საქართველოს ჟურნალისტური ეთიკის ქარტიის საბჭოს გადაწყვეტილებით, qartli.ge-ს რედაქტორს, საბა წიწიკაშვილს ქარტიის პრინციპები არ დაურღვევია.  მის წინააღმდეგ ქარტიას ლელა ლობჟანიძემ მიმართა.
სადავო გახდა სტატია სათაურით "მინისტრის მოადგილის კრიტიკის გამო შესაძლოა საკრებულოს დეპუტატი „თრიალეთში“ აღარ მიიწვიონ". სტატია ეყრდნობოდა "ფეისბუქში" გამოქვეყნებულ კომენტარს. მასალაში მოცემული იყო თავად ლელა ლობჟანიძესთან ჩაწერილი კომენტარიც.

ლელა ლობჟანიძე მიიჩნევდა, რომ  დარღვეული იყო ქარტიის პირველი (სიზუსტე) და მეხუთე (შესწორება) პრინციპები, თუმცა საქმის განხილვის შემდეგ საბჭომ მისი მოსაზრება არ გაიზიარა. სხდომას არ დასწრებია განმცხადებელი, მოპასუხე ჟურნალისტმა საბჭოს კითხვებს ტელეფონით უპასუხა.

გადაწყვეტილების სამოტივაციო ნაწილი მოგვიანებით გამოქვეყნდება.

საქართველოს ჟურნალისტური ეთიკის ქარტიის საბჭო ეხმაურება ტვ 25-ის საინფორმაციო სამსახურის უფროსის სულხან მესხიძის და ჟურნალისტის, ეკა ბარამიძის მიმართ მუქარას. საქმე ეხება ღურტის საბავშვო ბაღის ყოფილ გამგეს, მედეა მამულაძის მიერ განხორციელებულ მუქარას, რომელიც სამსახურიდან TV 25-ის მიერ გავრცელებული მასალის შემდეგ გაათავისუფლეს. ჟურნალისტების ცნობით, მათ მუქარის შეტყობინებები მიიღეს მედეა მუმლაძისგან. 4 სექტემბერს ცნობილი გახდა, რომ შინაგან საქმეთა სამინისტრომ გამოძიება დაიწყო. მიუხედავად ამისა, საზოგადოებისთვის უცნობია რა ეტაპზეა გამოძიება.

22  ოქტომბერს საქართველოს ჟურნალისტური ეთიკის ქარტია შემდეგ საქმეებს განიხილავს:

• 18:00 საათი - მარიამ კუბლაშვილი "პრაიმტაიმის" ჟურნალისტის, თორნიკე ყაჯრიშვილის წინააღმდეგ

სადავო გახდა მასალა სათაურით "„მაგას დავამთავრებ და დავასამარებ“ - მარიამ კუბლაშვილი თამთა თოდაძეზე". სტატიაში მარიამ კუბლაშვილი საუბრობს თბილისის საკრებულოს მაჟორიტარი დეპუტატის, ილია ჯიშკარიანის ბრალდებაზე. მას ცემასა და გაუპატიურებაში ედება ბრალი, მარიამ კუბლაშვილი კი მის ინტერესებს იცავს.  მოგვიანებით გამოცემამ გამოაქვეყნა მარიამ კუბლაშვილთან ჩაწერილი ინტერვიუს აუდიო ვერსია სათაურით „მარიამ კუბლაშვილის კომენტარის აუდიო ვერსია - „მაგას დავამთავრებ და დავასამარებ“.

სადავო პრინციპები: პირველი (სიზუსტე), მეხუთე (შესწორება)

საქართველოს ჟურნალისტური ეთიკის ქარტიის სამდივნომ დასაშვებად სცნო ადვოკატ მარიამ კუბლაშვილის განცხადება პრაიმტაიმის მიერ გამოქვეყნებულ ორ მასალასთან დაკავშირებით. მარიამ კუბლაშვილი იცავს თბილისის საკრებულოს მაჟორიტარი დეპუტატის, ილია ჯიშკარიანის უფლებებს, რომელსაც თამთა თოდაძე გაუპატიურებასა და ცემაში ადანაშაულებს.

