თბილისში, რუსთაველის გამზირზე, პოლიციის მიერ საპროტესტო აქციის ცრემლსადენი გაზითა და რეზინის ტყვიებით დაშლის შედეგად დაშავდნენ "პირველი არხის", რუსთავი 2"-ის,” ტვ პირველის” და სხვა მედიაორგანიზაციების ჟურნალისტები. მათ შორის კორესპონდენტებს რეზინის ტყვიები მოხვედრილი აქვთ თვალის, ყელის არეში, თავსა და მკერდში. რამდენიმე მათგანის განცხადებით, პოლიცია მათი მისამართით რეზინის ტყვიებს დამიზნებით ისროდა მას შემდეგაც კი, როცა ისინი სამართალდამცავებს ეუბნებოდნენ რომ მედიის წარმომადგენლები იყვნენ. 

2019 წლის 20 მაისს პარლამენტთან განვითარებული მოვლენებისას, ჩვენი ინფორმაციით 12 ჟურნალისტია დაშავებული. მიგვაჩნია, რომ მათ მიმართ ადგილი ჰქონდა სისხლის სამართლის კოდექსის 154-ემუხლით გათვალისწინებულ დანაშაულს.

საქართველოს ჟურნალისტური ეთიკის ქარტიის სამდივნომ დასაშვებად სცნო მამუკა მახარაძის განცხადება imedinews.ge-ს წინააღმდეგ. სადავო მასალა ეხება საქართველოში ერთ-ერთი რუსი ყოფილი  მაღალჩინოსნის დაკავებას.

განმცხადებელი მიიჩნევს, რომ მასალაში დაირღვა ინფორმაციის სიზუსტის პრინციპი, რადგან სტატია შეიცავს არაზუსტ მონაცემებს მომხდარ ფაქტთან დაკავშირებით.

განცხადებაში მითითებულია ასევე რომ ჟურნალისტს ვერ ეყოლება ინფორმაციის დადასტურებული წყარო, რადგან საქმე კონფიდენციალურია, აქედან გამომდინარე, მხარის აზრით დარღვეულია მესამე პრინციპიც: „ჟურნალისტმა უნდა გადასცეს ინფორმაცია იმ ფაქტებზე დაყრდნობით რომელთა წყაროც დადასტურებულია“.

მამუკა მახარაძე კიდევ ერთ პრინციპზე დაობს. განმცხადებლის აზრით, მასალაში იკვეთება ფაქტის განზრახ დამახინჯება, რაც არღვევს ქარტიის მეთერთმეტე პრინციპს.

ქარტიის საბჭოს განცხადებას ღია სხდომაზე განიხილავს.

19 ივნისს საქართველოს ჟურნალისტური ეთიკის ქარტია შემდეგ განცხადებებს განიხილავს:

• 19:00  საათი -  ევექსის ჰოსპიტლები კომერსანტის წინააღმდეგ

სადავო გახდა "კომერსანტის" სტატია სათაურით "GHG ჯგუფი აქციონერებისთვის გასაცემ დივიდენდს ზრდის, მისი კლინიკები პაციენტების სასაკლაოდ იქცა, ჯანდაცვის სამინისტრო კი დუმს". მასალაზე კონკრეტული ავტორი მითითებული არ არის. სტატია ეხება პაციენტის გარდაცვალებას და მასთან "ევექსის" კლინიკის კავშირს, მის პასუხისმგებლობას.
სადავო პრინციპები: პირველი (სიზუსტე), მესამე  (დადასტურებული წყარო) და მეთერთმეტე (ფაქტის განზრახ დამახინჯება)

როგორც მედიის მიერ გავრცელებული ინფორმაციებით ირკვევა, ჰომოფობიური აქციის მონაწილეები მუშაობაში ხელს უშლიან და ემუქრებიან ჟურნალისტებს, რომლებიც კანცელარიასთან მიმდინარე მოვლენებს აშუქებენ.

ინციდენტები შეემთხვათ გამოცემების: ნეტგაზეთის, ლიბერალის, რადიო თავისუფლების, აჭარის ტელევიზიის, TV პირველისა და რუსთავი 2-ის ჟურნალისტებს.

22-23 ივნისს, ბათუმში, თავისუფალ ჟურნალისტთა სახლში, გაიმართება უფროსკლასელთა სემინარი თემაზე - “მედიაწიგნიერება და კრიტიკული აზროვნება”. სემინარში მონაწილეობა უფასოა. სემინარი იმართება ქარტიისა და გაეროს ბავშვთა ფონდის (UNICEF) ერთობლივი პროექტის, “მედიაწიგნიერება ახალგაზრდებისთვის" ფარგლებში.

