საქართველოს ჟურნალისტური ეთიკის ქარტიის საბჭო 3 ივნისს 2 საქმეს ონლაინ განიხილავს: 

18:00 საათზე - არჩილ კაპანაძე „ბათუმელების” რედაქტორის ნანა კვაჭაძის წინააღმდეგ 

სადავო მასალა მედიასაშუალებამ 2022 წლის 20 მაისს გამოაქვეყნა. 

განმცხადებლის პოზიციით, სადავო გადაცემაში გავრცელებული ინფორმაცია არაზუსტია და მკითხველი შეცდომაში შეჰყავს. 

განმცხადებელი თვლის, რომ დარღვეულია ქარტიის პირველი (ინფორმაციის სიზუსტე), მეოთხე (ინფორმაციის მოპოვებისას კეთილსინდისიერი მეთოდების გამოყენება), მეხუთე (შესწორება) და მეშვიდე (დისკრიმინაცია) პრინციპი. 

19:00 საათზე - სულხან ბორძიკაშვილი, სოციალური სამართიანობის ცენტრი რუსთავი 2-ის ჟურნალისტის სანდრო სანაიას წინააღმდეგ 

სადავო მასალა 2022 წლის 7 მაისს გავიდა ეთერში. 

განმცხადებლის პოზიციით, სადავო მასალაში გავრცელებული ინფორმაცია არაზუსტია, ბალანსი კი მხოლოდ ფორმალურად არის დაცული. 

განმცხადებელი თვლის, რომ დარღვეულია ქარტიის პირველი (ინფორმაციის სიზუსტე), მეშვიდე (დისკრიმინაცია) და მეთერთმეტე (ფაქტის განზრახ დამახინჯება) პრინციპი.

სხდომები გაიმართება ონლაინ, პროგრამა Zoom-ის მეშვეობით. მათზე დასწრების მსურველებმა შეგიძლიათ მოთხოვნა გამოაგზავნოთ ელექტრონულ ფოსტაზე - ethicscharter@gmail.com 

საქმეების განხილვა ღიაა და ნებისმიერ მსურველს შეუძლია დასწრება. 

საქართველოს ჟურნალისტური ეთიკის ქარტია იწვევს მედიის წარმომადგენლებს გენდერისა და ლგბტქი საკითხების ეთიკურად გაშუქების შესახებ ტრენინგში მონაწილეობის მისაღებად.

ტრენინგები ჩატარდება ონლაინ, პროგრამა Zoom-ის მეშვეობით.

პირველი ტრენინგი ჩატარდება 30 და 31 მაისს, ხოლო მეორე - 2 და 3 ივნისს. ტრენინგებს ჩაატარებს სტუდია „მონიტორის" რედაქტორი მაია მეცხვარიშვილი. 

რა არის გენდერულად მგრძნობიარე რეპორტაჟის მომზადება, რატომ არის მნიშვნელოვანი ამ საკითხებზე მუშაობა, როგორია არამგრძნობიარე/საზიანო რეპორტაჟის მომზადების გავრცელებული ფორმები, რას ნიშნავს სამართლიანი და დაბალანსებული გაშუქება, როგორია საუკეთესო გამოცდილება ქალების და ლგბტქი პირების მიმართ ძალადობის შესახებ ინფორმაციის გაშუქებისას - ამ საკითხებს მოიცავს 2 დღიანი ტრენინგ-კურსი. 

რეგისტრაცია შეგიძლიათ გაიაროთ ბმულზე - https://bit.ly/3a6SCAz

პირველ ტრენინგზე განაცხადების მიღების ბოლო ვადაა 2022 წლის 28 მაისი 18:00 საათი, ხოლო მეორე ტრენინგზე განაცხადების მიღების ბოლო ვადაა 2022 წლის 31 მაისი 18:00 საათი. 

ქარტია გააგრძელებს აღნიშნულ საკითხებზე ტრენინგის ჩატარებას სხვადასხვა ტრენერის მონაწილეობით. ამის შესახებ ინფორმაცია გამოქვეყნდება ჩვენს ვებ-გვერდზე. 

