არასამთავრობო ორგანიზაცია "მმართველობის მონიტორინგის ცენტრის" მედიაპროექტს "ფლანგვის დეტექტორს" სს "ფრანს ავტო" ქარტიის სამი: 1-ლი, მე-5 და მე-11 პრინციპის დარღვევას ედავება.

სადავო მასალა ეხება 2019 წლის ივლის-აგვისტოში, საქართველოს მთავრობის მიერ, 18 მილიონი ლარის ღირებულების ავტომანქანების შესყიდვას. მასალის მიხედვით, გამარჯვებული კომპანიის, სს “ფრანს ავტოს” დამფუძნებელი სპორტის ყოფილი მინისტრის, ტარიელ ხეჩიკაშვილის ძმა, ავთანდილია; თავმჯდომარის მოადგილე დავით გოგორიშვილი კი ტარიელ ხეჩიკაშვილის დაფუძნებული “იბერია ბიზნეს ჯგუფის” დირექტორია და მან ფრანს ავტოს სამეთვალყურეო საბჭოს წევრის თანამდებობაზე ტარიელ ხეჩიკაშვილი 2015 წელს ჩაანაცვლა.

განმცხადებელი მიიჩნევს, რომ "ფლანგვის დეტექტორმა" იმაზე აპელირებით, რომ ვინმემ რაიმე ზეგავლენა მოახდინა ტენდერზე, საზოგადოება შეცდომაში შეიყვანა. ამავე განცხადების თანახმად, სტატია მიზნად ისახავს მეწარმე სუბიექტის დისკრედიტაციას და მისთვის ზიანის მიყენებას. რაც შეეხება მეხუთე პრინციპს, განცხადებელი დაობს, რომ მედიამ არ შეასწორა ინფორმაცია, რომელსაც შეცდომაში შეყავს საზოგადოება.

ქარტის საბჭომ სს "ფრანს ავტოს" განცხადება დასაშვებად სცნო და საქმეს ღია სხდომაზე განიხილავს. 

საქართველოს ჟურნალისტური ეთიკის ქარტიის საბჭოს სამდივნომ დასაშვებად სცნო დავით ბეგიაშვილის განცხადება სამი მედიასაშუალების: commersant.ge, ipn.ge და bpn.ge-ს  წინააღმდეგ.

საქმე ეხება სამივე მედიასაშუალების მიერ გავრცელებულ იდენტურ მასალას, სახელწოდებით:  „ვინ არის კიდევ ერთი ბიზნესმენი, რომელიც ხაზარაძის 36 კაციან სიაშია“. განცხადების თანახმად, commersant.ge-მ და bpn.ge-მ მასალა ვებგვერდზე გამოაქვეყნეს, ipn.ge-მ კი მის სოციალურ გვერდზე გააზიარა bpn.ge-ს მასალა. 

განმცხადებლით თქმით, ჩამოთვლილმა მედია საშუალებებმა მისი და მისი კომპანიების შესახებ არაზუსტი ინფორმაცია გაავრცელეს,  შესაბამისად, მხარე მიიჩნევს, რომ ვებგვერდებზე გამოქვეყნებული მასალით დაირღვა ქარტიის პირველი - ინფორმაციის სიზუსტე და მეხუთე პრინციპი - არაზუსტი ინფორმაციის შესწორება.

ქარტიის საბჭო განცადებას ღია სხდომაზე განიხილავს.

"საქართველოს ჟურნალისტური ეთიკის ქარტიის საბჭო" შეშფოთებას გამოთქვამს ხელისუფლების წევრების მხრიდან მედიის წარმომადგენლებზე გახშირებული თავდასხმების გამო. გუშინ, 14 ნოემბერს “ქართული ოცნების” ერთ-ერთმა ლიდერმა ირაკლი კობახიძემ "ტელეკომპანია პირველის" ტოქშოუს წამყვანი კრიტიკული კითხვების პასუხად “ნაციონალური მოძრაობის” ინტერესების გატარებაში დაადანაშაულა.