„პრაიმტაიმმა“ გამოაქვეყნა მასალა სათაურით "„მაგას დავამთავრებ და დავასამარებ“ - მარიამ კუბლაშვილი თამთა თოდაძეზე". სტატიაში მარიამ კუბლაშვილი სწორედ მისი დაცვის ქვეშ მყოფის შესახებ საუბრობს. მოგვიანებით გამოცემამ გამოაქვეყნა მარიამ კუბლაშვილთან ჩაწერილი ინტერვიუს აუდიო ვერსია სათაურით „მარიამ კუბლაშვილის კომენტარის აუდიო ვერსია - „მაგას დავამთავრებ და დავასამარებ“ მარიამ კუბლაშვილი ქარტიისთვის გაგზავნილ განცხადებაში „პრაიმტაიმს“ სიზუსტის და შესწორების პრინციპის დარღვევაში ადანაშაულებს. მას მიაჩნია, რომ გამოცემამ შეცდომაში შემყვანი ინფორმაცია გამოაქვეყნა და შემდეგ სათანადოდ არ შეასწორა და ორივე მასალას სადავოდ ხდის.

ქარტიის საბჭო საქმეს ღია სხდომაზე განიხილავს, სადაც როგორც განმცხადებელს, ასევე მოპასუხე ჟურნალისტს საკუთარი პოზიციის დაფიქსირების საშუალება ექნება.

საქართველოს ჟურნალისტური ეთიკის ქარტიის საბჭოს გადაწყვეტილებით, "პრაიმტაიმის" რედაქტორმა მირიან ბოქოლიშვილმა და "იმედის" ჟურნალისტმა ნატალია მახვილაძემ ქარტიის პირველი პრინციპი  (სიზუსტე) დაარღვიეს. 

მათ წინააღმდეგ განცხადებით ქარტიას მალხაზ მაჩალიკაშვილმა მიმართა. ის სადავოდ ხდიდა "იმედის" და "მაესტროს" იმ მასალებს, რომლები ეხებოდა მისი შვილის, 2017 წელს პანკისში სპეცოპერაციისას მოკლული თემირლან მაჩალიკაშვილის სახელობის წყაროს გახსნას ბანგლადეშში.  

მალხაზ მაჩალიკაშვილი ასევე დავობდა, რომ დარღვეული იყო ქარტიის მე-11 პრინციპი, რადგან ფაქტები მისი აზრით, განზრახ დამახინჯდა და მე-7 პრინციპი, რომელიც დისკრიმინაციას კრძალავს. თუმცა, საბჭომ მიიჩნია, რომ ეს პრინციპები სადავო მასალაში არ დარღვეულა.

საქმის განხილვას ესწრებოდა განმცხადებლის წარმომადგენელი. მირიან ბოქოლიშვილმა საბჭოს საკუთარი მოსაზრება წერილობით გამოუგზავნა და ტელეფონით უპასუხა დამატებით კითხვებს. ნატალია მახვილაძეს საბჭოსთვის შეპასუხება არ გამოუგზავნია და არც სხდომას დასწრებია.

გადაწყვეტილების სამოტივაციო ნაწილი მოგვიანებით გამოქვეყნდება.

საქართველოს ჟურნალისტური ეთიკის ქარტიის საბჭოს გადაწყვეტილებით Topnews.com.ge-ს რედაქტორმა ქრისტინე ქარჩხაძემ ქარტიის პირველი (სიზუსტე) და მეხუთე (შესწორება) პრინციპები დაარღვია.

მის წინააღმდეგ ქარტიას მომართა ხათუნა კირკიტაძემ, რომელიც მიიჩნევდა, რომ Topnews.com.ge-ის მიერ გამოქვეყნებული მასალა ბაღდათის მუნიციპალიტეტში კომისიების წევრების ხელფასების შესახებ არღვევდა ეთიკურ სტანდარტებს.  მისი აზრით გარდა სიზუსტისა და შესწორების პრინციპებისა, ასევე არ იყო დაცული ქარტიის მესამე (დადასტურებული წყარო) და მეთერთმეტე (ფაქტის განზრახ დამახინჯება) პრინციპები, თუმცა საბჭომ ამ პრინციპების დარღვევა არ დაადგინა.