ტრენინგები ორგანიზებულია საქართველოს ჟურნალისტური ეთიკის ქარტიის მიერ, გაეროს ქალთა ორგანიზაციასთან (UN Women) თანამშრომლობით, პროექტის „ქალებისა და გოგოების მიმართ ძალადობის წინააღმდეგ“, რომელსაც გაეროს ქალთა ორგანიზაცია და გაეროს მოსახლეობის ფონდი ევროკავშირის მხარდაჭერით ახორციელებენ.         

საქართველოს ჟურნალისტური ეთიკის ქარტიის საბჭო 26 მაისს 2 საქმეს ონლაინ განიხილავს: 

18:00 საათზე - რატი იონათამიშვილი ტელეკომპანია „პირველის” ჟურნალისტის ინგა გრიგოლიას წინააღმდეგ 

სადავო მასალა მედიასაშუალების ეთერში 2022 წლის 28 აპრილს გადაცემა „რეაქციის” ეთერში გავიდა. 

განმცხადებლის პოზიციით, სადავო გადაცემის სტუმრის მხრიდან გაჟღერდა დისკრიმინაციული ენა, რასაც ჟურნალისტი არ გაემიჯნა.   

განმცხადებელი თვლის, რომ დარღვეულია ქარტიის მეშვიდე (დისკრიმინაცია) პრინციპი. 

19:00 საათზე - ირმა ჭკადუა ტელეკომპანია „პირველის” ჟურნალისტის ნატა ქაჯაიას წინააღმდეგ 

სადავო მასალა 2022 წლის 30 აპრილს გავიდა ეთერში. 

განმცხადებლის პოზიციით, სადავო მასალაში რესპონდენტის მხრიდან გავრცელდა არასწორი ინფორმაცია, ჟურნალისტი კი არ დაუკავშირდა ბრალდებულ მხარეს ინფორმაციის გადასამოწმებლად. 

განმცხადებელი თვლის, რომ დარღვეულია ქარტიის პირველი (ინფორმაციის სიზუსტე) პრინციპი.

სხდომები გაიმართება ონლაინ, პროგრამა Zoom-ის მეშვეობით. მათზე დასწრების მსურველებმა შეგიძლიათ მოთხოვნა გამოაგზავნოთ ელექტრონულ ფოსტაზე - ethicscharter@gmail.com 

საქმეების განხილვა ღიაა და ნებისმიერ მსურველს შეუძლია დასწრება. 

საქართველოს ჟურნალისტური ეთიკის ქარტია იწვევს მედიის წარმომადგენლებს გენდერისა და ლგბტქი საკითხების ეთიკურად გაშუქების შესახებ ტრენინგში მონაწილეობის მისაღებად.

ტრენინგები ჩატარდება Frontline Georgia-ში. ტრენინგებში მონაწილეობის მიღება შეუძლიათ მედიის წარმომადგენლებს, რომლებიც თბილისში მუშაობენ. 

ტრენინგს 2022 წლის 23-24 მაისს ჟურნალისტური ეთიკის ქარტიის საბჭოს წევრი ხატია ღოღობერიძე, ხოლო 2022 წლის 26-27 მაისს ტელეკომპანია „ფორმულას" ციფრული დეპარტამენტის მთავარი რედაქტორი, ტოქშოუს წამყვანი სალომე უგულავა ჩაატარებს.

რა არის გენდერულად მგრძნობიარე რეპორტაჟის მომზადება, რატომ არის მნიშვნელოვანი ამ საკითხებზე მუშაობა, როგორია არამგრძნობიარე/საზიანო რეპორტაჟის მომზადების გავრცელებული ფორმები, რას ნიშნავს სამართლიანი და დაბალანსებული გაშუქება, როგორია საუკეთესო გამოცდილება ქალების და ლგბტქი პირების მიმართ ძალადობის შესახებ ინფორმაციის გაშუქებისას - ამ საკითხებს მოიცავს 2 დღიანი ტრენინგ-კურსი. 

