საქართველოს ჟურნალისტური ეთიკის ქარტიის სამდივნომ დასაშვებად ცნო ქალთა ინიციატივების მხარდამჭერის ჯგუფის (WISG) განცხადება კომედი არხის წინააღმდეგ.

სადავო ჟურნალისტური პროდუქტი ტელეკომპანიის ეთერში, გადაცემაში “სიცილის ზონა” , 2020 წლის 12 ნოემბერს გავიდა.

განმცხადებლის განმარტებით, გადაცემაში გავიდა ე.წ.“სკეჩი”, რომლის თემა იყო გაუპატიურება. მხარე მიიჩნევს, რომ თემა ისეთი ფორმით არის წარმოჩენილი, რომ ახდენს გაუპატიურების და მსგავსი ძალადობრივი ქმედების ნორმალიზებას. ასევე ხელს უწყობს ძალადობის მსხვერპლი ადამ იანების რეტრავმირებას და მათ დისკრიმინაციას.

განმცხადებელი დავობს დისკრიმინაციის (მეშვიდე) პრინციპის დარღვევაზე.

ქარტიის საბჭო განცხადებას ღია სხდომაზე განიხილავს და გადაწყვეტს დაირღვა თუ არა ქარტიის პრინციპები.

საქართველოს ჟურნალისტური ეთიკის ქარტიის სამდივნომ დასაშვებად ცნო მარიამ არველაძის განცხადება ტელეკომპანია ობიექტივის ჟურნალისტის - ქეთი შერგელაშვილის წინააღმდეგ.

სადავო ჟურნალისტური პროდუქტი “ლელოს“ არარეალური შემომწირველები” ტელეკომპანიის ეთერში, გადაცემაში “ნამდვილი ამბები” , 2020 წლის 14 ოქტომბერს გავიდა.

განმცხადებლის განმარტებით, სიუჟეტში გადმოცემული ინფორმაცია პოლიტიკური პარტია “ლელოსადმი” შემოწირულობების შესახებ არასწორია და როგორც მხარე განმარტავს, ჟურნალისტმა განზრახ გაავრცელა ფაქტები არასწორი ინტერპრეტაციით.

განმცხადებელი დავობს ქარტიის პირველი (ინფორმაციის სიზუსტე) და მეთერთმეტე (ფაქტის განზრახ დამახინჯება) პრინციპების დარღვევაზე.

ქარტიის საბჭო განცხადებას ღია სხდომაზე განიხილავს და გადაწყვეტს დაირღვა თუ არა ქარტიის პრინციპები.

საქართველოს ჟურნალისტური ეთიკის ქარტიის საბჭო 28 ნოემბერს 6 საქმეს ონლაინ განიხილავს:

1.12:00 საათზე - გიორგი ნიორაძე commersant.ge-ს წინააღმდეგ

განცხადების თანახმად, ჟურნალისტურ პროდუქტში წარმოთქმული ბრალდებები კომპანიის არაკომპეტენტურობაზე, ხარჯების განკარგავასა თუ საქმიანობაზე უსაფუძვლოა და არანაირ მტკიცებულებებს არ ემყარება. მხარე თვლის, რომ დარღვეულია, ქარტიის პირველი (ინფორმაციის სიზუსტე) და მეთერთმეტე (ფაქტის განზრახ დამახინჯება) პრინციპები.

2.13:00 საათზე - ცენტრალური საარჩევნო კომისია - ეკო მაღრაძის და ნინო ელიკაშვილის წინააღმდეგ

განმცხადებლის განმარტებით, სიუჟეტში მოყვანილი ინფორმაცია იმის შესახებ, რომ ცესკო შეძენილი მანქანების ოდენობითა და დახარჯული საწვავის ლიმიტის გადაჭარბებაში ლიდერია, IDFI-ის კვლევაში არ არის მოხსენიებული და ამის თაობაზე გავრცელებული ინფორმაცია არასწორია. მხარე თვლის, რომ დარღვეულია, ქარტიის პირველი (ინფორმაციის სიზუსტე) და მესამე (წყაროს დადასტურება) პრინციპები.