საქმის განხილვაში ორივე მხარემ მონაწილეობა დისტანციურად მიიღო, საკუთარი მოსაზრებები საბჭოს ტელეფონით და წერილობით აცნობეს. 

გადაწყვეტილების სამოტივაციო ნაწილი მოგვიანებით გამოქვეყნდება.

14 ოქტომბერს, ორშაბათს, საქართველოს ჟურნალისტური ეთიკის ქარტიის საბჭო სამ საქმეს განიხილავს.

განსახილველი საქმეებია:

1. 15:00 საათი -  ხათუნა კირკიტაძე topnews.com.ge-ს რედაქტორის, ქრისტინა ქარჩხაძის წინააღმდეგ

სადავო გახდა topnews.com.ge-ის მიერ გამოქვეყნებული მასალა, რომელიც ეხება ბაღდათის მუნიციპალიტეტში კომისიების წევრების ხელფასებს. განმცხადებელი მიიჩნევს, რომ ჟურნალისტი მიზანმიმართულად ავრცელებს ცრუ ინფორმაციას ბაღდათის მუნიციპალიტეტის შესახებ, ეს მასალები არის ცალმხრივი და მათში არ არის წარმოჩენილი მეორე მხარის პოზიცია. 

სადავო პრინციპები: პირველი, მესამე, მეხუთე, მეათე და მეთერთმეტე. 

2. 16:00 საათი - მალხაზ მაჩალიკაშვილი "პრაიმტაიმის" რედაქტორის, მირიან ბოქოლიშვილის წინააღმდეგ; 

3. 17:00 საათი - მალხაზ მაჩალიკაშვილი ტელეკომპანია "იმედის" ჟურნალისტის, ნატა მახვილაძის წინააღმდეგ.

სადავოა "პრაიმ ტაიმის" და "იმედის"  მიერ მომზადებული ის მასალები, რომლებიც ეხება მალხაზ მაჩალიკაშვილის შვილის, 2017 წელს პანკისში ჩატარებული სპეცოპერაციისას მოკლული თემირლან მაჩალიკაშვილის სახელობის წყაროს გახსნას ბანგლადეშში. მასალების მიხედვით, ინტერპოლით არის ძებნილი იმ ორგანიზაციის ხელმძღვანელი, რომელმაც წყარო გახსნა. მალხაზ მაჩალიკაშვილის განცხადების თანახმად, ჟურნალისტებმა მცდარი და დაუზუსტებელი ინფორმაცია მიაწოდეს აუდიტორიას, რითიც დაარღვიეს ქარტიის პირველი პრინციპი (სიზუსტე), ამასთან, ფაქტები განზრახ დაამახინჯეს, რასაც ქარტიის მეთერთმეტე პრინციპი უმძიმეს პროფესიულ დანაშაულად მიიჩნევს. მისი აზრით, ასევე დარღვეულია ქარტიის მეშვიდე პრინციპიც, რომელიც დისკრიმინაციას კრძალავს.

სადავო პრინციპები: პირველი, მეშვიდე და მეთერთმეტე. 

ქარტიის საბჭო საქმეებს ღია სხდომაზე განიხილავს

3-4 ოქტომბერს, თბილისში ევროპის დამოუკიდებელი თვითრეგულირების ორგანოების წლიური კონფერენცია (AIPCE 2019) გაიმართა, რომელსაც საქართველოს ჟურნალისტური ეთიკის ქარტიამ უმასპინძლა. ღონისძიებას 22 ქვეყნის პრესის საბჭოები სტუმრობდნენ, მათთან ერთად კონფერენციას საქართველოში მედიასფეროში მომუშავე 120  მონაწილე ესწრებოდ. 