სემინარის მიზანია დაეხმაროს ახალგაზრდებს გახდნენ მედიაწიგნიერები, კრიტიკულად მოაზროვნენი, რათა შეძლონ იმის ინტერპრეტაცია და გააზრება, რასაც ხედავენ, კითხულობენ და ისმენენ. სემინარი დაეხმარება ახალგაზრდებს აიმაღლონ ცოდნის დონე მასობრივი კომუნიკაციის და ახალი ტექნოლოგიების შესახებ, გააძლიერებს მათ უნარს კრიტიკულად გაანალიზონ, თუ რა კავშირი არსებობს მედიას, აუდიტორიასა და ინფორმაციას შორის.

პრაქტიკული სავარჯიშოების შესრულებით მონაწილეები შეძლებენ დაინახონ:

• როგორ ანიჭებს ადამიანი სხვადასხვა მნიშვნელობას მოვლენას, საკითხს, მონაცემს თუ ინფორმაციას და ყალიბდება სტერეოტიპები, ხდება მანიპულაცია.
• როგორ იცვლება ტექნოლოგიების განვითარებასთან ერთად მედია და მისი ურთიერთკავშირი აუდიტორიასთან.
• რა გავლენა აქვს სურათებს მოვლენათა აღქმისას, როგორ შეიძლება ფოტოები იქნას გამოყენებული მანიპულაციისთვის და როგორ ცვლის კონტექსტი, დრო, ადგილი, სოციალური გარემო ერთი და იმავე კადრის აღქმას.

სემინარს გაუძღვებიან:

ნათია კუპრაშვილი, ჟურნალისტიკის რესურს ცენტრის აღმასრულებელი დირექტორი;

ნინო დანელია, ილიას უნივერსიტეტის პროფესორი


დამატებითი ინფორმაციისთვის დაგვიკავშირდით:

ნინო ნარიმანიშვილი, პროექტის კოორდინატორი
ტელ: 593926429
ელ.ფოსტა: narimanishvili.n@gmail.com

 

 

2019 წლის 13 მაისს საქართველოს პარლამენტის თავმჯდომარის და საქართველოს კომუნიკაციების ეროვნული კომისიის მხრიდან გავრცელდა ინფორმაცია სიძულვილის ენის რეგულირების მიზნით 2019 წლის 01 ივლისამდე მაუწყებლობის შესახებ საქართველოს კანონში ცვლილებების შეტანის თაობაზე. აღნიშნულის საფუძვლად კი მითითებულია საქართველოს ვალდებულება აუდიოვიზუალური მედია დირექტივის იმპლემენტაციის თაობაზე.

საქართველოს ჟურნალისტური ეთიკის ქარტიის საბჭოს გადაწყვეტილებით, საზოგადოებრივი მაუწყებლის ჟურნალისტმა ნოდარ ჩაჩუამ, ქარტიის პირველი (სიზუსტე), მეხუთე (შესწორება) და მეთერთმეტე (განზრახ დამახინჯება) პრინციპები დაარღვია.

მის წინააღმდეგ ქარტიის საბჭოს ა(ა)იპ საქართველოს ღია საზოგადოების ფონდმა მიმართა. საქმე ეხებოდა საზოგადოებრივი მაუწყებლის პირველი არხის გადაცემა “მოამბის” 2019 წლის 3 აპრილის 12:00 და 15:00 საათიან გამოშვებებში გასულ სიუჟეტებს, რომელიც შეეხებოდა კავკასიის კვლევითი რესურსების ცენტრის [CRRC], ღია საზოგადოების ფონდისა და საერთაშორისო ორგანიზაცია International IDEA ერთობლივი პროექტის ფარგლებში მომზადებული სოციოლოგიური კვლევის შედეგების პრეზენტაციას. სიუჟეტების ავტორი და შესაბამისად, მოპასუხე ჟურნალისტი - ნოდარ ჩაჩუა იყო.

საქმის განხილვას მხოლოდ განმცხადებლის წარმომადგენლები ესწრებოდნენ, მოპასუხე ჟურნალისტმა საქმის განხილვაში მონაწილეობაზე უარი განაცხადა და არც საპასუხო პოზიცია წარმოუდგენია.

