მიმდინარე წლის 25 იანვარს, შაბათს, ქარტიის საბჭო ორ განცხადებას განიხილავს. 13:00 საათზე ჩანიშნულია "ევექსის ჰოსპიტლების" განცხადების განხილვა, რომელიც ეხება commersant.ge - ზე გამოქვეყნებულ სტატიას "გადაჭარბებული საკეისრო ოპერაციები - „ევექსი“ მორიგ სკანდალში ეხვევა",   განმცხადებელი მიიჩნევს რომ აღნიშნულ სტატიაში დარღვეულია ქარტიის 1 (სიზუსტე) და 11 (განზრახ დამახინჯება) პრინციპები.

მეორე განცხადება, რომელიც ასევე განხილული იქნება სხდომაზე,  ეხება “თავისუფლების მონიტორის" მიერ მომზადებულ სიუჟეტს  "სადავო 40 გვერდი დისერტაციიდან - დოკუმენტები თსუ-ს რექტორს პლაგიატში ამხელს".    აღნიშნული საქმე განიხილება ივანე ჯავახიშვილის სახელობის თბილისის სახელმწიფო უნივერსიტეტის საზოგადოებასთან ურთიერთობის დეპარტამენტის განცხადების საფუძველზე, რომელიც დარღვეულად მიიჩნევს 1 (სიზუსტე) და 5 (შესწორება) პრინციპებს. საქმის განხილვა 15:00 საათზეა ჩანიშნული.

 

ქარტიის საბჭოს სამდივნომ დასაშვებად სცნო  რუსთავის მე-2 საჯარო სკოლის მასწავლებლის, ნელი უკლებას განცხადება  ტელეკომპანია "მთავარის" ეთერში გასულ სიუჟეტთან დაკავშირებით.  განმცხადებელი თვლის რომ სადავო სიუჟეტში დაირღვა ქარტიის 1 (სიზუტე), 3 (წყარო), 4  (კეთილისნდისიერი მეთოდები)  პრინციპები.  განცხადებას ქარტიის საბჭო ღია სხდომაზე განიხილევს.

საბჭოს გადაწყვეტილებით euronews.ge გამოქვეყნებულ სტატიაში ,,საქართველოდან სტამბულში სამკურნალოდ გაგზავნილი ლეიკემიით დაავადებული პაციენტი მოატყუეს” დაირღვა ქარტიის პირველი (სიზუსტე) და მე-10 (პირადი ცხოვრება) პრინციპი. არ დადგინდა მე-3 (წყარო), მე-4 (კეთილსინდისიერი მეთოდები) და მე-11 (გაზრახ დამახინჯება) პრინციპების დარღვევა. საქმე განხილული იქნა განმცხადებელ მანანა გურგენიძის განცხადების საფუძველზე.


პირველი პრინციპის (სიზუსტე)  დარღვევა დადგინა საქმეში, სადაც განმცხადებლებს წარმოადგენდნენ MDF, საფარი და თამთა თოდაძე, ხოლო სადავო იყო alia.ge ზე გამოქვეყნებული სტატია ,,თამთა თოდაძე ნაცმოძრაობის ახალგაზრდულის საკმაოდ აქტიური წევრი იყო!”.  საბჭოს მოსაზრებით ამ შემთხვევაში მე-7 (დისკრიმინაცია) და 11 (გაზრახ დამახინჯება) პრინციპების დარღვევას ადგილი არ ჰქონია.

სამმა მედია საშუალებამ bpn.ge, commersant.ge, ipn.ge დაარღვია ქარტიის პირველი (სიზუსტე) და მე-5 (შესწორება) პრინციპები. განცხადება ეხებოდა ზემოაღნიშნულ მედია საშუალებების მიერ მომზადებულ/გაზიარებულ სტატიას ბიზნესმენ დავით ბეგიაშვილზე. განმცხადებელს ამ საქმეში თავად დავით ბეგიაშვილი წარმოადგენდა.