რეგისტრაცია შეგიძლიათ გაიაროთ ბმულზე - https://bit.ly/3a94JgG

პირველ ტრენინგზე განაცხადების მიღების ბოლო ვადაა 2022 წლის 21 მაისი 18:00 საათი, ხოლო მეორე ტრენინგზე განაცხადების მიღების ბოლო ვადაა 2022 წლის 24 მაისი 18:00 საათი.

ქარტია გააგრძელებს აღნიშნულ საკითხებზე ტრენინგის ჩატარებას სხვადასხვა ტრენერის მონაწილეობით. ამის შესახებ ინფორმაცია გამოქვეყნდება ჩვენს ვებ-გვერდზე. 

ტრენინგები ორგანიზებულია საქართველოს ჟურნალისტური ეთიკის ქარტიის მიერ, გაეროს ქალთა ორგანიზაციასთან (UN Women) თანამშრომლობით, პროექტის „ქალებისა და გოგოების მიმართ ძალადობის წინააღმდეგ“, რომელსაც გაეროს ქალთა ორგანიზაცია და გაეროს მოსახლეობის ფონდი ევროკავშირის მხარდაჭერით ახორციელებენ.     

 

საზოგადოებრივი ორგანიზაციები მხარდაჭერას ვუცხადებთ ნიკა გვარამიას და „მთავარი არხის” გუნდს.

თბილისის საქალაქო სასამართლოს მიერ 2022 წლის 16 მაისს მიღებული გადაწყვეტილება და ნიკა გვარამიასთვის თავისუფლების აღკვეთის მისჯა აღიქმება როგორც გაფრთხილება და მუქარა სხვა დამოუკიდებელი მედიასაშუალებების მიმართ, რათა შეწყვიტონ ხელისუფლების საქმიანობის კრიტიკულად გაშუქება, არ შეასრულონ ხელისუფლების მაკონტროლებელი ფუნქცია და უარი თქვან ხელისუფლებისთვის არასასურველი ფაქტების საზოგადოებამდე მიტანაზე.

კრიტიკული მედიასაშუალების გენერალური დირექტორის მიმართ გამამტყუნებელი განაჩენის გამოტანა მათ შორის, მენეჯერული გადაწყვეტილების მიღების გამო წარმოადგენს შერჩევითი გამოძიების, სისხლისსამართლებრივი დევნის და მსჯავრდების კიდევ ერთ მაგალითს.

ვფიქრობთ, მსგავსმა პროცესებმა შესაძლოა უარყოფითი გავლენა მოახდინოს საქართველოს ევროპული ინტეგრაციის პროცესზე.

ხელმომწერი ორგანიზაციები:

საერთაშორისო გამჭვირვალობა - საქართველო

საქართველოს ახალგაზრდა იურისტთა ასოციაცია

სამართლიანი არჩევნების და დემოკრატიის საერთაშორისო საზოგადოება

ინფორმაციის თავისუფლების განვითარების ინსტიტუტი

ლიბერალური აკადემია თბილისი

მედიაკლუბი

მედიის განვითარების ფონდი

მედიის უფლებები

რეგიონულ მაუწყებელთა ალიანსი

სატელევიზიო ქსელი

საქართველოს დემოკრატიული ინიციატივა

საქართველოს რეგიონული მედიის ასოციაცია

საქართველოს მცირე და საშუალო სატელეკომუნიკაციო ოპერატორთა ასოციაცია

საქართველოს ჟურნალისტური ეთიკის ქარტია

უფლებები საქართველო

ღია საზოგადოების ფონდი

მედიაომბუდსმენი

საქართველოს რეფორმების ასოციაცია (GRASS)

საქართველოს სასამართლოს გუშაგი (Georgian Court Watch)

მწვანე ალტერნატივა

მმართველობის მონიტორინგის ცენტრი (GMC)

საქართველოს პენცენტრი

ადამიანის უფლებათა ცენტრი (HRC)

საზოგადოება და ბანკები

ეკონომიკური პოლიტიკის კვლევის ცენტრი (EPRC)

ტოლერანტობის და მრავალფეროვნების ინსტიტუტი (TDI)

სამოქალაქო საზოგადოების ინსტიტუტი (CSI)

დემოკრატიის ინსტიტუტი

ევროპის ფონდი

ცენტრი „ემპათია”

მწვანე სექტორი

თავისუფალ ჟურნალისტთა სახლი

დემოკრატიის კვლევის ინსტიტუტი (DRI)

სოციალური სამართლიანობის ცენტრი

სირცხვილია • Shame Movement

 

საქართველოს ჟურნალისტური ეთიკის ქარტიის სამდივნომ დასაშვებად ცნო ირმა ჭკადუას განცხადება TV პირველის ჟურნალისტის ნატა ქაჯაიას წინააღმდეგ.

