჰქონდა თუ არა ქარტიის პრინციპების დარღვევას.

საქართველოს ჟურნალისტური ეთიკის ქარტიის სამდივნომ დასაშვებად სცნო მოძრაობა “სირცხვილიას” განცხადება ტელეკომპანია“იმედის” ჟურნალისტების: ირაკლი ჩიხლაძისა და შორენა ხვიჩიას წინააღმდეგ.

სადავო გახდა ტელეკომპანიის მიერ, 2020 წლის 09 თებერვალს იმედის კვირაში გასული სიუჟეტი: “ვინ არიან ადამიანები, რომლებიც ხალხის და ქვეყნის ზიანის ხარჯზე ძალაუფლების ხელში ჩაგდებას ცდილობენ.”

განმცხადებლის განმარტებით, მისი წარმოჩენით, როგორც "ნაციონალური მოძრაობის " მოკავშირე და ხელისუფლების რევოლუციური გზით შეცვლის მსურველი, სიუჟეტში მოძრაობა “სირცხვილიას” დისკრედიტაცია მოხდა. განმცხადებელი მიიჩნევს, რომ სადავო მასალაში დარღვეულია ქარტიის პირველი (სიზუსტის) პრინციპი.

ქარტიის საბჭო განხადებას ღია სხდომაზე განიხილავს და გადაწყვეტს დაირღვა თუ არა სიზუსტის პრინციპი.

ჩვენ, კოალიცია „მედიის ადვოკატირებისათვის“ გაწევრიანებულ ორგანიზაციებს გვსურს კიდევ ერთხელ გავამახვილოთ საზოგადოების ყურადღება აჭარის მაუწყებელში მიმდინარე საგანგაშო პროცესების მიმართ.

გუშინ, 2020 წლის 23 მარტს, გაცხადდა მაუწყებლის დირექტორის კიდევ ორი გადაწყვეტილება, რომელიც ერთის მხრივ, აღრმავებს ეჭვებს მაუწყებელში განსხვავებული პოზიციის მქონე ჟურნალისტების დევნისა და შევიწროების შესახებ. მეორეს მხრივ, ადასტურებს რომ მაუწყებელი თავს არიდებს „მაუწყებლობის შესახებ“ საქართველოს კანონით დაკისრებული ფუნქციის შესრულებას.

ჟურნალისტური ეთიკის ქარტია მიიჩნევს, რომ აჭარის ტელევიზიისა და რადიოს მენეჯმენტი დევნის ჟურნალისტებს და საკადრო გადაწყვეტილებებით ცვლის არხის სარედაქციო პოლიტიკას.

საქართველოს ჟურნალისტური ეთიკის ქარტიის საბჭოს სამდივნომ დასაშვებად სცნო ბადუ რამიშვილის განცხადება ტელეკომპანია იმედის, TV 25-ისა და ინფო9-ის წინააღმდეგ. სადავო მასალები 2020 წლის 27, 28 და 29 თებერვალს გამოქვეყნდა. სამივე მათგანში მითითებულია: ,,მართალია თუ არა, რომ კორონავირუსმა უხანის სამეცნიერო ლაბორატორიიდან გაჟონა? ამ ბმულზე ნახეთ". თუმცა მითითებული ბმულები სულ სხვა ინფორმაციას შეიცავს ან არაფერია განთავსებული.

განმცხადებელს მიაჩნია, რომ დარღვეულია ქარტიის პირველი (სიზუსტე), მესამე (ინფორმაციის გადაცემა დადასტურებულ წყაროზე დაყრდნობით) მეხუთე (შესწორება) და მეთერთმეტე (პლაგიატი, ფაქტის განზრახ დამახინჯება) პრინციპები.

სადავო მასალებს ქარტიის საბჭო ღია სხდომაზე განიხილავს და გადაწყვეტს, დაირღვა თუ არა ქარტიის პრინციპები.

 

დღეს, 23 მარტს მარნეულისა და ბოლნისის მუნიციპალიტეტებში საგანგებო მდგომარეობის ფარგლებში საკარანტინო შეზღუდვები დაწესდა. აღნიშნულ მუნიციპალიტეტებში ადგილობრივი მედია და პრესა ჩვეულ რეჟიმში განაგრძნობენ მუშაობას, სხვა ყველა მედიასაშუალება, ინფორმაციას საზოგადოებრივი მაუწყებლის მეშვეობით მიიღებს.

საქართველოს ჟურნალისტური ეთიკის ქარტიის საბჭოს სამდივნომ დასაშვებად სცნო ანა გვალიას განცხადება „მთავარი არხის“ გადაცემა „სხვა ნანუკას“ ავტორის და წამყვანის ნანუკა ჟორჟოლიანის წინააღმდეგ. სადავო მასალა - „ვერ არის ეს კარგად.." ბიჭი რომელსაც გარშემომყოფები ამ ფრაზით ცნობენ”  2020 წლის 11 მარტს გავიდა ეთერში და ეხებოდა ინფექციურ საავადმყოფოში მყოფ ირანის მოქალაქეს, რომელიც ჟურნალისტებთან გამოვიდა და განაცხადა, რომ მას კორონავირუსი არ დაუდგინდა და ჯანმრთელია.

განმცხადებელი მიიჩნევს, რომ აღნიშნული გადაცემა ადამიანის ღირსების შემლახველია, წამყვანს აქვს მუდმივი ცინიკური და დამცინავი დამოკიდებულება რესპონდენტის მიმართ და  ადგილი ჰქონდა ეთნიკური ნიშნით დისკრიმინაციის გაღვივების მცდელობას.

აქედან გამომდინარე, განმცხადებელს მიაჩნია, რომ დარღვეულია ქარტიის მეშვიდე (დისკრიმინაციის წახალისება).

ქარტიის საბჭო განიხილავს საქმეს და დაადგენს მართლაც დაირღვა თუ არა აღნიშნული პრინციპი სადავო მასალაში.

2020 წლის 20 მარტს გავრცელდა ინფორმაცია ტელეკომპანიების" TV პირველის" და" მთავარი არხის" ანგარიშებზე საგადასახადო ინკასოს დადების შესახებ. მოგვიანებით, მთავრობამ ეს საკითხი რიგით გადაწყვეტილებად განმარტა.

ჩვენ არაერთხელ ვისაუბრეთ, რომ მაუწყებლების მიმართ შერჩევითი საგადასახადო პოლიტიკის წარმოება იყო და რჩება საქართველოს სხვადასხვა ხელისუფლების იარაღად მედიაზე ზეწოლისათვის.

დღეს კი მედიის შეუფერხებლად მუშაობა, როდესაც COVID-19-თან დაკავშირებით შექმნილი ვითარების გამო, მოსახლეობისთვის მნიშვნელოვანია ინფორმაციის მიღება, სახელმწიფოს პასუხისმგებლობას აასმაგებს.

მოვუწოდებთ საქართველოს მთავრობას მიიღოს დროებითი ზომები და დაუყოვნებლივ მოეხსნას ინკასო ტელეკომპანიებს.

გავრცელებული ინფორმაციის თანახმად, ტელეკომპანიების  "TV პირველისა" და "მთავარი არხის" ანგარიშებზე, საბიუჯეტო დავალიანების გადაუხდელობის გამო, შემოსავლების სამსახურმა საინკასო დავალება წარადგინა. ხელისუფლებამ ეს გადაწყვეტილება შემოსავლების სამსახურის გამართული მუშაობით ახსნა და განაცხადა, რომ სანქციის დადება ავტომატურად მოხდა.