საქართველოს ჟურნალისტური ეთიკის ქარტია აცხადებს კონკურსს გრაფიკული ვიდეოების დასამზადებლად.

ვიდეო რგოლების ტექნიკური მახასიათებლები:

• გამარჯვებულმა უნდა უზრუნველყოს 5 გრაფიკული ვიდეოს მომზადება საქართველოს ჟურნალისტური ეთიკის ქარტიის, მისი რესურსების შესახებ დამკვეთის მიერ მიწოდებული მონაცემების, ტექსტის შესაბამისად
• დამკვეთთან უნდა შეთანხმდეს ვიდეო რგოლების ვიზუალიც
• ვიდეოს ხანგრძლივობა არ უნდა აღემატებოდეს 2 წუთს
• ვიდეო შესაბამისი უნდა იყოს სოციალური ქსელის ფორმატთან
• ხუთივე ვიდეო საბოლოო სახით დამზადებული უნდა იყოს არაუგვიანეს 20 მაისისა

ინფორმაცია კონკურსანტის შესახებ:

• კონკურსში მონაწილეობა შეუძლია როგორც იურიდიულ, ისე ფიზიკურ პირს
• კონკურსანტს უნდა ჰქონდეს გრაფიკული ვიდეოების დამზადების გამოცდილება, რის დასადასტურებლად უნდა გამოგზავნოს მის მიერ შექმნილი მინიმუმ 5 ვიდეო (ბმულები)

შეთავაზების ვადა და ინსტრუქცია:

• წინადადება (განაცხადი) წარმოდგენილი უნდა იყოს 2019 წლის 5 აპრილამდე მისამართზე ethicscharter@gmail.com. დასახელებაში მიუთითეთ „ვიდეოს დამზადება“
• განაცხადი უნდა მოიცავდეს ფასთა გაანგარიშებას ლარში. ფასი უნდა მოიცავდეს გაწეული სამუშაოების სრულ ხარჯებს. შემდგომი დამატებითი ხარჯები/მოსაკრებლები განხილული არ იქნება. ფასები მოცემული უნდა იყოს დამატებითი ღირებულების გადასახადის (დღგ) გარეშე, ვინაიდან საქართველოს ჟურნალისტური ეთიკის ქარტია გათავისუფლებულია ამ გადასახადისგან
• განაცხადს თან დაურთეთ უკვე შესრულებული ვიდეომასალები/ბმულები
• იურიდიული პირის შემთხვევაში წარმოადგინეთ სარეგისტრაციო დოკუმენტი - ამონაწერი საჯარო რეესტრიდან და ვებსაიტის მისამართი
• ინდივიდუალური პირის შემთხვევაში წარმოადგინეთ CV განაცხადში მიუთითეთ საკონტაქტო ინფორმაცია

გამარჯვებული შეირჩევა შეთავაზებული ფასისა და საკონკურსო პირობებთან შესაბამისობის შეფასების შედეგად. საქართველოს ჟურნალისტური ეთიკის ქარტია იტოვებს უფლებას პრეტენდენტს მოსთხოვოს საცდელი ვიდეოს შექმნა.

საქართველოს ჟურნალისტური ეთიკის ქარტიის სამდივნომ დასაშვებად სცნო თეა დავაძის განცხადება, ტელეკომპანია რუსთავი 2-ის ჟურნალისტების, ნათია ტრაპაიძის და ჯეიხუნ მუჰამედალის წინააღმდეგ.

სადავო სიუჟეტი - „კომპრომატებით ომი თუ ანგარებით სექსუალური კავშირი - შსს ოცნების დეპუტატის საქმეს იძიებს“ -ტელეკომპანიის ეთერში 16 მარტს გავიდა. მასალაში ნათქვამი იყო, რომ პარლამენტის წევრის, რუსლან გაჯიევის შესახებ ვიდეოს გამავრცელებლი რადიო "მარნეულში" მუშაობდა.  განმცხადებელი მიიჩნევს, რომ რადიოს ამგვარად ხსენება მის დისკრედიტაციას და პოლიტიკურ ძალებთან ასოცირებას იწვევს. შესაბამისად,  განმცხადებლის აზრით, მასალაში დარღვეულია ქარტიის სიზუსტის (1) და ინფორმაციის მიჩქმალვის (3) პრინციპი. 