გუშინვე, ოპოზიციასთან კავშირში დასდო ბრალი ირაკლი კობახიძემ "საზოგადოებრივი მაუწყებლის აჭარის ტელევიზიის" წამყვანსაც: “მოგიწოდებთ გაემიჯნეთ “ნაციონალურ მოძრაობას” - ასე მიმართა “ქართული ოცნების” ერთ-ერთმა ლიდერმა თეონა ბაკურიძეს.

შეგახსენებთ, რომ “ქართული ოცნების” ხელისუფლების მხრიდან აჭარის ტელევიზიის ჟურნალისტების მიმართ გალაშქრების ეს პირველი შემთხვევა არაა. ცოტა ხნის წინ ტელევიზიას მიკერძოებულობაში ბრალი ბიძინა ივანიშვილმაც დასდო. პირდაპირ ეთერში წამყვანის მიმართ აგრესიული განცხადება გააკეთა ასევე აჭარის მთავრობის თავმჯდომარემაც.

საზოგადოებას შევახსენებთ, რომ ტელევიზიის თანამშრომლები აჭარის ტელევიზიის დამოუკიდებელი სარედაქციო პოლიტიკის, ხელისუფლების მხრიდან გაკონტროლების სურვილს ხედავენ უკანასკნელ თვეებში ტელევიზიის მმართველების ცვლილებებში. ქარტიის საბჭო მოუწოდებს ხელისუფლებას, თავი შეიკავოს დამოუკიდებელი მედიიის წარმომადგენლების მიმართ დაუსაბუთებელი ბრალდებების გაჟღერებისგან. .

ხელისუფლების მხრიდან ამა თუ იმ მედიასაშუალების მიმართ ასეთი დამოკიდებულება ჩვენთვის იმის ნიშანია, რომ ხელისუფლების სურვილია შეცვალოს, დააშინოს, თუნდაც დააფიქროს ჟურნალისტები დაუბრკოლებლად გაავრცელონ თუ არა კრიტიკული ფაქტები და დასვან მწვავე კითხვები ხელისუფლების ნებისმიერი შტოს მიმართ

მოვუწოდებთ საერთაშორისო საზოგადოებას, საქართველოში პოლიტიკური პროცესების გააქტიურებასთან ერთად, გააძლიერონ მათი ყურადღება ხელისუფლების მხრიდან ჟურნალისტებზე თავდასხმის, მათი დისკრიმინაციის მცდელობის ფაქტებზე, ყველა მსგავს შემთხვევას მისცენ სათანადო შეფასება და რეაგირება.

საქართველოს ჟურნალისტური ეთიკის ქარტიის საბჭოს გადაწყვეტილებით, საქმეზე - MDF, საფარი და თამთა თოდაძე plus.kvira.ge-ს და PIA.ge-ს წინააღმდეგ, მე-10 პრინციპის დარღვევა დადგინდა.  საქმე ეხებოდა აღნიშნული მედიასაშუალებების მიერ თამთა თოდაძის დედის შესახებ მომზადებულ მასალას.

განმცხადებლები მიიჩნევდნენ, რომ kvira.plus.ge -სა და pia.ge-ზე მისი დედის ნასამართლეობის შესახებ მასალა თამთა თოდაძის დისკრედიტაციის მიზნით გავრცელდა და ამით დაირღვა ქარტიის მეათე პრინციპი - პირადი ცხოვრების ხელშეუხებლობა.

ჟურნალისტური ეთიკის ქარტიის საბჭომ იმსჯელა და აღნიშნული პრონციპის დარღვევა დაადგინა. 

 

საზოგადოებისთვის ცნობილია, რომ 8, 9 და 10 ნოემბერს თბილისსა და ბათუმში მდებარე რამდენიმე კინოთეატრში ფილმის “და ჩვენ ვიცეკვეთ” ( And then we danced) პრემიერა გაიმართება.

Ბოლო დღეებში რამდენიმე სასულიერო და საერო პირმა (ორგანიზაციამ) საჯაროდ გააკეთა განცხადება, რომ კინოთეატრებში პრემიერას ჩაშლიან.

საქართველოს ჟურნალისტური ეთიკის ქარტიის სამდივნომ დასაშვებად სცნო თამთა თოდაძის, „მედიის განვითარების ფონდის“ და „საფარის“ ერთობლივი განცხადება სამი მედიასაშუალების kvira.plus.ge, pia.ge და alia.ge. წინააღმდეგ.