სადავო ინტერვიუ ნიკოლოზ ბასილაშვილის ყოფილ მეუღლესთან, ნეკა დოროყაშვილთან, ტელეკომპანიის ეთერში, გადაცემაში “ნოდარ მელაძის შაბათი” 2022 წლის 30 აპრილს გავიდა.

განმცხადებლის პოზიციით, სადავო ჟურნალისტურ პროდუქტშირესპონდენტის მიერ გაჟღერებული ინფორმაცია ნიკოლოზ ბასილაშვილთან დაკავშირებით, სიმართლეს არ შეესაბამება, ხოლო ჟურნალისტს არ უცდია ფაქტების მეორე მხარესთან გადამოწმება.

განმცხადებელი დავობს ქარტიის პირველი (ინფორმაციის სიზუსტე) პრინციპის დარღვევაზე.

ქარტიის საბჭო განცხადებას ღია სხდომაზე განიხილავს და გადაწყვეტს დაირღვა თუ არა ქარტიის პრინციპი.

საქართველოს ჟურნალისტური ეთიკის ქარტიის სამდივნომ დასაშვებად ცნო რატი იონათამიშვილის განცხადება TV პირველის - გადაცემა “რეაქცია” წამყვანის - ინგა გრიგოლიას წინააღმდეგ.

სადავო გადაცემა ტელეკომპანიის ეთერში 2022 წლის 28 აპრილს გავიდა.

განმცხადებლის პოზიციით, სადავო გადაცემაში მოწვეულმა სტუმარმა - ლევან ერაძემ, შეზღუდული შესაძლებლობების მქონე პირების მიმართგამოიყენა დისკრიმინაციული ტერმინი, ხოლო ჟურნალისტს ამ შეფასებაზერეაგირება არ ჰქონია, რითიც ხელი შეუწყო საზოგადოებაში დამკვიდრებული სტერეოტიპების გამყარებას. განმცხადებელი დავობს ქარტიის მეშვიდე - დისკრიმინაციის წახალისების პრინციპის დარღვევაზე.

ქარტიის საბჭო განცხადებას ღია სხდომაზე განიხილავს და გადაწყვეტს დაირღვა თუ არა ქარტიის პრინციპი.

2022 წლის 16 მაისს თბილისის საქალაქო სასამართლომ უნდა გამოაცხადოს განაჩენი ტელეკომპანია „რუსთავი 2-ის” ყოფილი დირექტორის, ამჟამად “მთავარი არხის“ დამფუძნებლის და გენერალური დირექტორის ნიკა გვარამიას და მასთან დაკავშირებული პირების წინააღმდეგ წარმოებულ სისხლის სამართლის საქმეზე.

მედიის ადვოკატირების კოალიცია კიდევ ერთხელ ეხმიანება კრიტიკული სარედაქციო პოლიტიკის მქონე მაუწყებლის ირგვლივ განვითარებულ პროცესებს.

გვაქვს ლეგიტიმური მოლოდინი, რომ სასამართლო სათანადო ყურადღებას დაუთმობს ნიკა გვარამიას საქმესთან დაკავშირებით მომზადებულ დასკვნებს:

სახალხო დამცველმა ნიკა გვარამიასათვის წარდგენილი ბრალდების შეფასებისას განმარტა, რომ კომპანიის დირექტორის მიერ მიღებული გადაწყვეტილება არათუ სისხლის სამართლის, არამედ საკორპორაციო-სამართლებრივ პასუხისმგებლობასაც კი მხოლოდ განსაკუთრებულ შემთხვევებში ექვემდებარება, ხოლო პროკურატურის მიერ ნიკა გვარამიასთვის წარდგენილი ბრალდება არ შეიცავს სისხლისსამართლებრივი პასუხისმგებლობის დაკისრებისთვის საკმარის მკაფიო ნიშნებს.