კიდევ ერთი საქმე რომელიც საბჭომ განიხილა ეხებოდა შპს „ფრანს ავტოს“ განცხადებას ფლანგვის დეტექტორის წინააღმდეგ. განმცხადებელი ქარტიის სამ პრინციპს - პირველი (სიზუსტე) და მე-5 (შესწორება), 11 (გაზრახ დამახინჯება) თვლიდა დარღვეულად ფლანგვის დეტექტორის მიერ მომზადებულ მასალაში რომელიც ეხებოდა სპორტის ყოფილ მინისტრს, ტარიელ ხეჩიკაშვილს და მისი ოჯახის წევრებს. საბჭომ მიიჩნია რომ ამ პრინციპების დარღვევას ადგილი არ ჰქონია. აქვე აღსანიშნავია, რომ საბჭოს ერთმა წევრმა დააფიქსირა განსხვავებული აზრი და მიიჩნია რომ სადავო ჟურნალისტურ პროდუქტში დაირღვა პირველი (სიზუსტე) პრინციპი.

საქმეში ეკატერინე მესხიძე ტელეკომპანია მაესტროს ჟურნალისტების სალომე გოგოხია, სანდრო კაჭახიძის წინააღმდეგ დადგინა პირველი (სიზუსტე) და მე 7 (დისკრიმინაცია) პრინციპების დარღევა. საბჭოს შეფასებით ჟურნალისტებმა მიაწოდეს ინფორმაცია მაყურებელს რომ თითქოს საჯარო რეესტრის ეროვნული სააგენტოს ყოფილი უფროსი პაპუნა უგრეხელიძე სასამართლომ გაამართლა სექსუალურ შევიწროებაში, არა და როგორც მოკვლეული იქნა სასამართლოს საერთოდ არ უმსჯელია ამ თემაზე.

გადაწყვეტილებათა სამოტივაციო ნაწილი მოგვიანებით გამოქვეყნდება.

ტელეკომპანიების, TV პირველის, რუსთავი 2-ის, კავკასიის, ასევე რამდენიმე რეგიონული არხის ანგარიშებზე, საბიუჯეტო დავალიანების გადაუხდელობის გამო, შემოსავლების სამსახურმა საინკასო დავალება წარადგინა. მსგავს ავტომატურ სანქციას საქართველოს ხელისუფლება წლების განმავლობაში არ იყენებდა მსხვილი მაუწყებლების მიმართ.

21 დეკემბერს თბილისი მარიოტში ქარტიის ყოველწლიური, რიგით მეთერთმეტე საერთო კრება გაიმართა. საერთო კრებაზე წევრების წინაშე ანგარიშებით წარდგნენ ქარტიის საბჭოს თავმჯდომარე ნანა ბიგანიშვილი, სარევიზო კომისიის თავმჯდომარე ალეკო ცქიტიშვილი და ქარტიის აღმასრულებელი დირექტორი გიორგი მგელაძე. საერთო კრებაზე გამოვლინდნენ ქარტიის პრიზის 2019 წლის გამარჯვებულებიც.

ყოველწლიურად ქარტიის პრიზი რამდენიმე ნომინაციაში გაიცემა. წელს ქარტიის პრიზი ხუთ ჟურნალისტს გადაეცა:

• ვიდეორეპორტაჟი - ბესო გვენეტაძე, ინდიგო
• მულტიმედია პროექტი - ლაშა ცერცვაძე, ინდიგო
• სტატია ან ნარკვევი ბეჭდურ ან ონლაინ მედიაში -ლუკა პერტაია, ნეტგაზეთი
• ჟურნალისტური გამოძიება - ნინო რამიშვილი, სტუდია მონიტორი
• ბავშვთა საკითხები - ეკა ქევანიშვილი, რადიო თავისუფლება

პირველ ოთხ კატეგორიაში კონკურსი გამოცხადებული იყო IREX-ის მხარდაჭერით; ბავშვთა საკითხების ეთიკურად გაშუქებისთვის, პრიზი დაწესებული იყო გაეროს ბავშვთა ფონდის საქართველოს წარმომადგენლობის მიერ;

გამარჯვებულებს საჩუქრად ქარტიის სპეციალური პრიზები და ლეპტოპები გადაეცათ.

საერთო კრებაზე საქართველოს ჟურნალისტური ეთიკის ქარტიის წევრებმა ქარტიის საბჭოს სამი ახალი წევრი აირჩიეს.

