საქართველოს ჟურნალისტური ეთიკის ქარტია ყურადღებით აკვირდება ტელეკომპანია “იბერიის” ირგვლივ განვითარებულ მოვლენებს. ტელეკომპანიის ჟურნალისტები აცხადებენ, რომ მათ არხზე ხორციელდება ხელისუფლების ზეწოლა დამფინანსებელი კომპანიისთვის პრობლემების შემქმნით.

საქართველოს ჟურნალისტური ეთიკის ქარტიამ დასაშვებად სცნო საპრეზიდენტო კანდიდატის, გრიგოლ ვაშაძის საარჩევნო შტაბის უფროსის, გიორგი ვაშაძს განცხადება ტელეკომპანია "იმედის" ჟურნალსიტების, ნატა ქაჯაიასა და ლევან ჯავახიშვილის წინააღმდეგ.

მას პრეტენზია აქვს იმედის მიერ 29, 30, 31 აგვისტოს მომზადებულ მასალებთან დაკავშირებით, რომელიც გრიგოლ ვაშაძის მიერ წლების წინ გაკეთებულ განცხადებას ეხება. განმცხადებელი მიიჩნევს, რომ "იმედმა" "საზოგადოებას მიაწოდა არასწორი ინფორმაცია." შესაბამისად, მისი აზრით, დარღვეულია ქარტიის პირველი (სიზუსტე), მეხუთე (შესწორება) და მეშვიდე (დისკრიმინაცია) პრინციპები.

ქარტიის საბჭო განცხადებას 12 სექტემბერს, ოთხშაბათს 19:00 საათზე განიხილავს.

გრძელდება საარჩევნო მედიამონიტორინგი, რომელსაც ევროკავშირისა და UNDP-ის ხელშეწყობით, არასამთავრობო ორგანიზაციები განახორციელებენ. 10 სექტემბერს გამართულ შეხვედრაზე მედია-მონიტორების გუნდმა მონიტორინგში მონაწილე მედია-საშუალებების ჟურნალისტებსა და პროდიუსერებს არჩევნების გაშუქების ძირითადი ტენდენციები გააცნო. მედიამონიტორინგის წინასწარი ანგარიში 26 ოქტომბერს, არჩევნებამდე ორი დღით ადრე გამოქვეყნდება. 

მონაწილეებს რეგიონიდან აუნაზღაურდებათ მგზავრობისა და დედაქალაქში დარჩენის ხარჯები.

მედიაში გავრცელებული ინფორმაციის თანახმად, საზოგადოებრივი მაუწყებლის ათეულობით თანამშრომელს მიუვიდა შეთავაზება, რომლის თანახმადაც ან უნდა მოხდეს შრომითი ხელშეკრულების არსებითი პირობების შეცვლა, ან შეწყდეს შრომითი ურთიერთობა მათთან. მიგვაჩნია, რომ აღნიშნული შეთავაზება არის დაუსაბუთებელი და შესაძლოა მიზნად ისახავდეს ათეულობით ადამიანის სამსახურიდან გათავისუფლებას. საზოგადოებრივი მაუწყებლის გარშემო განვითარებული მოვლენები არაერთ კითხვას აჩენს, რომელსაც პასუხი არც გავრცელებული განცხადებით გაეცა.

საქართველოს ჟურნალისტური ეთიკის ქარტიის საბჭოს გადაწყვეტილებით reportiori.ge-ს არაიდენტიფიცირებულმა ჟურნალისტმა ქარტიის პირველი პრინციპი დაარღვია, რომელიც ჟურნალისტს ზუსტი ინფორმაციის გავრცელებას ავალდებულებს. მის წინააღმდეგ ქარტიას მეგი გოცირიძემ მიმართა. ის მიიჩნევდა, რომ სტატია სათაურით "მეგი გოცირიძე პარიზში ქურდობისთვის დააკავეს" არასწორ ინფორმაციას მოიცავდა. მისი თქმით, ბრალდებების მიუხედავად გამოცემა არ დაკავშირებია მას და არ უცდია ინფორმაციის გადამოწმება.

