ჟურნალისტური ეთიკის ქარტიის სამდივნომ დასაშვებად სცნო გიორგი მგალობლიშვილის განცხადება რუსთავის საინფორმაციო პორტალის, "ინფორუსთავის" ჟურნალისტის, გიორგი ჩომახაშვილის წინააღმდეგ.

სადავო გახდა 2017 წლის 4 ოქტომბერს პორტალ „ინფო რუსთავის“ მიერ გამოქვეყნებული ავტოსაგზაო შემთხვევის ამსახველი ვიდეო. განცხადების თანახმად ვიდეო ეკუთვნის ქვემო ქართლის ტელევიზიას, პირველად სწორედ მათ გამოაქვეყნეს, რადგან შემთხვევა ტელეკომპანიის გარეთ დამაგრებული ჩართვებისთვის საჭირო კამერამ დააფიქსირა,"ინფო რუსთავმა“ კი ისე დაამონტაჟა, რომ მაიდენტიფიცირებელი წარწერა ამოჭრა, თავისი ლოგო დაადო და არსად მიუთითა ინფორმაციის წყარო. "ეს არ არის პირველი შემთხვევა როდესაც ,,ინფო რუსთავი" ჩვენს მასალას დაუკითხავად იღებს და ავრცელებს როგორც საკუთარს მასალას საკუთარი ლოგოს დადებით", - ნათქვამია განცხადებაში.

განმცხადებელი თვლის, რომ დაირღვა ქარტიის მეოთხე (ინფორმაციის მოპოვების კეთილსინდისიერება) და მე-11 (პლაგიატი) პრინციპი.

ქარტიის საბჭო განცხადებას ღია სხდომაზე განიხილავს.

სადავო მასალა

საქართველოს ჟურნალისტური ეთიკის ქარტიის საბჭოს სამდივნომ დასაშვებად სცნო "ქალთა ინიციატივების მხარდამჭერი ჯგუფის (WISG)" განცხადება ტელეკომპანია "იბერიის" წამყვანის, მაკა რაზმაძის წინააღმდეგ.

სადავო გადაცემა "პრიორიტეტი" ეთერში 2017 წლის 1 ოქტომბერს გავიდა. განცხადების თანახმად, გადაცემაში რესპონდენტმა ჰომოფობიური გამონათქვამი გამოიყენა“. WISG აღნიშნავს, რომ გადაცემის წამყვანის მაკა რაზმაძის მხრიდან რესპოდენტის ფრაზას არ მოჰყოლია სათანადო რეაგირება. განმცხადებლის შეფასებით, გადაცემის ეს ეპიზოდი ხელს უწყობს ლგბტი ადამიანების სტიგმატიზებას და შესაბამისად, ახდენს მათი დისკრიმინაციის წახალისებას.

"ჟურნალისტს რესპოდენტის კომენტარზე საპასუხოდ უნდა გაეკეთებინა შენიშვნა და მკაფიოდ დაეფიქსირებინა მისი და მთლიანად მედია საშუალების პოზიცია, რომ გადაცემის ეთერში ამგვარი ჰომოფობიური შინაარსის კომენტარების გამოყენება არ არის მიზანშეწონილი", - ნათქვამია განცხადებაში. აქედან გამომდინარე, მათი აზრით, დარღვეულია მეშვიდე (დისკრიმინაცია) პრინციპი.

ქარტიის საბჭო განცხადებას ღია სხდომაზე განიხილავს

საკვალიფიკაციო მოთხოვნები:

• მედიის ან მედიასამართლის სფეროში მუშაობის გამოცდილება
• მმართველობითი გამოცდილება.
• პროექტების მართვის გამოცდილება
• საერთაშორისო და ადგილობრივ მედია ორგანიზაციებთან მუშაობის გამოცდილება

ძირითადი მოვალეობები:

• ორგანიზაციის მართვა
• პროექტების მომზადება, შესაბამისი ორგანიზაციებისათვის მათი წარდგენა და მართვა
• ქარტიის საბჭოს გადაწყვეტილებათა შესრულების ორგანიზება
• მესამე პირებთან ქარტიის წარმომადგენლობა

კანდიდატი ვალდებულია წარმოადგინოს:

• CV
• სამოტივაციო წერილი, რომელშიც უნდა მიუთითოს, თუ რატომ სურს აღნიშნული პოზიციის დაკავება და როგორია ორგანიზაციის განვითარების მოკლევადიანი და გრძელვადიანი ხედვა.
• უმაღლესი განათლების დამადასტურებელი დოკუმენტის ასლი

შერჩეულ კანდიდატებთან გაიმართება გასაუბრება.