კონფერენცია, რომლის მთავარი თემა იყო მედია ცვლილებების ეპოქაში, ევროპის საბჭოს დახმარებით გაიმართა. ღონისძიება გახსნეს ქარტიის აღმასრულებელმა დირექტორმა, ნატა ძველიშვილმა,  
ევროპის საბჭოს საქართველოს ოფისის ხელმძღვანელმა კრისტიან ურსემ და AIPCE-ს მმართველი კომიტეტის წევრებმა  ელინა გრუნდსტრომმა (ფინეთი) და კატერინა ნიკოლაუმ (კვიპროსი) 

ხუთშაბათს, 3 ოქტომბერს, 10:00 საათზე სასტუმრო შერატონ გრანდ მეტეხი პალასში (თელავის ქუჩა 20) გაიხსნება ევროპის დამოუკიდებელი პრესის საბჭოების ალიანსის (AIPCE) ყოველწლიური კონფერენცია.

საქართველოს ჟურნალისტური ეთიკის ქარტიის საბჭო თვალს ადევნებს საზოგდოებრივი მაუწყებლის აჭარის ტელევიზიასა და რადიოში განვითარებულ მოვლენებს. მას შემდეგ, რაც მრჩეველთა საბჭომ იმპიჩმენტით თანამდებობიდან გაათავისუფლა დირექტორი, სამი კონკურსის გამართვის შემდეგ ვერ მოახერხა ახალი დირექტორის არჩევა და უკვე 5 თვეა მაუწყებელი ფაქტობრივად დირექტორის გარეშე ფუნქციონირებს, მეოთხედ გამოცხადებული კონკურსი კი სასამრთლოს განჩინებით შეჩერდა. ამ მოთხოვნით სასამართლოს დირექტორობის ერთ-ერთმა კანდიდატმა, გოგა კოხრეიძემ მიმართა. ის მიიჩნევს, რომ მრჩეველთა საბჭოს სხდომის ის ოქმი უნდა გაუქმდეს, რომლითაც მესამე კონკურსი ჩაიშალა და გოგა კოხრეიძე უნდა გამოცხადდეს არჩეულ დირექტორად. სასამართლომ განჩინება ზუსტად იმ დღეს გამოიტანა, როდესაც მეოთხე კონკურსში მონაწილეობისთვის განაცხადების მიღების ვადა უნდა ამოწურულიყო.

საქართველოს ჟურნალისტური ეთიკის ქარტიის საბჭოს გადაწყვეტილებით, ონლაინ გამოცემა mcm.ge - ს რედაქტორმა ეკა გულუამ ქარტიის შემდეგი პრინციპები დაარღვია: პირველი (სიზუსტე), მეშვიდე (დისკრიმინაცია) და მეთერთმეტე (ფაქტის განზრახ დამახინჯება).

მის წინააღმდეგ ქარტიას მიმართა მიხეილ მეფარიშვილმა, რომელიც სადავოდ ხდიდა mcm.ge-ზე გამოქვეყნებულ 6 მასალას. ყველა მათგანი ეხებოდა თბილისი პრაიდს. საქმის განხილვას ესწრებოდა განმცხადებელი, მოპასუხე ჟურნალისტმა საკუთარი პოზიცია საბჭოს წერილობით წარუდგინა.

გადაწყვეტილების სამოტივაციო ნაწილი მოგვიანებით გამოქვეყნდება.

საქართველოს ჟურნალისტური ეთიკის ქარტიის საბჭოს გადაწყვეტილებით, ტელეკომპანია "იმედის" წამყვანმა ირაკლი ჩიხლაძემ  დაარღვია ქარტიის მეშვიდე პრინციპი, რომელიც ჟურნალისტს დისკრიმინაციის თავიდან არიდებას ავალდებულებს.

სადავო გახდა გადაცემის "პირისპირ" ის ნაწილი, სადაც "პატრიოტთა ალიანსის" ლიდერი ირმა ინაშვილი საუბრობდა. მან თბილისში გამართულ აქცია "გეი რევოლუციად" მოიხსენია.

საქმის განხილვას მხოლოდ განმცხადებელი ესწრებოდა, მოპასუხე ჟურნალისტს განხილვაში მონაწილეობა არ მიუღია და არც შეპასუხება წარმოუდგენია.

გადაწყვეტილების სამოტივაციო ნაწილი მოგივიანებით გამოქვეყნდება.