ქარტიის საბჭომ საქმის განხილვისას გაიზიარა განმცხადებლის არგუმენტაცია და პირველი პრინციპის დარღვევა დაადგინა. reportiori.ge-მ არ ითანამშრომლა ქარტიასთან, არც შეპასუხება გამოაგზავნა და არც პასუხისმგებელი ჟურნალისტის ვინაობა აცნობა.

გადაწყვეტილების სამოტივაციო ნაწილი მოგვიანებით გამოქვეყნდება.

საქართველოს ჟურნალისტური ეთიკის ქარტიის საბჭოს სამდივნომ დასაშვებად სცნო საქართველოს სუიციდის პრევენციის ასოციაციის ორი განცხადება ტელეკომპანია რუსთავი 2-ის მიერ მომზადებულ ორ სიუჟეტთან დაკავშირებით.

პირველი განცხადება ეხება გურიაში მომხდარ სუიციდის ფაქტს, რომლის შესახებ სიუჟეტი 18 აგვისტოს "კურიერის" ეთერში გავიდა. განცხადების თანახმად, სიუჟეტში ნაჩვენებია გარდაცვლილის წერილი, რაც "რომანტიზირებას სძენს თავად ფაქტს და შეიცავს საფრთხეს, რომ სხვა ადამიანებს, განსაკუთრებით მგრძნობიარე მოზარდებს გაუჩნდეთ განცდა, რომ მხოლოდ სუიციდის შემდეგ დააფასებენ მათ სიცოცხლეს ან ამ გზით მიიქცევენ ყურადღებას". რესპონდენტის მხრიდან გასაჯაროვდა არასრულწლოვნის პირადი ცხოვრების დეტალებიც. შესაბამისად, განმცხადებლის აზრით, დარღვეულია ქარტიის მეშვიდე (დისკრიმინაცია), მერვე (ბავშვის ინტერესი) და მეათე (პირადი ცხოვრების ხელშეუხებლობა) პრინციპები.

მეორე განცხადებაში კი საუბარია 14 აგვისტოს "კურიერის" ეთერში გასულ სიუჟეტზე, რომელშიც ახალი ინტერნეტ თამაში არასრულწლოვნებისთვის სახიფათოდ და სუიციდის მაპროვოცირებლად არის წარმოჩენილი. განმცხადებელი მიიჩნევს, რომ სიუჟეტში დადასტურებულ ფაქტად არის მოცემული ის დეტალები, რაც ჟურნალისტს სათანადოდ არ გადაუმოწმებია, შესაბამისად, მისი აზრით, დარღვეულია სიზუსტისა და ბავშვის ინტერესების დაცვის პრინციპები.

საქართველოს ჟურნალისტური ეთიკის ქარტიის საბჭომ დასაშვებად სცნო ორგანიზაციის "პარტნიორობა ადამიანის უფლებებისთვის" (PHR) განცხადება ტელეკომპანია "რუსთავი 2-ის" ჟურნალისტის, დავით დვალიშვილის წინააღმდეგ. 

სადავო გახდა 18 აგვისტოს საინფორმაციო გამოშვება "კურიერის" ეთერში გასული სიუჟეტი, რომელიც გურიაში მომხდარ არასრულწლოვანის სუიციდს ეხებოდა. განმცხადებელი მიიჩნევს, რომ სიუჟეტი შეიცავს გოგოს პირადი ცხოვრების დეტალების შესახებ ინფორმაციას - გასაჯაროებულია არასრულწლოვანის პირადი ფოტოები, თვითმკვლელობამდე დატოვებული წერილი, რომელშიც თვითმკვლელობის მიზეზებზე საუბრობს და სოციალურ ქსელში პირადი მიმოწერის დეტალები.