კოალიციის წევრი ორგანიზაციის - „საერთაშორისო გამჭვირვალობა - საქართველოს“ დასკვნის თანახმად, არ დასტურდება ნიკა გვარამიას მიერ ქონებრივი უფლების გაფლანგვის, კომერციული მოსყიდვის, ყალბი ოფიციალური დოკუმენტის დამზადებისა და გამოყენების, ასევე უკანონო შემოსავლის ლეგალიზაციის ბრალდებები.

ნიკა გვარამიას წინააღმდეგ სასამართლო დავას ადგილობრივი თუ საერთაშორისო საზოგადოება მესამე წელია ყურადღებით აკვირდება. დღეს უკვე ცხადია, რომ ტელეკომპანია „რუსთავი 2-ის“ მფლობელების ცვლილებასთან დაკავშირებით სასამართლოს მიერ მიღებული გადაწყვეტილების შედეგად ტელეარხის სარედაქციო პოლიტიკა შეიცვალა და ხელისუფლების მიმართ მიკერძოებული გახდა, ხოლო სამართლებრივი პროცესი საზოგადოების დიდი ნაწილის მიერ აღქმულია, როგორც მმართველი პარტიის მიერ მართული. ასეთივე ლეგიტიმური ეჭვები არსებობს ნიკა გვარამიას პროცესის მიმართ.

სასამართლო ვალდებულია გაითვალისწინოს ეს გარემოებები, ასევე, მედიის საქმიანობის მიმართ საჯარო ინტერესი და მიიღოს დასაბუთებული, მართლმსაჯულების მაღალი სტანდარტის შესაბამისი გადაწყვეტილება, რომელიც სასამართლოზე შესაძლო პოლიტიკური ზეწოლის შესახებ ეჭვებს გაფანტავს.

გუშინ, 2022 წლის 10 მაისს „TV პირველის" წამყვანმა ვიკა ბუკიამ გაავრცელა მიმოწერა, რომლის შინაარსის მიხედვით, „TV პირველის” წამყვანებს სიცოცხლის მოსპობით ემუქრებიან. მუქარა კავშირშია ჟურნალისტთა პროფესიულ საქმიანობასთან.

მედიის ადვოკატირების კოალიცია მიიჩნევს, რომ სახელმწიფო ვალდებულია დაიცვას ჟურნალისტები და შეაჩეროს საფრთხეები, რაც მათი სიცოცხლის ხელშეუხებლობას და პროფესიული საქმიანობის თავისუფლებას უკავშირდება.

ჟურნალისტებსა და სხვა მედია აქტორებზე თავდასხმასა და მათ დაშინებას გარდაუვალი მსუსხავი ეფექტი აქვს გამოხატვის თავისუფლებაზე. ეს ეფექტი კიდევ უფრო მძაფრია, თუ თავდასხმებისა და დაშინების ფაქტებს თან ახლავს დამნაშავეთა დაუსჯელობა. აღნიშნულის გათვალისწინებით, კოალიცია მიმართავს სპეციალურ საგამოძიებო სამსახურს სწრაფი და ეფექტური გამოძიებით დაიცვას ჟურნალისტთა უფლებები.

 

საქართველოს ჟურნალისტური ეთიკის ქარტიის საბჭო 13 მაისს 2 საქმეს ონლაინ განიხილავს: 

17:00 საათზე - თამარ ტალიაშვილი ტელეკომპანია „მთავარი არხის” ჟურნალისტის ქეთა ციცქიშვილის წინააღმდეგ

სადავო მასალა სათაურით „სამართალი შერჩევით“ 2021 წლის 4 დეკემბერს გადაცემაში „მთავარი შაბათს“ გავიდა. 

განმცხადებლის პოზიციით, სადავო მასალაში დაირღვა არასრულწლოვანის უფლებები, რადგან მისი ფოტოსურათი დაუფარავად გავრცელდა. 