საბჭოს წევრები გახდნენ:

• თბილისის კვოტით - ზვიად ქორიძე
• რეგიონების კვოტით - ნინა ხელაძე და ნათია ზოიძე

საბჭოს წევრებმა თავმჯდომარედ, ერთი წლის ვადით, კვლავ ნანა ბიგანიშვილი აირჩიეს. ქარტიის საბჭოში სულ 9 წევრია, 6 წევრი რეგიონულ მედიას წარმოადგენს, 3 კი - თბილისს.

საბჭოს ახალი შემადგენლობა ასე გამოიყურება:

1. ნანა ბიგანიშვილი (თავმჯდომარე)
2. ლიკა ზაკაშვილი
3. ზვიად ქორიძე
4. გელა მთივლიშვილი
5. ირმა ზოიძე
6. ნინა ხელძე
7. მაია მერკვილაძე
8. კამილა მამედოვა
9. ნათია ზოიძე

ქარტიის წევრებმა დღეს სარევიზიო კომისიის სამი ახალი წევრიც აირჩიეს:

1. მარიკა დუდუნია
2. ნინო კაკულია
3. გუბაზ მეგრელიძე

დღის ბოლოს წევრებს შორის დისკუსია გაიმართა, სადაც ქარტიის წევრებმა მედიაში არსებულ პრობლემებსა და გამოწვევაზე ისაუბრეს.

20 დეკემბერს ქარტიის საბჭომ  გადაწყვეტილება სამ საქმეზე მიიღო. პირველი გადაწყვეტილება დეპუტატ დავით სონღულაშვილის განცხადებას ეხებოდა, დეპუტატი ჟურნალისტ რუსო ჯაბანაშვილს ქარტიის პირველი, მესამე და მეხუთე პრინციპის დარღვევას ედავებოდა. განმცხადებელს პრეტენზიები ჰქონდა ტელეკომპანია მთავარის ეთერში გასულ სიუჟეტზე, რომელიც დეპუტატის ბიზნეს ინტერესებს ეხებოდა. საბჭოს გადაწყვეტილებით ამ სიუჟეტში დაირღვა ქარტიის პირველი პრინციპი (სიზუსტე) და არ დარღვეულა მესამე (დადასტურებული წყარო) და მეხუთე პრინციპი (შესწორება).

საბჭომ მეორე გადაწყვეტილება ჟურნალისტ დავით დვალიშვილის წინააღმდეგ მიიღო, ორგანიზაცია “პლატფორმა ახალი შესაძლებლობებისთვის” სადავოდ ხდიდა ტელეკომპანია რუსთავი 2-ს ეთერში გასულ სიუჟეტს, განმცხადებელი მიიჩნევდა, რომ ამ სიუჟეტით მოხდა სექსუალური ძალადობის შესაძლო მსხვერპლის პირადი ცხოვრების უფლების დარღვევა. აღნიშნულ სიუჟეტში საბჭომ დაადგინა, რომ დავით დვალიშვილმა ქარტიის მეათე პრინციპი (პირადი ცხოვრება) დაარღვია

მესამე გადაწყვეტილება ორგანიზაცია „საორსას“ განცხადებას ეხებოდა, რომელმაც ქარტიას ჯაბა ანანიძის და ეთერ თურაძის წინააღმდეგ მომართა. დავა ეხებოდა ბათუმელების სტატიას სახელწოდებით “კაცების ხელში აღარ იქნება ყველაფერი - ქალები აჭარის მთებიდან”. განმცხადებელი მიიჩნევდა რომ მასალაში მოყვანილი ფაქტები არაზუსტი იყო და მისი შესწორება არ მოხდა. ქარტიის საბჭოს გადაწყვეტილებით ჯაბა ანანიძეს და ეთერ თურაძეს აღნიშნულ მასალაში ქარტიის პრინციპები პირველი (სიზუსტე) და მეხუთე (შესწორება) არ დაურღვევიათ.
გადაწყვეტილებების სამოტივაციო ნაწილები მოგვიანებით გამოქვეყნდება

21 დეკემბერს, შაბათს, 16:00 საათზე, საქართველოს პარლამენტის წინ, ჟურნალისტური ეთიკის ქარტიის ორგანიზებით საპროტექსტო აქცია გაიმართება. მედიის წარმომადგენლები ბოლო პერიოდში მომრავლებულ ხელშეშლის ფაქტებს გააპროტესტებენ.