საქართველოს ჟურნალისტური ეთიკის ქარტიის საბჭო განცხადებას ღია სხდომაზე განიხილავს და დაადგენს დარღვეულია თუ არა ქარტიის პრინციპები.

საქართველოს ჟურნალისტური ეთიკის ქარტიის საბჭოს გადაწყვეტილებით, ტელეკომპანია "რუსთავი 2-ის" ჟურნალისტს, გიორგი გაბუნიას ქარტიის მერვე პრინციპი (ბავშვის ინტერესი) არ დაურღვევია. მის წინააღმდეგ ქარტიის საბჭოს განცხადებით მომართა შეიარაღებული ძალების სამოქალაქო კონტროლის ჯგუფმა, რომელიც მიიჩნევდა, რომ ტელეკომპანია „რუსთავი 2-ის“ ეთერში, 2019 წლის 17 თებერვალს, გადაცემა „კურიერი P.S. -ში“ სექსუალური განათლების შესახებ სიუჟეტის წარდგენა ბავშვის ინტერესს აზიანებდა და არ იყო მითითებული  "ასაკობრივი შეზღუდვის ნიშანი +16.

ქარტიის საბჭომ საქმის განიხლვის შემდეგ მიიჩნია, რომ ქარტიის მერვე პრინციპი არ დარღვეულა, ვინაიდან დაცული იყო გადაცემის ეთერში გასვლის დროს (21:00 საათზე) მაუწყებელთა ქცევის კოდექსით დადგენილი მოთხოვნა, რომელიც მაუწყებელს 15 წლამდე ასაკის არასრულწლოვნებისათვის შეუფერებელი პროგრამების შეზღუდვას ავალდებულებს 23 საათამდე.  შესაბამისად საბჭომ შეაფასა დასაშვები იყო თუ არა წარდგენის ტექსტის ყურება 12-დან 15 წლამდე არასრულწლოვნისათვის და მიიჩნია, რომ  გიორგი გაბუნიამ ქალის რეპროდუქციული ორგანო აღწერა ბიოლოგიური [არა ჟარგონული] ტერმინებით, ხოლო ვიზუალი არ იყო ნატურალიზირებული და არ ატარებდა სექსუალურ კონტექსტს, შესაბამისად არ იყო ვალდებულება + 15 ასაკობრივი შეზღუდვის დაწესების.

გადაწყვეტილების სრული ვერსია შეგიძლიათ იხილოთ ამ ბმულზე

მედიასაშუალებებმა გაავრცელეს ინფორმაცია ე.წ. ტროლების ფაბრიკის შესახებ და გამოაქვეყნეს იმ ადამიანთა სია, რომლებიც სავარაუდოდ “ქართული ოცნების” დაკვეთით ცრუ ინფორმაციას ავრცელებდნენ სოციალურ ქსელში. სიაში დასახელებულ სახელებსა და გვარებს არ ახლდა რაიმე მაიდენტიფიცირებელი ნიშანი (პირადი ნომერი, ან რაიმე სხვა დეტალი) შესაბამისად, ეჭვქვეშ დადგა ყველა ის ადამიანი, ვისაც სიაში ჩამოთვლილთა იდენტური სახელი და გვარი აქვს.

საქართველოს ჟურნალისტური ეთიკის ქარტიის საბჭოს სამდივნომ დასაშვებად სცნო ხელვაჩაურის მუნიციპალიტეტის მერის,  ჯუმბერ ვარდმანიძის განცხადება საზოგადოებრივი მაუწყებლის აჭარის ტელევიზიისა და რადიოს ჟურნალისტის, თეონა ხარაბაძის წინააღმდეგ.

განმცხადებლის უკმაყოფილება გამოიწვია აჭარის ტელევიზიის ეთერში 11 თებერვალს გასულმა სიუჟეტმა, რომელიც ეხებოდა  ხელვაჩაურის მუნიციპალიტეტის აუდიტის 2017 წლის ანგარიშს. ჯუმბერ ვარდმანიძის თქმით,  ჟურნალისტმა სოფელ ჯიბინაურში კეთილმოწყობილი სტადიონის ნაცვლად აჩვენა მოუწესრიგებელი სტადიონი. განმცხადებელი ამტკიცებს, რომ ჟურნალისტმა არასწორი კადრები აჩვენა, რითიც დაარღვია ქარტიის პრინციპები - პირველი (სიზუსტე), მესამე (მიჩქმალვა), მეხუთე (შესწორება) და მეშვიდე (დისკრიმინაცია).