დოკუმენტები უნდა გამოგზავნოთ შემდეგი ელექტრონული ფოსტის მისამართზე ethicscharter@gmail.com   

განაცხადების მიღების ბოლო ვადაა 2017 წლის 14 ოქტომბრის 18:00 საათი

საქართველოს ჟურნალისტური ეთიკის ქარტიის სამდივნომ დასაშვებად სცნო ბერი დიონისეს (საერო ცხოვრებაში ლაშა ბორძიკული) განცხადება ჟურნალ „თბილისელების“ ჟურნალისტის ხათუნა კორთხონჯიას წინააღმდეგ.

სადავო გახდა 25 სექტემბრის ნომერში გამოქვეყნებული სტატია "რა ურთიერთობა ჰქონდა მოდელ კობა ფარტენაძს დეკანოზ გიორგი მამალაძესთან და როგორ ავიწროვებდა მას მამა ანდრია თურმანიძე". განმცხადებელი აღნიშნავს, რომ ჟურნალის გარეკანზე გამოქვეყნებული სურათი და სტატიის შინაარსი ერთმანეთს არ უკავშირდება და იქმნება შთაბეჭდილება,  თითქოს რაიმე შეხება აქვს გახმაურებულ "ციანიდის" სკანდალთან. განმცხადებელი თვლის, რომ დაირღვა ქარტიის პირველი (ინფორმაციის სიზუსტე), მეათე (პირადი ცხოვრებაში შეჭრა) და მეთერთმეტე (ფაქტის განზრახ დამახინჯება) პრინციპი.

ქარტიის საბჭო განცხადებას ღია სხდომაზე განიხილავს.

საქართველოს ჟურნალისტური ეთიკის ქარტიის საბჭოს გადაწყვეტილებით, "ასავალ - დასავალის" ჟურნალისტმა, დიტო ჩუბინიძემ დაარღვია ქარტიის პირველი 1(სიზუსტე), მეშვიდე (დისკრიმინაცია) და მერვე (ბავშვის ინტერესი) პრინციპი. 

სადავო სახდა "ასავალ-დასავალის" მიერ 2017 წლის №32-ში გამოქვეყნებული სტატია “ეს მოხდა ხობის №2 ე.წ. მომავლის სკოლაში, რომელიც თავის დროზე სააკაშვილმა გახსნა“ და ამავე გაზეთის №33 გამოქვეყნებული სტატია „ხობის #2 სკოლაში ლგბტ კლიპთან დაკავშირებული სკანდალი გრძელდება“. სტატიები ეძღვნებოდა ხობის №2 საჯარო სკოლის მოსწავლეების მიერ შექმნილ ვიდეოს.

ქარტიის საბჭომ საქმე განიხილა ხობში. საქმის განხილვას ესწრებოდა ხობის N2 საჯარო სკოლის დირექტორი და მოსწავლეები. მოპასუხე ჟურნალისტი სხდომას არ დასწრებია და არც შეპასუხება წარმოუდგენია.

გადაწყვეტილების სამოტივაციო ნაწილი მოგვიანებთ გამოქვეყნდება

საქართველოს ჟურნალისტური ეთიკის ქარტიის საბჭომ დასაშვებად სცნო მსახიობ რუსუდან ბოლქვაძის განცხადება "იბერიის" ჟურნალისტის, შოთა ფალავანდიშვილის წინააღმდეგ. 

განცხადების თანახმად, რუსუდან ბოლქვაძეს ტელეკომპანიამ სთხოვა ინტერვიუ ერთ-ერთ საკითხზე, რაზეც უარი განუცხადა. თუმცა ჟურნალისტმა დაითანხმა, რომ მიწოდებინა მისთვის ინფორმაცია როგორც წყაროს. მიუხედავად ამისა, მათი საუბრის ჩანაწერი ეთერში გავიდა. რუსუდან ბოლქვაძე მიიჩნევს, რომ ჟურნალისტმა არაკეთილსინდისიერად მოიპოვა ინფორმაცია და გაამჟღავნა წყარო, შესაბამისად, მისი აზრით, დარღვეულია ქარტიის 1 (სიზუსტე), 4 (ინფორმაციის მოპოვების კეთილსინდისიერება) და 6 (წყაროს დაცვა).