3.14:00 საათზე - ცენტრალური საარჩევნო კომისია - მიხეილ სესიაშვილის და თათია წოწონავას წინააღმდეგ

განმცხადებლის განმარტებით, ეთერში გასული მასალა შეიცავს ბრალდებებს ცენტრალური საარჩევნო კომისიის წევრების მიკერძოებულობაზე, მისივე განმარტებით, ერთ-ერთი კომისიის წევრი შეცდომით ჰყავთ დასახელებული, სიუჟეტში ნაჩვენები ფოტო კი მანიპულაციურია და არასწორ წარმოდგენას ქმნის მაყურებელში. განმცხადებელი თვლის, რომ დარღვეულია ინფორმაციის სიზუსტისა (პირველი) და წყაროს დადასტურების (მესამე) პრინციპები.

4.15:00 საათზე - ააიპ სოციალურ მუშაკთა გაერთიანება TV პირველის წინააღმდეგ

განმცხადებლის განმარტებით, სიუჟეტში საქმესთან დაკავშირებით გაჟღერებული არაერთი დეტალი სიმართლეს არ შეესაბამება. სიუჟეტში არასწორად იყო გამოყენებული ტერმინი, სოციალური აგენტი, სოციალური მუშაკის ნაცვლად, ნეგატიურად იყო წარმოჩენილი მისი როლი, რაც ახდენდა ამ პროფესიის ადამიანებისადმი ნდობის დაკარგვას და დისკრედიტაციას. მხარე მიიჩნევს, რომ დარღვეულია ქარტიის პირველი(ინფორმაციის სიზუსტე), მეშვიდე (დისკრიმინაცია) და მეათე (პირადი ცხოვრების ხელშეუხებლობა) პრინციპები.

5.16:00 საათზე - ააიპ სოციალურ მუშაკთა გაერთიანება გიორგი გაბუნიას და ლაშა ნაკაიძის წინააღმდეგ

განმცხადებლის განმარტებით, სიუჟეტში გაჟღერებული ინფორმაცია თითქოს სოციალური მუშაკები უშვილო ოჯახებთან არიან გარიგებული და არსებობს ე.წ. ბავშვების გაყიდვის სქემა სიმართლეს არ შეესაბამება. სოციალური მუშაკის როლის ისე წარმოჩენით კი, თითქოს “ბავშვების ჩამორთმევაა” მათი მოვალეობა, ხდება ამ სფეროში დასაქმებული ადამიანების დისკრედიტაცია. Მხარე მიიჩნევს, რომ დარღვეულია ქარტიის პირველი(ინფორმაციის სიზუსტე), მეშვიდე (დისკრიმინაცია) და მეთერთმეტე (ფაქტის განზრახ დამახინჯება) პრინციპები.

6.17:00 საათზე - არასამთავრობო ორგანიზაცია “ფემინა” გიორგი ახალკაცის წინააღმდეგ

განმცხადებლის განმარტებით, სიუჟეტში მოყვანილი ინფორმაცია მომხდარის შესახებ არ ეყრდნობა ოფიციალურ წყაროებს და გაჟღერებულია გარე პირების კომენტარები, რომელთაც არ შეუძლიათ ინფორმაციის უტყუარობის დადასტურება. განმცხადებელი თვლის, რომ სიუჟეტის შინაარსი ისეა წარმოდგენილი, რომ ქალი პირდაპირ დადანაშაულებულია შვილის მკვლელობაში და არ ითვალისწინებენ მის მძიმე ფსიქოლოგიურ ფონს. სიტუაციის მსგავსი ფორმით გადმოცემა, ქალს კიდე უფრო მოწყვლადს ხდის. მხარე მიიჩნევს, რომ დარღვეულია ქარტიის პირველი(ინფორმაციის სიზუსტე), მეხუთე( შესწორება), მეშვიდე (დისკრიმინაცია) და მეათე (პირადი ცხოვრების ხელშეუხებლობა) პრინციპები.