ქარტიის დაკვირვებით, ჟურნალისტების მიმართ განხორციელებულ ძალადობებსა და ხელშეშლაზე ხელისუფლების რეაქცია არ არის სათანადო. ხშირად ზეწოლის ფაქტებზე დაწყებული გამოძიება ფორმალურ სახეს ატარებს და არ მიმდინარეობს კანონით დადგენილი წესით და შესაბამისი კვალიფიკაციით. არცთუ იშვიათად მაღალი პოლიტიკური თანამდებობის პირები თავად ახდენენ მედიაზე ძალადობის წახალისებას.

ბოლო პერიოდში ასეთი მრავალი ფაქტი დაგროვდა: თბილისის საკრებულოს შენობიდან და პარლამენტის კომიტეტიდან მედიის წარმომადგენლების გამოძევება, ქუჩებში - აქციებზე მომუშავე ჟურნალისტებზე თავდასხმა, პოლიტიკოსების მხრიდან შეურაცხყოფის ფაქტების მომრავლება, საჯარო ინფორმაციის მიღების გართულება, აჭარის ტელევიზიაში განვითარებული მოვლენები და ა.შ.

აქციის დღეს, 21 დეკემბერს 6 თვე სრულდება ე.წ “გავრილოვის ღამის” საპროტესტო აქციის დაშლიდან, სადაც მედიის 40-მდე წარმომადგენელი დაზიანდა, თუმცა ამ ფაქტის შესახებ ეფექტური გამოძიება და ჟურნალისტების დაშავებაში მონაწილე პირების გამოვლენა და დასჯა დღემდე არ მომხდარა.

საპროტესტო აქციაზე საქართველოს ყველა რეგიონიდან ჩამოსული ჟურნალისტები გააპროტესტებენ მათი საქმიანობისას შექმნილ პრობლემებს და ხელისუფლებას სწრაფი და ადეკვატური რეაგირებისკენ მოუწოდებენ.

ქარტია დღეის მდგომარეობით 340-ზე მეტ ჟურნალისტს აერთიანებს. საერთო კრებაზე წლიურ ანგარიშს წარადგენენ საბჭოს და სარევიზიო კომისიის თავმჯდომარეები და ქარტიის აღმასრულებელი დირექტორი. ქარტიის წევრები განიხილავენ ორგანიზაციის წინაშე მდგარ გამოწვევებს და იმსჯელებენ მათი გადაჭრის გზებზე.

ამავე დღეს მოხდება ქარტიის საბჭოს სამი ახალი წევრის და თავმჯდომარის არჩევა.

საერთო კრებაზე გამოვლინდებიან ქარტიის მიერ დაწესებული ყოველწლიური კონკურსის „ქარტიის პრიზის“ 2019 წლის გამარჯვებულები.

პრიზები გაიცემა შემდეგ ნომინაციებში:

• ვიდეორეპორტაჟი
• მულტიმედია პროექტი (1 მასალა ან სერია)
• სტატია ან ნარკვევი ბეჭდურ ან ონლაინ მედიაში
• ჟურნალისტური გამოძიება
• ბავშვთა საკითხები

პირველ ოთხ კატეგორიაში კონკურსი ცხადდება IREX-ის პროექტის მხარდაჭერით, ხოლო "ბავშვთა საკითხები"-ს პრიზი დაწესებულია გაეროს ბავშვთა ფონდის საქართველოს წარმომადგენლობის მიერ.

12:00 საათი - მანანა გურგენიძე euronews.ge - ის წინააღმდეგ. დავა ეხება მასალას სათაურით: “საქართველოდან სტამბულში სამკურნალოდ გაგზავნილი ლეიკემიით დაავადებული პაციენტი მოატყუეს” განმცხადებელი თვლის რომ მასალაში ქარტიის რამდენიმე პრინციპია დარღვეული, მათ შორის ინფორმაციის სიზუსტის და ფაქტის განზრახ დამახინჯების პრინციპები. სადავო პრინციპები: პირველი, მესამე, მეოთხე, მეათე და მეთერთმეტე.