ქარტიის საბჭო საქმეს ღია სხდომაზე განიხილავს.

საქართველოს ჟურნალისტური ეთიკის ქარტიის საბჭომ დასაშვებად სცნო გოჩა ჩხაიძის განცხადება "ალიას" ჟურნალისტის, მაკა დეკანოსიძის წინააღმდეგ. სადავო გახდა სტატია, რომელიც 2017 წლის  N36-ში გამოქვეყნდა სათაურით "ისევ ღორობა და გაუმაძღარობა". მასალა ეხებოდა პროექტ "ჩექ ინ ჯორჯიას" ფარგლებში "ბლექ სი არენაზე" "ირმა ნიორაძისა და სხვა ვარსკვლავების" კონცერტის გამართვას. სტატიის მიხედვით კანონი დაირღვა, კორუფციისა და გაფლანგვის დამადასტურებელი დოკუმენტები კი "ალიას" მიაწოდა ორგანიზაციამ "შეაჩერე კორუფცია".

განცხადების თანახმად, "ალიამ" არაზუსტი ინფორმაცია გაავრცელა, რითიც დაარღვის ქარტიის პირველი პრინციპი. "ინფორმაცია არის გადაუმოწმებელი და არასწორი. როგორც ჟურნალისტი, ისე რესპონდენტი ცდილობენ მკითხველს შეუქმნან შთაბეჭდილება, რომ გოჩა ჩხაიძემ, როგორც ირმა ნიორაძის მეუღლემ, თავისი კომპანიის გამოყენებით მიიღო არამართლზომიერი სარგებელი კონცერტის ორგანიზებით", რაც, განმცხადებლის მტკიცებით, სიმართლეს არ შეესაბამება ვინაიდან მისმა კომპანიამ უფრო მეტი დახარჯა კონცენრტის ორგანიზებისთვის, ვიდრე მიიღო.

ქარტიის საბჭო განცხადებას ღია სხდომაზე განიხილავს.

საზოგადოებრივი მაუწყებლის „აჭარის ტელევიზიის“ ინფორმაციით, თურქეთ-საქართველოს საზღვარზე თურქული მხარის წარმომადგენლებმა მათ ჟურნალისტებს ფიზიკური შეურაცხყოფა მიაყენეს.

 

30 სექტემბერს 13:00 საათზე საქართველოს ჟურნალისტური ეთიკის ქარტიის საბჭო ხობში განიხილავს ამავე მუნიციპალიტეტის N2 საჯარო სკოლის დირექტორის, ნანა ქვარაიას განცხადება გაზეთ "ასავალ-დასავალის" ჟურნალისტის, დიტო ჩუბინიძის წინააღმდეგ.

საქართველოს ჟურნალისტური ეთიკის ქარტიის საბჭომ განიხილა შინაგან საქმეთა სამინისტროს განცხადება ტელეკომპანია "რუსთავი 2-ის" ჟურნალისტების ნოდარ მელაძის, თამარ ბაღაშვილისა და ქეთი ნადიბაიძის წინააღმდეგ. სადავო მასალა ეხებოდა სამინისტროს მიერ მანქანების შესყიდვას. მასალის მიხედვით მანქანების შესაძენად გამოცხადებული ტენდერის პირობები მორგებული იყო სპორტისა და ახალგაზრდობის საქმეთა მინისტრის, ტარიელ ხეჩიკაშვილის კომპანიას. 

ქარტიაში შემოტანილი განცხადების მიხედვით, შსს მიიჩნევდა, რომ  სადავო მასალაში დარღვეული იყო ქარტიის პირველი (სიზუსტე), მე-3 (მიჩქმალვა) და მე-5 (შესწორება) პრინციპები

საბჭოს განხილვას ესწრებოდა როგორც განმცხადებლის წარმომადგენელი, ისე მოპასუხე ჟურნალისტი ნოდარ მელაძე. საბჭომ პირველი პრინციპის დარღვევა დაადგინა სადავო მასალის იმ ნაწილში, სადაც საუბარია 2014 წელს შსს-ს მიერ შეძენილი ფორდების გაუმართაობაზე. მესამე და მეხუთე პრინციპის დარღვევა კი არ დადგინდა. 