ქარტიის საბჭო საქმეს განიხილავს და გამოკვლევის შემდეგ დაადგენს დაირღვა თუ არა მითითებული პრინციპები.

საქართველოს ჟურნალისტური ეთიკის ქარტიის საბჭოს სამდივნომ დასაშვებად სცნო აიდან იუსუბოვას განცხადება ტელეკომპანია "რუსთავი 2-ის" ჟურნალისტის, დავით დვალიშვილის წინააღმდეგ.  სადავო მასალა საინფორმაციო გამოშვება "კურიერში" 3 მარტს გავიდა ეთერში და ეხებოდა ქვემო ფონიჭალაში ჩატარებულ სპეცოპერაციას ნარკოტიკების რეალიზების ბრალდებით პირების დასაკავებლად.

განმცხადებელს მიაჩნია, რომ ამ მასალაში დაირღვა ქარტიის მეშვიდე (დისკრიმინაცია) პრინციპი, ვინაიდან ჟურნალისტმა ჩართვისას დაასახელა დაკავებულთა ეთნიკური წარმომავლობა.

საქართველოს ჟურნალისტური ეთიკის ქარტია საქმეს განიხილავს და დაადგენს მართლაც დარღვეულია თუ არა დისკრიმინაციის პრინციპი სადავო მასალაში

საქართველოს ჟურნალისტური ეთიკის ქარტიის საბჭოს გადაწყვეტილებით, ტელეკომპანია "რუსთავი 2-ის"  საინფორმაციო სამსახურის ხელმძღვანელმა ნოდარ მელაძემ და ჟურნალისტმა ქეთი ნადიბაიძემ ქარტის პირველი (სიზუსტე) და მესამე (მიჩქმალვა) პრინციპები დაარღვიეს.

მათ წინააღმდეგ ქარტიას მიმართა რუსთავის საქალაქო სასამართლოს თავმჯდომარე მამია ფხაკაძემ. ის სადავოდ ხდიდა "შაბათის კურიერში" გასული სიუჟეტის იმ ნაწილს, რომელიც მის საცხოვრებელ სახლებს ეხებოდა. ქარტიის საბჭომაც სიუჟეტის მხოლოდ ამ ნაწილზე იმსჯელა.

საქმის განხილვას ესწრებოდა როგორც განმცხადებელი, ასევე მოპასუხე ნოდარ მელაძე, ქეთი ნადიბაიძემ კი საბჭოს საკუთარი პოზიცია წერილობით მიაწოდა. მხარეთა გამოკითხვის შემდეგ ქარტიის საბჭომ მიიჩნია, რომ სადავო ნაწილში პირველი და მესამე პრინციპები დარღვეული იყო.

გადაწყვეტილების სამოტივაციო ნაწილი მოგვიანებით გამოქვეყნდება.

საქართველოს ჟურნალისტური ეთიკის ქარტიის საბჭოს გადაწყვეტილებით, ტელეკომპანია "იმედის" წამყვანმა გიორგი გასვიანმა ქარტიის მეშვიდე პრინციპი დაარღვია, რომელიც ჟურნალისტს ავალდებულებს თავიდან აირიდოს დისკრიმინაცია რაიმე ნიშნით.

მის წინააღმდეგ განცხადება შემოიტანა გიორგი თეთრაძემ. ის მიიჩნევდა, რომ 2 თებერვლის გადაცემაში "სიცრუის დეტექტორი" გაჟღერდა ქალთა მიმართ ძალადობისა და დამამცირებელი მოპყრობის წამახალისებელი, გენდერული ნიშნით დისკრიმინაციული განცხადება. 

ქარტიაში საქმის განხილვას არ დასწრებია არც განმცხადებელი და არ მოპასუხე.

საქართველოს ჟურნალისტური ეთიკის  საბჭოს გადაწყვეტილებით, ტელეკომპანია "რუსთავი 2-ის" ჟურნალისტს, რუსუდან გიორგაძეს ქარტიის პირველი(სიზუსტე) პრინციპი არ დაურღვევია. სადავო გახდა სექსუალური განათლების შესახებ მომზადებული სიუჟეტი, რომელიც "კურიერ PS-ში" 17 თებერვალს გავიდა. 

