საქართველოს ჟურნალისტური ეთიკის ქარტიის საბჭოს გადაწყვეტილებით, "პრაიმტაიმის" რედაქტორმა მირიან ბოქოლიშვილმა და "იმედის" ჟურნალისტმა ნატალია მახვილაძემ ქარტიის პირველი პრინციპი  (სიზუსტე) დაარღვიეს. 

მათ წინააღმდეგ განცხადებით ქარტიას მალხაზ მაჩალიკაშვილმა მიმართა. ის სადავოდ ხდიდა "იმედის" და "მაესტროს" იმ მასალებს, რომლები ეხებოდა მისი შვილის, 2017 წელს პანკისში სპეცოპერაციისას მოკლული თემირლან მაჩალიკაშვილის სახელობის წყაროს გახსნას ბანგლადეშში.  

მალხაზ მაჩალიკაშვილი ასევე დავობდა, რომ დარღვეული იყო ქარტიის მე-11 პრინციპი, რადგან ფაქტები მისი აზრით, განზრახ დამახინჯდა და მე-7 პრინციპი, რომელიც დისკრიმინაციას კრძალავს. თუმცა, საბჭომ მიიჩნია, რომ ეს პრინციპები სადავო მასალაში არ დარღვეულა.

საქმის განხილვას ესწრებოდა განმცხადებლის წარმომადგენელი. მირიან ბოქოლიშვილმა საბჭოს საკუთარი მოსაზრება წერილობით გამოუგზავნა და ტელეფონით უპასუხა დამატებით კითხვებს. ნატალია მახვილაძეს საბჭოსთვის შეპასუხება არ გამოუგზავნია და არც სხდომას დასწრებია.

გადაწყვეტილების სამოტივაციო ნაწილი მოგვიანებით გამოქვეყნდება.

საქართველოს ჟურნალისტური ეთიკის ქარტიის საბჭოს გადაწყვეტილებით Topnews.com.ge-ს რედაქტორმა ქრისტინე ქარჩხაძემ ქარტიის პირველი (სიზუსტე) და მეხუთე (შესწორება) პრინციპები დაარღვია.

მის წინააღმდეგ ქარტიას მომართა ხათუნა კირკიტაძემ, რომელიც მიიჩნევდა, რომ Topnews.com.ge-ის მიერ გამოქვეყნებული მასალა ბაღდათის მუნიციპალიტეტში კომისიების წევრების ხელფასების შესახებ არღვევდა ეთიკურ სტანდარტებს.  მისი აზრით გარდა სიზუსტისა და შესწორების პრინციპებისა, ასევე არ იყო დაცული ქარტიის მესამე (დადასტურებული წყარო) და მეთერთმეტე (ფაქტის განზრახ დამახინჯება) პრინციპები, თუმცა საბჭომ ამ პრინციპების დარღვევა არ დაადგინა.

საქმის განხილვაში ორივე მხარემ მონაწილეობა დისტანციურად მიიღო, საკუთარი მოსაზრებები საბჭოს ტელეფონით და წერილობით აცნობეს. 

გადაწყვეტილების სამოტივაციო ნაწილი მოგვიანებით გამოქვეყნდება.

14 ოქტომბერს, ორშაბათს, საქართველოს ჟურნალისტური ეთიკის ქარტიის საბჭო სამ საქმეს განიხილავს.

განსახილველი საქმეებია:

1. 15:00 საათი -  ხათუნა კირკიტაძე topnews.com.ge-ს რედაქტორის, ქრისტინა ქარჩხაძის წინააღმდეგ

სადავო გახდა topnews.com.ge-ის მიერ გამოქვეყნებული მასალა, რომელიც ეხება ბაღდათის მუნიციპალიტეტში კომისიების წევრების ხელფასებს. განმცხადებელი მიიჩნევს, რომ ჟურნალისტი მიზანმიმართულად ავრცელებს ცრუ ინფორმაციას ბაღდათის მუნიციპალიტეტის შესახებ, ეს მასალები არის ცალმხრივი და მათში არ არის წარმოჩენილი მეორე მხარის პოზიცია. 