სხდომა გაიმართება ონლაინ, პროგრამა zoom-ის მეშვეობით.

საქართველოს ჟურნალისტური ეთიკის ქარტიის საბჭოს გადაწყვეტილებით, პირველი არხის ჟურნალისტმა ბელა ზაქაიძემ ქარტიის პირველი (არაზუსტი ინფორმაცია) პრინციპი დაარღვია.

მის წინააღმდეგ ქარტიას შპს "სფერო ჰოლდინგმა" მომართა. სადავო ჟურნალისტური პროდუქტი “მოტყუებული მომხმარებლები”, ტელეკომპანიის ეთერში 2020 წლის 6 სექტემბერს გავიდა.

განმცხადებელი განმარტავდა რომ სიუჟეტში გაჟღერებული ინფორმაცია შეიცავდა არასწორ ინფორმაციას და მასში არ იყო ასახული ადრესატის, შპს “სფერო ჰოლდინგის”, პოზიცია.

მხარე ასევე დავობდა ქარტიის მეხუთე (შესწორება) და მეთერთმეტე (ფაქტის განზრახ დამახინჯება) პრინციპების დარღვევაზე, მაგრამ საბჭოს ამ ნაწილებზე დარღვევა არ დაუდგენია.

გადაწყვეტილების სამოტივაციო ნაწილი მოგვიანებით გამოქვეყნდება.

საქართველოს ჟურნალისტური ეთიკის ქარტიის საბჭოს გადაწყვეტილებით, TV პირველის ჟურნალისტმა პაპუნა შუშანიამ ქარტიის პირველი (არაზუსტი ინფორმაცია) და მეათე (პირადი ცხოვრების ხელშეუხებლობა) პრინციპები დაარღვია.

მის წინააღმდეგ ქარტიას მანუჩარ კუკავამ მომართა. სადავო ჟურნალისტური პროდუქტი ტელეკომპანიის ეთერში 2020 წლის 31 ივლისს გავიდა.

განმცხადებელი განმარტავდა რომ სიუჟეტში აჩვენეს სოციალური ქსელიდან ამოღებული მისი, როგორც იმ პირის ფოტო, რომელიც დააკავეს მძიმე დანაშაულის ბრალდებით, რაც სიმართლეს არ შეესაბამებოდა და ეს მოგვიანებით ტელევიზიამაც აღიარა.

მხარე ასევე დავობდა ქარტიის მეოთხე (ინფორმაციის კეთილსინდისიერად მოპოვება), მეხუთე (არაზუსტი ინფორმაციის შესწორება) და მეექვსე (კონფიდენციალური წყაროს გამჟღავნება) პრინციპების დარღვევაზე, მაგრამ საბჭოს ამ პრინციპებზე დარღვევა არ დაუდგენია.
ქარტიის მე-5 პრინციპთან დაკავშირებით საბჭოს ერთმა წევრმა გამოთქვა განსხვავებული აზრი, რომელიც სამოტივაციო ნაწილთან ერთად მოგვიანებით გამოქვეყნდება.

საქართველოს ჟურნალისტური ეთიკის ქარტია იწყებს განაცხადების მიღებას „ქარტიის პრიზი 2020-ის" მოსაპოვებლად. ყოველწლიური კონკურსის მიზანია პროფესიული სტანდარტების დამკვიდრების და ეთიკური ჟურნალისტიკის განვითარების ხელის შეწყობა.


კონკურსი ცხადდება შემდეგ რვა ნომინაციაში:

• ვიდეორეპორტაჟი
• მულტიმედია პროექტი (1 მასალა ან სერია)
• სტატია ან ნარკვევი ბეჭდურ ან ონლაინ მედიაში
• ჟურნალისტური გამოძიება
• ვიდეორეპორტაჟი COVID-19-ზე
• მულტიმედია პროექტი COVID-19-ზე (1 მასალა ან სერია)
• სტატია ან ნარკვევი ბეჭდურ ან ონლაინ მედიაში COVID-19-ზე
• ჟურნალისტური გამოძიება COVID-19-ზე

პირველ ოთხ კატეგორიაში პრიზი გაიცემა აშშ-ს საელჩოს დემოკრატიის კომისიის მცირე გრანტების პროგრამის მხარდაჭერით, ხოლო COVID-19-ის საკითხებზე პრიზი დაწესებულია IREX-ის M-TAG პროგრამის მიერ.