12:30 საათი - მედიის განვითარების ფონდი (MDF), საფარი, თამთა თოდაძე alia.ge წინააღმდეგ. განცხადება ეხება თბილისის საკრებულოს წევრის ყოფილი თანაშემწის თამთა თოდაძის შესახებ გამოქვეყნებულ სტატიას სათაურით: “თამთა თოდაძე ნაციონალების ახალგაზრდულის საკმაოდ აქტიური წევრი იყო” სადავო პრინციპები: პირველი (სიზუსტე), მეშვიდე (დისკრიმინაცია), მეთერთმეტე (ფაქტის განზრახ დამახინჯება)

13:00 საათი - დავით ბეგიაშვილი თამთა არდოტელის, commersant.ge და IPN.ge წინააღმდეგ. ჩამოთვლილ მედია საშუალებებს ბიზნესმენი დავით ბეგიაშვილი მის შესახებ არაზუსტი ინფორმაციის გავრცელებასა და შემდგომში ამ ინფორმაციის შეუსწორებლობას ედავება. სადავო პრინციპები: პირველი (სიზუსტე), მეხუთე (შესწორება).

14:00 საათი - „ფრანს ავტო“ ფლანგვის დეტექტორის წინააღმდეგ. განმცხადებელი ამ შემთხვევაში სადავოს ხდის მასალას - “მთავრობასთან დაკავშირებულმა სს “ფრანს ავტომ” 2014 წლიდან 30 მილიონის ტენდერები მოიგო”. განმცხადებელი მიიჩნევს, რომ მასალაში მოყვანილი ინფორმაცია არაზუსტია. სადავო პრინციპები: პირველი (სიზუსტე), მესამე (წყაროს დადასტურება), მეხუთე (შესწორება).

15:00 საათი - ორგანიზაცია „საორსა“ ჯაბა ანანიძის და ეთერ თურაძის წინააღმდეგ. განმცხადებელი სადავოდ ხდის მედიასაშუალება ბათუმელების სტატიას სახელწოდებით “კაცების ხელში აღარ იქნება ყველაფერი - ქალები აჭარის მთებიდან”. განმცხადებელი მიიჩნევს რომ მასალაში მოყვანილი ფაქტები არაზუსტია. სადავო პრინციპები: პირველი (სიზუსტე), მეხუთე (შესწორება)

16:00 საათი - დავით სონღულაშვილი რუსო ჯაბანაშვილის წინააღმდეგ. ამ შემთხვევაში განმცხადებელი პარლამენტში გურჯაანის მაჟორიტარი დეპუტატია, ის სადავოდ ხდის ტელეკომპანია მთავარის ეთერით გასულ სიუჟეტს, აცხადებს რომ მასში მოყვანილი ფაქტები სიმართლეს არ შეესაბამება. სადავო პრინციპები: პირველი (სიზუსტე), მეხუთე (შესწორება) .

17:00 საათი - პლატფორმა ახალი შესაძლებლობებისთვის დავით დვალიშვილის წინააღმდეგ. განმცხადებელი სადავოს ხდის ტელეკომპანია რუსთავი 2-ს ეთერში გასულ სიუჟეტს, განმცხადებელი მიიჩნევს, რომ ამ სიუჟეტით მოხდა სექსუალური ძალადობის შესაძლო მსხვერპლის პირადი ცხოვრების უფლების დარღვევა. სადავო პრინციპი: მეათე (პირადი ცხოვრება)
ქარტიის საბჭოს სხდომა ღიაა და მასზე დასწრება ყველა მსურველს შეუძლია.