სადავო პრინციპები: პირველი, მესამე, მეხუთე, მეათე და მეთერთმეტე. 

2. 16:00 საათი - მალხაზ მაჩალიკაშვილი "პრაიმტაიმის" რედაქტორის, მირიან ბოქოლიშვილის წინააღმდეგ; 

3. 17:00 საათი - მალხაზ მაჩალიკაშვილი ტელეკომპანია "იმედის" ჟურნალისტის, ნატა მახვილაძის წინააღმდეგ.

სადავოა "პრაიმ ტაიმის" და "იმედის"  მიერ მომზადებული ის მასალები, რომლებიც ეხება მალხაზ მაჩალიკაშვილის შვილის, 2017 წელს პანკისში ჩატარებული სპეცოპერაციისას მოკლული თემირლან მაჩალიკაშვილის სახელობის წყაროს გახსნას ბანგლადეშში. მასალების მიხედვით, ინტერპოლით არის ძებნილი იმ ორგანიზაციის ხელმძღვანელი, რომელმაც წყარო გახსნა. მალხაზ მაჩალიკაშვილის განცხადების თანახმად, ჟურნალისტებმა მცდარი და დაუზუსტებელი ინფორმაცია მიაწოდეს აუდიტორიას, რითიც დაარღვიეს ქარტიის პირველი პრინციპი (სიზუსტე), ამასთან, ფაქტები განზრახ დაამახინჯეს, რასაც ქარტიის მეთერთმეტე პრინციპი უმძიმეს პროფესიულ დანაშაულად მიიჩნევს. მისი აზრით, ასევე დარღვეულია ქარტიის მეშვიდე პრინციპიც, რომელიც დისკრიმინაციას კრძალავს.

სადავო პრინციპები: პირველი, მეშვიდე და მეთერთმეტე. 

ქარტიის საბჭო საქმეებს ღია სხდომაზე განიხილავს

3-4 ოქტომბერს, თბილისში ევროპის დამოუკიდებელი თვითრეგულირების ორგანოების წლიური კონფერენცია (AIPCE 2019) გაიმართა, რომელსაც საქართველოს ჟურნალისტური ეთიკის ქარტიამ უმასპინძლა. ღონისძიებას 22 ქვეყნის პრესის საბჭოები სტუმრობდნენ, მათთან ერთად კონფერენციას საქართველოში მედიასფეროში მომუშავე 120  მონაწილე ესწრებოდ. 

კონფერენცია, რომლის მთავარი თემა იყო მედია ცვლილებების ეპოქაში, ევროპის საბჭოს დახმარებით გაიმართა. ღონისძიება გახსნეს ქარტიის აღმასრულებელმა დირექტორმა, ნატა ძველიშვილმა,  
ევროპის საბჭოს საქართველოს ოფისის ხელმძღვანელმა კრისტიან ურსემ და AIPCE-ს მმართველი კომიტეტის წევრებმა  ელინა გრუნდსტრომმა (ფინეთი) და კატერინა ნიკოლაუმ (კვიპროსი) 

ხუთშაბათს, 3 ოქტომბერს, 10:00 საათზე სასტუმრო შერატონ გრანდ მეტეხი პალასში (თელავის ქუჩა 20) გაიხსნება ევროპის დამოუკიდებელი პრესის საბჭოების ალიანსის (AIPCE) ყოველწლიური კონფერენცია.