გადაწყვეტილების სამოტივაციო ნაწილი მოგვიანებით გამოქვეყნდება.

საქართველოს ჟურნალისტური ეთიკის ქარტიის საბჭოს გადაწყვეტილებით ონლაინ გამოცემა "მარშალპრესის" რედაქტორმა ოთარ სტეფანიშვილმა ქარტიის პირველი (სიზუსტე) და მეხუთე (შესწორება) პრინციპი დაარღვია.

სადავო გახდა მასალა, რომელიც ვებგვერდმა 24 აგვისტოს  სახელწოდებით – “რუსთავი 2”-ის ეთერში გაპარული კადრი – ნოდარ მელაძემ ჩამქრალი ხანძრის გამო შეიგინა (ვიდეო)”მასალის თანახმად “რუსთავი 2-ის” პირდაპირ ეთერში “კურიერის” წამყვანმა ნოდარ მელაძემ დუშეთში გაჩენილი ხანძრის გაშუქებისას, ცეცხლის ჩაქრობის გამო უკმაყოფილება გამოთქვა”. იქვე აღნიშნულია, რომ მას ეგონა, ეთერში არ იყო და შეიგინა

ქარტიას განცხადებით მომართა ტელეკომოანია "რუსთავი 2-ის" ჟურნალისტმა ნოდარ მელაძემ, რომელიც აღნიშნავდა, რომ "მარშალპრესმა" დეზინფორმაცია გაავრცელა, რადგან ხმა, რომელიც ეთერში ისმის, მისი არ არის. განმცხადებელი მიიჩნევდა, რომ ასევე დარღვეული იყო ქარტიის მესამე პრინციპიც (დადასტურებული წყარო), თუმცა საბჭომ ამ მუხლის დარღვევა არ დაადგინა.

ქარტიის საბჭოს სხდომას 24 სექტემბერს მხოლოდ ნოდარ მელაძე ესწრებოდა, ოთარ სტეფანიშვილმა საბჭოს კითხვებს ტელეფონით უპასუხა.

გადაწყვეტილების სამოტივაციო ნაწილი მოგვიანებით გამოქვეყნდება.

საქართველოს ჟურნალისტური ეთიკის ქარტიის სამდივნომ დასაშვებად სცნო ხელვაჩაურის მუნიციპალიტეტის გამგებლის მოადგილის, მინდია ბასილაძის განცხადება საზოგადოებრივი მაუწყებლის აჭარის ტელევიზიის ჟურნალისტის, ფირუზ ბოლქვაძის წინააღმდეგ. სადავო გახდა 5 აგვისტოს 21:00 საათზე აჭარის ტელევიზიით გადაცემა „მთავარი აჭარაში“ გასული სიუჟეტი, რომელიც სახემწიფო აუდიტის სამსახურის ანგარიშს ეხებოდა. მასალაში აღნიშნული იყო, რომ აუდიტის ანგარიშში მოცემულ ერთერთ შესყიდვაში მონაწილე ფირმის დამფუძნებლები და გამგებლის მოადგილე მოგვარეები (ბასილაძეები) არიან და რომ მათ შორის არსებობს თუ არა ნათესაური კავშირი გარკვეული მიზეზების გამო ვერ დადგინდა.

განმცხადებელი მიიჩნევს, რომ გადაუმოწმებელი და დაუზუსტებელი ინფორმაცია გავრცლდა. "ამით ჟურნალისტმა მიუთითა აღნიშნულ გარიგებაში ჩემი, როგორც გამგებლის მოადგილის მონაწილეობა, რაც პირდაპირ ზიანის მომტანია და ეჭვქვეშ აყენებს ჩემს როგორც პიროვნულ და საქმიან რეპუტაციას", - ნათქვამია ქარტიისთვის გამოგზავნილ განცხადებაში. მინდია ბასილაძე მიიჩნევს, რომ დარღვეულია ქარტიის პირველი 9სიზუსტე), მესამე (დადასტურებული წყარო) და მეხუთე (შესწორება) პრინციპები.

ქარტიის საბჭო განცხადებას ღია სხდომაზე განიხილავს.