გადაწყვეტილების სამოტივაციო ნაწილი და საქმეზე თანდართული მასალები შეგიძლიათ იხილოთ ამ ბმულზე.

გამოცემა qartli.ge- ს ცნობით, 10 ივნისს, გამთენიისას, მის ჟურნალისტს, საბა წიწიკაშვილს სამართლდამცავებმა პროფესიულ საქმიანობაში ხელი შეუშალეს. ჟურნალისტს იმ ავტოავარიის გაშუქება სურდა, რომელშიც სავარაუდოდ სამართალდამცავების მანქანა მონაწილეობდა. როგორც საბა წიწიკაშვილმა ქარტიის საბჭოს განუცხადა, მას ცენტრალურ ავტობანზე პოლიციელებმა შეუზღუდეს გადაღების უფლება და ძალის გამოყენებით გამოიყვანეს შემთხვევის ადგილიდან. მომხდარის გადაღება მან შორიდან მაინც შეძლო.

საქართველოს ჟურნალისტური ეთიკის ქარტიის საბჭოს გადაწყვეტილებით, ტელეკომპანია "რუსთავი 2-ის" ჟურნალისტმა მარიამ გაფრინდაშვილმა დაარღვია ქარტიის პირველი (სიზუსტე), მესამე (მიჩქმალვა), მეხუთე (შესწორება) და მეთერთმეტე (ფაქტის განზრახ დამახინჯება) პრინციპები. 

სადავო სიუჟეტი გადაცემა "შაბათის კურიერის" ეთერში 16 მარტს გავიდა სახელწოდებით "ტროლები ოპონენტებისთვის" და ეძღვნებოდა ხელისუფლების მიერ ინტერნეტში სხვადასხვა პირთა დისკრედიტაციისთვის შექმნილ ანგარიშებს. სიუჟეტში ნახსენები იყო განმცხადებელი ლელა კურდღელაშვილიც. ის მიიჩნევდა, რომ არასწორი ინფორმაცია გავრცელდა, რადგან მას არანაირი შეხება არ ჰქონია "ტროლების" საქმიანობასთან და "ქართულ ოცნებასთან". ზემოთ აღნიშნული პრინციპების გარდა ლელა კურდღელაშვილის აზრით, დარღვეული იყო ქარტიის მეოთხე პრინციპიც, რომლის მიხედვითაც,  ინფორმაციის, ფოტოების ან დოკუმენტების მოპოვებისას ჟურნალისტმა მხოლოდ კეთილსინდისიერი და სამართლიანი მეთოდები უნდა გამოიყენოს, თუმცა საბჭომ ამ პრინციპის დარღვევა არ დაადგინა.

საქმის განხილვას მხოლოდ განმცხადებელი ესწრებოდა. მოპასუხე ჟურნალისტს მონაწილეობა არ მიუღია და არც წერილობითი შეპასუხება წარმოუდგენია.

გადაწყვეტილების სამოტივაციო ნაწილი მოგვიანებით გამოქვეყნდება.

7 ივნისს საქართველოს ჟურნალისტური ეთიკის ქარტიის საბჭო განიხილავს შემდეგ საქმეებს:

• 19:00 საათი- საქართველოს ღია საზოგადოების ფონდი საზოგადოებივი მაუწყებლის ჟურნალისტის, ნოდარ ჩაჩუას წინააღმდეგ

განმცხადებელი მიიჩნვს, რომ ეთიკური პრინციპები დაირღვა პირველი არხის მიერ მომზადებულ ორ მასალაში, რომელიც ღია საზოგადოების ფონდის დაკვეთით ჩატარებულ კვლევას ეხებოდა.

სადავო პრინციპები: პირველი (სიზუტე), მეხუთე (შესწორება), მეთერთმეტე (ფაქტის განზრახ დამახინჯება)

2019 წლის 03 ივნისს გავრცელდა სსიპ საზოგადოებრივი მაუწყებლის აჭარის ტელევიზიისა და რადიოს დირექტორის მოვალეობის შემსრულებლის ღია წერილი.

ნათია ზოიძე აცხადებს, რომ მრჩეველთა საბჭო არის პოლიტიკურად მოტივირებული და რომ ნათია კაპანიძის უნდობლობიდან დაწყებული ეს პროცესი არის პოლიტიკური ინტერესის ქვეშ. დირექტორის მოვალეობის შემსრულებელი ასევე ამბობს, რომ საბჭოს მხრიდან ადგილი აქვს მის სარედაქციო პოლიტიკაში ჩარევის მცდელობას.