საქართველოს ჟურნალისტური ეთიკის ქარტიის საბჭო თვალს ადევნებს საზოგდოებრივი მაუწყებლის აჭარის ტელევიზიასა და რადიოში განვითარებულ მოვლენებს. მას შემდეგ, რაც მრჩეველთა საბჭომ იმპიჩმენტით თანამდებობიდან გაათავისუფლა დირექტორი, სამი კონკურსის გამართვის შემდეგ ვერ მოახერხა ახალი დირექტორის არჩევა და უკვე 5 თვეა მაუწყებელი ფაქტობრივად დირექტორის გარეშე ფუნქციონირებს, მეოთხედ გამოცხადებული კონკურსი კი სასამრთლოს განჩინებით შეჩერდა. ამ მოთხოვნით სასამართლოს დირექტორობის ერთ-ერთმა კანდიდატმა, გოგა კოხრეიძემ მიმართა. ის მიიჩნევს, რომ მრჩეველთა საბჭოს სხდომის ის ოქმი უნდა გაუქმდეს, რომლითაც მესამე კონკურსი ჩაიშალა და გოგა კოხრეიძე უნდა გამოცხადდეს არჩეულ დირექტორად. სასამართლომ განჩინება ზუსტად იმ დღეს გამოიტანა, როდესაც მეოთხე კონკურსში მონაწილეობისთვის განაცხადების მიღების ვადა უნდა ამოწურულიყო.

საქართველოს ჟურნალისტური ეთიკის ქარტიის საბჭოს გადაწყვეტილებით, ონლაინ გამოცემა mcm.ge - ს რედაქტორმა ეკა გულუამ ქარტიის შემდეგი პრინციპები დაარღვია: პირველი (სიზუსტე), მეშვიდე (დისკრიმინაცია) და მეთერთმეტე (ფაქტის განზრახ დამახინჯება).

მის წინააღმდეგ ქარტიას მიმართა მიხეილ მეფარიშვილმა, რომელიც სადავოდ ხდიდა mcm.ge-ზე გამოქვეყნებულ 6 მასალას. ყველა მათგანი ეხებოდა თბილისი პრაიდს. საქმის განხილვას ესწრებოდა განმცხადებელი, მოპასუხე ჟურნალისტმა საკუთარი პოზიცია საბჭოს წერილობით წარუდგინა.

გადაწყვეტილების სამოტივაციო ნაწილი მოგვიანებით გამოქვეყნდება.

საქართველოს ჟურნალისტური ეთიკის ქარტიის საბჭოს გადაწყვეტილებით, ტელეკომპანია "იმედის" წამყვანმა ირაკლი ჩიხლაძემ  დაარღვია ქარტიის მეშვიდე პრინციპი, რომელიც ჟურნალისტს დისკრიმინაციის თავიდან არიდებას ავალდებულებს.

სადავო გახდა გადაცემის "პირისპირ" ის ნაწილი, სადაც "პატრიოტთა ალიანსის" ლიდერი ირმა ინაშვილი საუბრობდა. მან თბილისში გამართულ აქცია "გეი რევოლუციად" მოიხსენია.

საქმის განხილვას მხოლოდ განმცხადებელი ესწრებოდა, მოპასუხე ჟურნალისტს განხილვაში მონაწილეობა არ მიუღია და არც შეპასუხება წარმოუდგენია.

გადაწყვეტილების სამოტივაციო ნაწილი მოგივიანებით გამოქვეყნდება.

საქართველოს ჟურნალისტური ეთიკის ქარტიის საბჭომ განიხილა საზოგადოებრივი მაუწყებლის მიერ მომზადებული ორი მასალა, რომელიც ჟურნალისტიკის რესურს ცენტრის (JRC)  ფილმს ეხებოდა.  ქარტიას სწორედ JRC-მ მიმართა. 

პირველი სადავო მასალა ეთერში 16 აგვისტოს გავიდა.  წამყვანმა რატი ხვისტანმა საზოგადოებას გააცნო საზოგადოებრივი მაუწყებლის განცხადება, რომლითაც მაუწყებელი გამოეხმაურა JRC-ს ფილმს "რეკლამის ეფექტი საზოგადოებრივ მაუწყებელზე".  განმცხადებლის მოსაზრებით, მასალა დაუბალანსებელი და შეცდომაში შემყვანი იყო. ქარტიის საბჭომ მსჯელობის შემდეგ დაადგინა, რომ რატი ხვისტანმა დაარღვია ქარტიის პირველი (სიზუსტე)  და მეხუთე (შესწორება) პრინციპები. განმცხადებელი დავობდა მეთერთმეტე პრინციპზეც, რომელიც უმძიმეს პროფესიულ დანაშაულად მიიჩნევს ფაქტის განზრახ დამახინჯებას. თუმცა ამ მუხლზე მსჯელობისას საბჭომ გადაწყვეტილება ვერ მიიღო. საქმის წარმოების წესის თანახმად, იმისათვის რომ დადგინდეს რომელიმე პრინციპის დარღვევა ან არდარღვევა, საჭიროა საბჭოს მინიმუმ 5 წევრის თანხმობა. ამ შემთხვევაში კი ხმები გაიყო.