სადავო მასალა ეხება 4 ოქტომბერს გავრცელებულ ინფორმაციას, რომლის თანახმადაც „ქართული ოცნების“ საკრებულოს დეპუტატს, ილია ჯიშკარიანს თავისი თანაშემწე თამთა თოდაძე სექსუალურ შევიწროებაში ადანაშაულებს.

განმცხადებლით თქმით, ორ მედისაშუალებაზე kvira.plus.ge -სა და pia.ge-ზე, თამთა თოდაძის დისკრედიტაციის მიზნით, გავრცელდა ინფორმაცია მისი დედის ნასამართლეობის შესახებ. მხარე მიიჩნევს რომ ამ ინფორმაციის გავრცელებით ვებგვერდების მიერ დაირღვა ქარტიის მეათე პრინციპი - პირადი ცხოვრების ხელშეუხებლობა.

Alie.ge-მ კი გაავრცელა ინფორმაცია თამთა თოდაძის კავშირზე ნაციონალურ მოძრაობასთან, რაც მხარის განცხადებით არღვევს ქარტიის პირველ (ინფორმაციის სიზუსტე), მეშვიდე (დისკრიმინაცია) და მეთერთმეტე (ფაქტის განზრახ დამახინკება) პრინციპს.

საქართველოს ჟურნალისტური ეთიკის ქარტიის საბჭოს გადაყვეტილებით, აღმასრულებელი დირექტორი გიორგი მგელაძე გახდა.  ის ამ დრომდე სტუდია "მონიტორის" გამომძიებელი ჟურნალისტად მუშაობდა. ასევე იყო ჟურნალისტური ეთიკის ქარტიის საბჭოს წევრი და საბჭოს თავმჯდომარე.  მან ქარტიის საბჭო 2019 წლის 22 ოქტომბერს დატოვა.

გიორგი მგელაძე ასევე ხელმძღვანელობდა ქარტიის მედიამონიტორთა ჯგუფს. მიღებული აქვს არაერთი პრიზი საუკეთესო საგამოძიებო ფილმისთვის.  

მის გარდა კონკურსის გასაუბრების ეტაპზე მონაწილეობდნენ  ნათია კაპანაძე, ეკატერინე ბასიალაია და სალომე ცეცხლაძე.

გიორგი მგელაძემ ამ პოზიციაზე ნატა ძველიშვილი შეცვალა, რომელიც ორგანიზაციას 2015 წლიდან ხელმძღვანელობდა.

საქართველოს ჟურნალისტური ეთიკის ქარტია აცხადებს ვაკანსიას მედიამონიტორის პოზიციაზე.

მოვალეობები:

• ფემიციდის, ქალთა უფლებების, ოჯახში ძალადობის და გენდერულ თემატიკაზე მომზადებული მასალების თვისებრივი ანალიზი
• ყოველთვიური მომზადება და კვლევის ხელმძღვანელისთვის წარდგენა

სამუშაოს ხანგრძლივობა: 2019 წლის ნოემბერი – 2020 წლის მაისი

ანაზღაურება: 600 ლარი თვეში გადასახადების ჩათვლით

შეირჩევა ჯამში 3 მედიამონიტორი

ძირითადი მოთხოვნები:

• ჟურნალისტად მუშაობის გამოცდილება;
• ფემიციდთან, ოჯახში ძალადობასთან, გენდერულ სტერეოტიპებთან დაკავშირებულ თემებზე მუშაობის, კვლევის გამოცდილება;
• მედიამონიტორინგის გამოცდილება ჩაითვლება უპირატესობად;
• თვისებრივი მონაცემების ანალიზის უნარი;
• ქართული ენის სრულყოფილად ცოდნა;
• საოფისე პროგრამების ცოდნა.

კონკურსში მონაწილეობის მსურველმა 2019 წლის 1 ნოემბრამდე უნდა გამოგზავნოს CV ელექტრონულ მისამართზე ethicscharter@gmail.com. სათაურში მიუთითეთ პოზიციის დასახელება.