განმცხადებელი თვლის, რომ დარღვეულია ქარტიის მერვე (ბავშვთა უფლებები) პრინციპი.

18:00 საათზე - მარინა კობახიძე ტელეკომპანია „მთავარი არხის” ჟურნალისტის ნათია გოგსაძის წინააღმდეგ

სადავო მასალა 2022 წლის 2 მაისს გავიდა ეთერში. 

განმცხადებლის პოზიციით, სადავო მასალაში გავრცელებულ ინფორმაცია აძლიერებს სტერეოტიპებს შშმ პირების მიმართ, ხოლო წამყვანი არ გაემიჯნა სტუმრის მხრიდან გამოთქმულ დისკრედიტაციულ გამონათქვამს. 

განმცხადებელი თვლის, რომ დარღვეულია ქარტიის მეშვიდე (დისკრიმინაცია) პრინციპი.

სხდომები გაიმართება ონლაინ, პროგრამა Zoom-ის მეშვეობით. მათზე დასწრების მსურველებმა შეგიძლიათ მოთხოვნა გამოაგზავნოთ ელექტრონულ ფოსტაზე - ethicscharter@gmail.com 

საქმეების განხილვა ღიაა და ნებისმიერ მსურველს შეუძლია დასწრება. 

საქართველოს ჟურნალისტური ეთიკის ქარტიის საბჭოს გადაწყვეტილებით, ტელეკომპანია რუსთავი2-ზე ჟურნალისტ ნინო ფურკარაძის მიერ მომზადებულ სიუჟეტში და tv4.ge გამოქვეყნებულ მასალაში, ქარტიის პირველი - ინფორმაციის სიზუსტის პრინციპის დარღვევა არ დადგინდა.

მოპასუხეების წინააღმდეგ ქარტიას შპს “სფეის ლაბმა” მომართა. ორივე მასალა იდენტურ თემას - შპს “სფეის ლაბის” მიერ PCR ტესტირებას პუნქტის მოწყობას ეხებოდა. განმცხადებელი მიიჩნევდა, რომ სადავო მასალებში გაჟღერებული ინფორმაცია სიმართლეს არ შეესაბამებოდა და იწვევდა მათი რეპუტაციის შელახვას.

გადაწყვეტილების სამოტივაციო ნაწილი მოგვიანებით გამოქვეყნდება.

ქარტია დაუშვებლად მიიჩნევს საზოგადოებრივი მაუწყებლის აჭარის ტელევიზიისა და რადიოს მენეჯმენტის მიერ ისეთი საკადრო პოლიტიკის გაგრძელებას, რომელიც სამსახურიდან დევნის პროფესიონალ კადრებს და ანგრევს საზოგადოებრივი მაუწყებლის პრინციპებს.

2022 წლის 2 მაისს ცნობილი გახდა, რომ აჭარის ტელევიზიისა და რადიოს თანამშრომლის, მაია მერკვილაძის მიმართ დაიწყო დისციპლინური წარმოება, ვინაიდან ბიულეტენზე ყოფნის დროს ესწრებოდა საკუთარ სასამართლო პროცესს.

ამასთან, 2022 წლის 28 აპრილს ცნობილი გახდა, რომ საზოგადოებრივი მაუწყებლის აჭარის ტელევიზიამ დისციპლინური ღონისძიების უმაღლესი ზომა, სამსახურიდან გათავისუფლება გამოიყენა გადაცემა „უცხო სუნელის“ წამყვანის, ალექსანდრე თხილაიშვილის მიმართ.

ქარტია მიიჩნევს, რომ  მენეჯმენტის მიერ მიღებული ზომები არაადეკვატურია და არ შეიძლება დარჩეს სათანადო ყურადღების გარეშე. 

აჭარის ტელევიზიაში მიმდინარე პროცესები უკიდურესად შემაშფოთებელია. ალტერნატიული პროფკავშირების წევრების მიმართ მენეჯმენტის მიერ მიღებული საკადრო გადაწყვეტილებები ემსახურება განსხვავებული შეხედულებების დევნას.