მის წინააღმდეგ ქარტიას გიორგი ყიფიანმა მიმართა. მისი აზრით, არაზუსტი იყო სიუჟეტში ჟურნალსიტის ტექსტი, რომლის მიხედვითაც კრიტიკოსები ფიქრობენ, რომ სერიალი  Sex Education ყველა ადამიანმა უნდა ნახოს.

გადაწყვეტილების დასაბუთებული ნაწილი მოგვიანებით გამოქვეყნდება

საქართველოს ჟურნალისტური ეთიკის ქარტიის საბჭოს გადაწყვეტილებით, "ინტერპრესნიუსის" ჟურნალისტს ქარტიის მერვე პრინციპი არ დაურღვევია, რომლის თანახმადაც ჟურნალისტი ვალდებულია, დაიცვას ბავშვის უფლებები; პროფესიული საქმიანობისას უპირატესი მნიშვნელობა მიანიჭოს ბავშვის ინტერესებს, არ მოამზადოს და არ გამოაქვეყნოს ბავშვების შესახებ ისეთი სტატიები ან რეპორტაჟები, რომლებიც საზიანო იქნება მათთვის.

მის წინააღმდეგ ქარტიას "თანასწორობის მოძრაობამ" მიმართა და მიიჩნევდა, რომ მერვე პრინციპი დარღვეული იყო 13 წლის ბიჭის მკვლელობის შესახებ მომზადებულ მასალაში, რადგან ტექსტს თან ერთვოდა გარდაცვლილი არასრულწლოვნის ფოტო.

ქარტიაში საქმის განხილვას ესწრებოდა მხოლოდ განმცხადებელი. "ინტერპრესნიუსმა" ქარტიას არ აცნობა მოპასუხე ჟურნალისტის ვინაობა, არ დასწრებია სხდომას და არც წერილობით გამოუგზავნია შეპასუხება.

გადაწყვეტილების დასაბუთებული ნაწილი მოგვიანებით გამოქვეყნდება.

საქართველოს ჟურნალისტური ეთიკის ქარტიის საბჭოს გადაწყვეტილებით, ონლაინ ტელევიზია POSTV-მ ქარტიის მეშვიდე პრინციპი დაარღვია, რომელიც ჟურნალისტს ავალდებულებს თავიდან აირიდოს რაიმე ნიშნით დისკრიმინაცია.

POSTV-ს წინააღმდეგ ქარტიას მიმართა პლატფორმამ "არა ფობიას!". პლატფორმის წევრები მიიჩნევდნენ, რომ არაეთიკური იყო 9 თებერვალს გამოქვეყნებულ სიუჟეტი, რომელიც ეხებოდა საქართველოს მესამე პრეზიდენტის, მიხეილ სააკაშვილისა და ემიგრანტების შეხვედრას ლიეჟში, ბელგიაში. მასალაში ნათქვამი იყო, რომ პარალელურად ლგბტ პირთა წვეულება გაიმართა. განმცხადებელი მიიჩნევს, რომ პოლიტიკური პარტიის ღონისძიების დისკრედიტაციას ჰომოფობიური განწყობების გაღვივებით და დაუსაბუთებელი კავშირების ჩვენებით ცდილობდნენ.

გადაწყვეტილების დასაბუთებული ნაწილი მოგვიანებით გამოქვეყნდება.

საქართველოს ჟურნალისტური ეთიკის ქარტიის საბჭოს გადაწყვეტილებით, გაზეთ "ასავალ-დასავალის"  ჟურნალისტმა მეგი საჯაიამ დაარღვია ქარტიის პირველი (სიზუსტე) და მეხუთე (შესწორება) პრინციპები.  სადავო მასალა "შირაქმა ასავალ-დასავალს და ჯაბა ექიმს სასამართლოში უჩივლა!" 2019 წლის 4 თებერვლის ნომერში გამოქვეყნდა და ეხებოდა შპს "შირაქის" მიერ წარმოებულ პროდუქტს და მათ მიერ "ასავალ-დასავალის" მასალის გასაჩივრებას.  განმცხადებელი მიიჩნევდა, რომ სადავო მასალაში ინტერვიუს დროს ავტორსა და რესპონდენტს შეცდომაში შეჰყავს აუდიტორია თითქოს შპს "შირაქი" არღვევს კანონს.

საქმის განხილვას ესწრებოდა განმცხადებელი. მოპასუხე ჟურნალისტი სხდომას არ დასწრებია და არც შეპასუხება წარმოუდგენია.