ქარტიას სს “ევექსის ჰოსპიტლებმა”, მედიაგამოცემა “commersant.ge”-ის ჟურნალისტის - სოფო ქსოვრელის წინააღმდეგ განცხადებით მომართა. სადავო მასალა ვებგვერდზე 2019 წლის 5 დეკემბერს გამოქვეყნდა სათაურით: “გადაჭარბებული საკეისრო ოპერაციები - “ევექსი” მორიგ სკანდალში ეხვევა".  სტატიის მიხედვით კლინიკა საკეისრო კვეთების ჩატარებისას მსოფლიო ჯანდაცვის ორგანიზაციის რეკომენდაციების არ გათვალისწინების გამო, გარკვეული ოდენობის თანხით დაჯარიმდა.

მხარის მტკიცებით, მედიასაშუალებას ისე აქვს წარმოჩენილი, რომ თითქოს “ევექსის ჰოსპიტლების” ერთ-ერთი კლინიკა, საკეისრო კვეთების ამ ფორმით ჩატარებას მატერიალური სარგებლის მიღებისთვის ახდენს. განმცხადებელი ამბობს, რომ ეს ინფორმაცია მცდარია.

ასევე არაზუსტად მიიჩნევს “ევექსის ჰოსპიტლები” ინფორმაციას იმის შესახებ, რომ მათი ქსელი ჯანდაცვის მსოფლიო სტანდარტებს ვერ აკმაყოფილებს. მასალაში არ არის მოყვანილი ამის დამამტკიცებელი არგუმენტები, რაც ზიანს აყენებს სამედიცინო დაწესებულების რეპუტაციას.

განმცხადებელი მედიასაშუალებას ინფორმაციის სიზუსტესა (1-ლი) და ფაქტის განზრახ დამახინჯების (მე-11) პრინციპის დარღვევას ედავება.

ქარტიის საბჭო საქმეს ღია სხდომაზე განიხილავს.

“თავისუფლების მონიტორის” ჟურნალისტს ნინო რამიშვილს ივანე ჯავახიშვილის სახელობის თბილისის სახელწიფო უნივერსიტეტის საზოგადოებასთან ურთიერთობის დეპარტამენტი ქარტიის პრინციპების (1-ლი და მე-5) დარღვევას ედავება. სადავო მასალა სათაურით “სადავო 40 გვერდი დისერტაციიდან - დოკუმენტები თსუს რექტორს პლაგიატში ამხელს” რადიო თავისუფლების ვებგვერდზე 15 ნოემბერს განთავსდა. სიუჟეტი უნივერსიტეტის რექტორის ნაშრომში პლაგიატის აღმოჩენის ფაქტს ეხება.

განმცხადებელი ამბობს, რომ როგორც სიუჟეტის სათაური ასევე სიუჟეტში მოთხრობილი ამბავი არაზუსტია. მისი თქმით, ჟურნალისტი მასალაში არ იყენებს საერთაშორისოდ აღიარებულ ნორმებს პლაგიატის დადგენის შესახებ და არგუმენტად მოჰყავს მხოლოდ ექსპერტების მოსაზრება.

თსუ-ს წარმომადგენელი მიიჩნევს, რომ ვინაიდან მედიასაშუალებამ მათი პრეტენზიის შემდეგაც არ მოახდინა გამოქვეყნებული სიუჟეტის ჩასწორება დარღვეულია როგორც სიზუსტის (1-ლი) ასევე ჩასწორების (მე-5) პრინციპები. ქარტიის საბჭო აღნიშნულ დავას ღია სხდომაზე განიხილავს.

დღეს საქართველოს პარლამენტის იურიდიული კომიტეტის სხდომიდან, სადაც უზენაესი სასამართლოს ახალი მოსამართლეების დამტკიცების საკითხი განიხილებოდა, მედიის წარმომადგენლების ნაწილი ძალის გამოყენებით გამოაძევეს დარბაზიდან. ჟურნალისტების მონათხრობით (ეს გავრცელებულ კადრებშიც ჩანს) კომიტეტის თავმჯდომარის მოწოდების შემდეგ - მედიას დაეტოვებინა დარბაზი, მანდატურებმა ისინი უხეში ფორმებით გამოყარეს კომიტეტის სხდომიდან. გავრცელებულ ვიდეომასალაში ისმის, რომ მანდატურების ამ ქმედებას დეპუტატთა ნაწილიც ახალისებდა., “გამოათრიეთ ეხლავე”, “გამოყარეთ” - ისმის კადრებში.