"სიუჟეტში გასული კომენტარიდან იკვეთება გენდერული ნიშნით დისკრიმინაციის წახალისების საფრთხე. ბავშვის პირადი ცხოვრების ამსახველი დეტალების წარმოჩენისას და სექსუალური შევიწროების ფაქტის შესახებ ინფორმაციის გავრცელებისას ჟურნალისტი ვერ ითვალისწინებს და უგულებელყოფს ბავშვის საუკეთესო ინტერესებს", - აღნიშნულია განცხადებაში.  შესაბამისად PHR-ი მიიჩნევს, რომ დარღვეულია ქარტიის შემდეგი პრინციპები: მეშვიდე (დისკრიმინაცია), მერვე (ბავშვის ინტერესი) და მეათე (პირადი ცხოვრების ხელშეუხებლობა).

ქარტიის საბჭო გადაწყვეტილებას საქმის განხილვის შემდეგ მიიღებს.

ქარტიის მედისკოლა 2018 წლის მეორე ჯგუფის დასაკომპლექტებლად სტუდენტთა მიღებას იწყებს.  მონაწილეებს შესაძლებლობა ექნებათ 5 თვის განმავლობაში იმუშაონ სხვადასხვა მიმართულებით და გააშუქონ მიმდინარე მოვლენები. კურსის ფარგლებში სტუდენტები გაივლიან შემდეგ 5 მოდულს:

ახალი ამბების გაშუქება

• რა არის ახალი ამბავი?
• ინფორმაციის მოპოვება და გავრცელება
• ინფორმაციის წყაროები

ინფორმაციის გადამოწმება

• ინფორმაციის გადამოწმების ხერხები
• არსებული მონაცემთა ბაზების გამოყენება (სახელმწიფო ტენდერები, საჯარო რეესტრი, აუდიტის სამსახური)
• დოკუმენტებთან მუშაობა
• კავშირის დადგენა გადაწყვეტილების მიმღებ პირებსა და კერძო პირებს/კომპანიებს შორის

წერის ტექნიკა

• პრაქტიკული მუშაობისას წერის სტილის, სტრუქტურის დახვეწა
• ფორმების მრავალფეროვნება

ეთიკური დილემები

• საჯარო ინტერესის ტესტი მედიისთვის
• ეთიკური საკითხები, რომლის გადაწყვეტაც ჟურნალისტს უწევს მუშაობისას

ამბის მოყოლის ფორმები

• ინფორმაციის გადაცემის მულტიმედია ხერხები
• პლატფორმები, რომელიც ვიზუალური მრავალფეროვნებისთვის შეიძლება იყოს გამოყენებული

თითოეულ მოდულს გაუძღვებიან გამოცდილი ჟურნალისტები - მაია მეცხვარიშვილი, გიორგი მგელაძე, ნინო ჯაფიაშვილი, ზვიად ქორიძე, ნათია კუპრაშვილი. მათ გარდა მოისმენენ სხვა პრაქტიკოსი რეპორტიორების მასტერ კლასებს და პრაქტიკულად მოამზადებენ ჟურნალისტურ მასალებს.

პროექტში მონაწილეობა უფასოა. კანდიდატი უნდა იყოს ბაკალავრიატის დამამთავრებელი ან/და მაგისტრატურის სტუდენტი ვისაც სურს, რომ გახდეს ჟურნალისტი.

მედიასკოლაში სწავლის მსურველებმა შეავსეთ სააპლიკაციო ფორმა. განაცხადების მიღების ბოლო ვადაა 2018 წლის 3 სექტემბერი, 18:00 საათი

პირველ ეტაპზე შერჩეულ აპლიკანტებთან გაიმართება გასაუბრება, რის შემდეგაც 15 საუკეთესო მოხვდება ჯგუფში. სწავლა სექტემბრიდან დაიწყება.

ქარტიის მედიასკოლა საქართველოს ჟურნალისტური ეთიკის ქარტიამ 2018 წლის მარტში შექმნა. სკოლა ორიენტირებულია დამწყები ჟურნალისტებისთვის პრაქტიკული უნარ-ჩვევების განვითარებაზე. პირველმა ჯგუფმა  მუშაობა ივლისში დაასრულა.