საჯაროდ გავრცელდა საქართველოს კომუნიკაციების ეროვნული კომისიის თავმჯდომარის მიერ საზოგადოებრივი მაუწყებლის გენერალური დირექტორის, ვასილ მაღლაფერიძისადმი მიწერილი წერილი. 2019 წლის 08 ოქტომბრით დათარიღებულ წერილში, რომელსაც ხელს კომისიის თავმჯდომარე, კახა ბეექაური აწერს, შეფასებულია ,,ჟურნალისტიკის რესურს ცენტრის” მიერ მომზადებული ფილმი “რეკლამის ეფექტი საზოგადოებრივ მაუწყებელზე”. ამ წერილის თანახმად, მასალა შეიცავს ბევრ მცდარ ინფორმაციას.

საქართველოს ჟურნალისტური ეთიკის ქარტია იწყებს განაცხადების მიღებას "ქარტიის პრიზი 2019-ის" მოსაპოვებლად. ყოველწლიური კონკურსის მიზანია პროფესიული სტანდარტების დამკვიდრების და ეთიკური ჟურნალისტიკის განვითარების ხელის შეწყობა.

კონკურსი ცხადდება შემდეგ ხუთ ნომინაციაში:

• ვიდეორეპორტაჟი
• მულტიმედია პროექტი (1 მასალა ან სერია)
• სტატია ან ნარკვევი ბეჭდურ ან ონლაინ მედიაში
• ჟურნალისტური გამოძიება
• ბავშვთა საკითხები

პირველ ოთხ კატეგორიაში პრიზი გაიცემა IREX-ის პროექტის მხარდაჭერით, ხოლო ბავშვთა საკითხების საუკეთესოდ გაშუქებისთვის პრიზი დაწესებულია გაეროს ბავშვთა ფონდის საქართველოს წარმომადგენლობის მიერ. 

გამარჯვებულებს  შეარჩევს დამოუკიდებელი ჟიური.

პროცედურები და შერჩევის კრიტერიუმები:

• მონაწილეობის მსურველებმა უნდა წარადგინონ ჟურნალისტური პროდუქტი, რომელიც გამოქვეყნდა 2018 წლის 1 ნოემბრიდან 2019 წლის 15 ნოემბრამდე პერიოდში.
• საკონკურსოდ მასალის წარდგენა შეუძლია როგორც ინდივიდუალურ ჟურნალისტს, ისე მედიასაშუალებას.
• მონაწილეობის მსურველმა უნდა წარადგინოს გამოქვეყნებული მასალის ბმული. იმ შემთხვევაში თუ საკონკურსო ნამუშევარი ინტერნეტ სივრცეში არ მოიძებნება, კონკურსანტს შეუძლია გამოგზავნოს ვიდეო რეპორტაჟის და მულტიმედიის შემთხვევაში ჩანაწერი, სტატიის შემთხვევაში კი მისი სკანირებული ან სქრინ ვერსია.
• მონაწილეობის მსურველმა უნდა შეავსოს აპლიკაცია.
• დამატებითი მასალები (არსებობის შემთხვევაში)  გამოგზავნეთ შემდეგ ელექტრონულ მისამართზე: Ethicscharter@gmail.com
• თითოეულ აპლიკანტს შეუძლია ერთი საკონკურსო ნაშრომის წარდგენა ერთ ნომინაციაში
• საკონკურსო ნაშრომი გამოქვეყნებული უნდა იყოს საქართველოში მოქმედ რომელიმე მედიასაშუალებაში
• საკონკურსო ნამუშევრების მიღების ბოლო ვადაა 2019 წლის 15 ნოემბერი. 18.00 საათი.
• გამარჯვებული გამოვლინდება 2019 წლის დეკემბერში საქართველოს ჟურნალისტური ეთიკის ქარტიის საერთო კრებაზე

ნამუშევრების შეფასების ზოგადი კრიტერიუმები:

• თემის აქტუალობა/მაღალი საზოგადოებრივი ინტერესი
• თხრობის სტილი და ტექნიკა
• ინფორმაციის გადმოცემის ხერხების მრავალფეროვნება.
• სიუჟეტების და მულტიმედია პროექტის შემთხვევაში ასევე დრამატურგია და ვიზუალური მხარე
• ინფორმაციის წყაროთა მრავალფეროვნება
• ინფორმაციის სიზუსტე
• ფაქტებისა და მოსაზრებების გამიჯვნა, მიუკერძოებლობა
• მხარეთა ბალანსი
• სიძულვილის ენისა და შეუფერებელი ლექსიკის უარყოფა/ გამოუყენებლობა