მეორე სადავო სიუჟეტი ასევე ეხებოდა JRC-ს ფილმს "რეკლამის ეფექტი საზოგადოებრივ მაუწყებელზე" და საზოგადოებრივი მაუწყებლის სამეურვეო საბჭოს მიერ ამ ფილმის განხილვას.  ამ შემთხვევაში საბჭომ დაადგინა, რომ სიუჟეტის ავტორმა ქეთი ქაშაკაშვილმა დაარღვია როგორც პირველი (სიზუსტე) და მეხუთე (შესწორება), ასევე მეთერთმეტე (ფაქტის განზრახ დამახინჯება) პრინციპის დარღვევა.

საქმის განხილვას მხოლოდ განმცხადებელი ესწრებოდა. მოპასუხე ჟურნალისტებს განხილვაში მონაწილეობა არ მიუღიათ და არც შეპასუხება წარმოუდგენიათ.

გადაწყვეტილების სამოტივაციო ნაწილი მოგვიანებით გამოქვეყნდება.

საქართველოს ჟურნალისტური ეთიკის ქარტიის საბჭო დამოუკიდებელ მედიაზე ზეწოლად მიიჩნევს „ბათუმელებისა“ და „ნეტგაზეთის“ გამომცემლისა და დირექტორის მზია ამაღლობელის და მისი ახლო ნათესავების მიმართ, შინაგან საქმეთა სამინისტროს მხრიდან განხორციელებულ ქმედებებს.

საქმე ეხება ბათუმში, 16 სექტემბერს, შინაგან საქმეთა სამინისტროს ცენტრალური კრიმინალური პოლიციის დეპარტამენტის სპეციალური ღონისძიების სამმართველოს მეორე განყოფილების უფროსს როინ კოჩალიძესა და მზია ამაღლობელის ნათესავებს შორის მომხდარ ინციდენტს.

საქართველოს ჟურნალისტური ეთიკის ქარტიის საბჭოს გადაწყვეტილებით, საზოგადოებრივი მაუწყებლის  აჭარის ტელევიზიისა და რადიოს ჟურნალისტმა, სოფო შაიშმელაშვილმა დაარღვია ქარტიის მეშვიდე (დისკრიმინაცია) და მერვე (ბავშვის ინტერესი) პრინციპები.  

მის წინააღმდეგ განცხადება ანა არგანაშვილმა შემოიტანა. ის სადავოდ ხდიდა გადაცემა "რადიოვიზიაში" გასულ სიუჟეტს, რომელიც ეხება იმ ბავშვებს, რომლებიც ქუჩაში მოწყალებას ითხოვენ. განმცხადებელი მიიჩნევდა, რომ მასალა იყო დისკრიმინაციული და გათვალისწინებული არ ყოფილა ბავშვის საუკეთესო ინტერესი.

საქმის განხილვას ესწრებოდა განმცხადებლის წარმომადგენელი, მოპასუხე ჟურნალისტმა საბჭოს შეპასუხება წერილობითი სახით წარმოუდგინა.

გადაწყვეტილების სამოტივაციო ნაწილი მოგვიანებით გამოქვეყნდება.

2019 წლის 21 სექტემბერს გავრცელებული ინფორმაციის თანახმად, ,,ბათუმელების” დამფუძნებლის ახლობლებს პოლიციაზე თავდასხმას ედავებიან. მთავარი რედაქტორი, ეთერ თურაძე კი არ გამორიცხავს, რომ პოლიციის მიერ განხორციელებული ღონისძიება შესაძლოა იყოს მესიჯი გამოცემის მიმართ.