უფრო ვრცლას სკოლის შესახებ ინფორმაცია შეგიძლიათ იხილოთ სტუდენტების მიერ შექმნილ ბლოგზე

საკონტაქტო ინფორმაცია:
მისამართი: თბილისი, შიო მღვიმელის ქუჩა 6ბა
ტელეფონი: 2912870
E-mail: ethicscharter@gmail.com

საქართველოს ჟურნალისტური ეთიკის ქარტიის საბჭოს გადაწყვეტილებით, ტელეკომპანია "რუსთავი 2-ის" ჟურნალისტს, ეკა გაგუას ქარტიის პრინციპები არ დაურღვევია. მის წინააღმდეგ განცხადება პარლამენტის წევრმა ეკა ბესელიამ შემოიტანა. ის მიიჩნევდა, რომ საინფორმაციო გამოშვება "კურიერში" 2018 წლის 16 ივნისს გასული სიუჟეტი, რომელიც ეხებოდა ეკა ბესელიას კავშირს კომპანია "ქიუნეტთან", არასწორ ინფორმაციას შეიცავდა. მისი აზრით, დარღვეული იყო ქარტიის პირველი (სიზუსტე), მესამე (მიჩქმალვა) და მეთერთმეტე (ფაქტის განზრახ დამახინჯება) პრინციპები. 

საქმის განხილვას ესწრებოდა განმცხადებლის წარმომადგენელი. რუსთავი 2-ის საინფორმაციო სამსახურის უფროსმა კი საბჭოს კითხვებს ტელეფონის მეშვეობით უპასუხა. 

გადაწყვეტილების სამოტივაციო ნაწილი მოგვიანებით გამოქვეყნდება.

საქართველოს ჟურნალისტური ეთიკის ქარტიის საბჭომ დასაშვებად სცნო ვასილ ცინაძის განცხადება პრაიმ ტაიმის ჟურნალისტის, თამთა ონოფრიშვილის წინააღმდეგ. მას მიაჩნია, რომ გამოცემამ პირველი პრინციპი დაარღვია, რადან არასწორი ინფორმაცია გაავრცელა სტატიით "QNET ლეგალური ბიზნესია და ფინანსურ პირამიდასთან მას არანაირი კავშირი არ აქვს". ვასილ ცინაძის აზრით, სტატია ეყრდნობა მხოლოდ "QNET-ის" წამომადგენლის მიერ მოწოდებულ ინფორმაციას და არა ფაქტებს. "კომპანია QNET, რომელსაც ადანაშაულებენ ფინანსური პირამიდის ბიზნესში, სათაურშივე გამოცხადებულია ლეგალურ ბიზნესად."

გარდა პირველი პრინციპისა, განმცხადებელს მიაჩნია, რომ დარღვეულია ქარტიის მეცხრე პრინციპიც, რომელიც ჟურნალისტს სარეკლამო და სარედაქციო მასალების გამიჯვნას ავალდებულებს. მისი აზრით, ეს სტატია "პრაიმტაიმმა" ფინანსური სარგებლის სანაცვლოდ გამოაქვეყნა.

საქმეს ქარტიის საბჭო ღია სხდომაზე განიხილავს.

26 ივლისს, 19:00 საათზე, საქართველოს ჟურნალისტური ეთიკის ქარტიის საბჭო განიხილავს ეკა ბესელიას განცხადებას "რუსთავი 2-ის" ჟურნალისტის ეკა გაგუას წინააღმდეგ.

სადავო გახდა 2018 წლის 16 ივნისს, მაუწყებლის ეთერში, საინფორმაციო გამოშვება „კურიერში“ გასული სიუჟეტი, რომელიც ეხებოდა ეკა ბესელიას კავშირს მარკეტინგულ კომპანია „ქიუნეტთან“.

განმცხადებელი მიიჩნევს, რომ „რუსთავი 2-მა“ გაავრცელა არასწორი ინფორმაცია, ვინაიდან კომპანიას არასოდეს ჰქონია და აქვს კავშირი მასთან. ეკა ბესელია მიიჩნნევს, რომ დაირღვა ქარტიის პირველი (ინფორმაციის სიზუსტე), მესამე (მიჩქმალვა) და მეთერთმეტე (ფაქტის განზრახ დამახინჯება) პრინციპები.

საქმის განხილვა საჯაროა და დასწრება ნებისმიერ მსურველს შეუძლია.