ჟურნალისტური პროდუქტის შერჩევის მთავარი კრიტერიუმია პროფესიული და ეთიკური სტანდარტები, რასაც ეფუძნება საქართველოს ჟურნალისტური ეთიკის ქარტია

საქართველოს ჟურნალისტური ეთიკის ქარტიის საბჭოს გადაწყვეტილებით პრაიმტაიმის ჟურნალისტს, თორნიკე ყაჯრიშვილს ქარტიის პირველი (სიზუსტე) და მეხუთე (შესწორება) პრინციპები არ დაურღვევია.  

მის წინააღმდეგ ქარტიას ადვოკატმა მარიამ კუბლაშვილმა მიმართა. სადავო გახდა მასალა სათაურით "„მაგას დავამთავრებ და დავასამარებ“ - მარიამ კუბლაშვილი თამთა თოდაძეზე". სტატიაში მარიამ კუბლაშვილი საუბრობს მისი დაცვის ქვეშ მყოფი თბილისის საკრებულოს მაჟორიტარი დეპუტატის, ილია ჯიშკარიანის ბრალდებაზე. მას  ბარალი ედება ცემასა და სამსახურეობრივი მდგომარეობის გამოყენებით  სექსუალური ხასიათის ქმედებაში.  მოგვიანებით გამოცემამ გამოაქვეყნა მარიამ კუბლაშვილთან ჩაწერილი ინტერვიუს აუდიო ვერსია სათაურით „მარიამ კუბლაშვილის კომენტარის აუდიო ვერსია - „მაგას დავამთავრებ და დავასამარებ“.

განმცხადებელი ამბობდა, რომ გამოცემამ არაზუსტი ინფორმაცია გაავრცელა და მიმართვის შემდეგ სათანადოდ არ შეასწორა.

საქმის განხილვას ესწრებოდა როგორც განმცხადებლის წარმომადგენელი, ასევე მოპასუხე ჟურნალისტი. საბჭომ მიიჩნია, რომ სადავო პრინციპები არ დარღვეულა, თუმცა, საბჭოს ორი წევრი არ დაეთანხმა ამ გადაწყვეტილებას,  როგორც საბჭოს უმრავლესობის, ისე მათი განსხვავებული მოსაზრება, გადაწყვეტილების სამოტივაციო ნაწილში იქნება მოცემული.

საქართველოს ჟურნალისტური ეთიკის ქარტიის საბჭოს გადაწყვეტილებით, qartli.ge-ს ჟურნალისტმა, მალხაზ მიქელაძემ სიზუსტის (პირველი) და შესწორების (მეხუთე) პრინციპები დაარღვია.  მის წინააღმდეგ ქარტიას ხათუნა მაცაბერიძემ მიმართა.

სადავო გახდა მასალა სათაურით "ავნევიდან დევნილი მოვაჭრე პოლიტიკური ნიშნით დევნის გამო ხაშურის ბაზრის დირექტორს ადანაშაულებს". ბაზრის დირექტორი, ხათუნა მაცაბერიძე უარყოფდა ამ ბრალდებას და ამბობდა, რომ სტატიაში მოსაუბრე რესპონდენტი არ არის მის მიერ დასაქმებული.

გარდა პირველი და მეხუთე პრინციპისა,  განმცხადებელი მიიჩნევდა, რომ დარღვეული იყო ქარტიის შემდეგი პრინციპები. მესამე (დადასტურებული წყარო),მეშვიდე (დისკრიმინაცია) და მეთერთმეტე (ფაქტის განზრახ დამახინჯება). საქმის განხილვის შემდეგ საბჭომ ეს პოზიცია არ გაიზიარა და მხოლოდ პირველი და მეხუთე პრინციპების დარღვევა დაადგინა.  

საქმის განხილვას ესწრებოდა განმცხადებელი, ქარტიის კითხვებს qartli.ge-ს რედაქტორმა საბა წიწიკაშვილმა უპასუხა.