გამარჯვებულებს შეარჩევს დამოუკიდებელი ჟიური.

პროცედურები და შერჩევის კრიტერიუმები:

• მონაწილეობის მსურველებმა უნდა წარადგინონ ჟურნალისტური პროდუქტი, რომელიც გამოქვეყნდა 2019 წლის 1 ნოემბრიდან 2020 წლის 25 ნოემბრამდე პერიოდში.
• საკონკურსოდ მასალის წარდგენა შეუძლია როგორც ჟურნალისტს ინდივიდუალურად, ისე მედიასაშუალებას.
• მონაწილეობის მსურველმა უნდა წარადგინოს გამოქვეყნებული მასალის ბმული. იმ შემთხვევაში თუ საკონკურსო ნამუშევარი ინტერნეტ სივრცეში არ მოიძებნება, კონკურსანტს შეუძლია გამოგზავნოს ვიდეო რეპორტაჟის და მულტიმედიის შემთხვევაში ჩანაწერი, სტატიის შემთხვევაში კი მისი სკანირებული ან სქრინ ვერსია.
• მონაწილეობის მსურველმა უნდა შეავსოს აპლიკაცია
• დამატებითი მასალები (არსებობის შემთხვევაში) გამოგზავნეთ შემდეგ ელექტრონულ მისამართზე: ethicscharter@gmail.com
• თითოეულ აპლიკანტს შეუძლია ერთი საკონკურსო ნაშრომის წარდგენა ერთ ნომინაციაში.
• საკონკურსო ნაშრომი გამოქვეყნებული უნდა იყოს საქართველოში მოქმედ რომელიმე მედიასაშუალებაში.
• საკონკურსო ნამუშევრების მიღების ბოლო ვადაა 2020 წლის 30 ნოემბერი, 18.00 საათი.

გამარჯვებული გამოვლინდება 2020 წლის დეკემბერში საქართველოს ჟურნალისტური ეთიკის ქარტიის საერთო კრებაზე.

ნამუშევრების შეფასების ზოგადი კრიტერიუმები:

• თემის აქტუალობა/მაღალი საზოგადოებრივი ინტერესი
• თხრობის სტილი და ტექნიკა
• ინფორმაციის გადმოცემის ხერხების მრავალფეროვნება
• სიუჟეტების და მულტიმედია პროექტის შემთხვევაში ასევე დრამატურგია და ვიზუალური მხარე
• ინფორმაციის წყაროთა მრავალფეროვნება
• ინფორმაციის სიზუსტე
• ფაქტებისა და მოსაზრებების გამიჯვნა, მიუკერძოებლობა
• მხარეთა ბალანსი
• სიძულვილის ენისა და შეუფერებელი ლექსიკის უარყოფა/ გამოუყენებლობა

ჟურნალისტური პროდუქტის შერჩევის მთავარი კრიტერიუმია პროფესიული და ეთიკური სტანდარტები, რასაც ეფუძნება საქართველოს ჟურნალისტური ეთიკის ქარტია.

საქართველოს ჟურნალისტური ეთიკის ქარტიის სამდივნომ დასაშვებად ცნო შპს ,,ბევრილი ჯგუფის“ განცხადება TV პირველის წამყვანის ნოდარ მელაძისა და ჟურნალისტის მაკა ჩიხლაძის წინააღმდეგ.

სადავო ჟურნალისტური პროდუქტი ტელეკომპანიის ეთერში, საავტორო გადაცემაში “ნოდარ მელაძის შაბათი” 2020 წლის 24 ოქტომბერს გავიდა.

განმცხადებლის განმარტებით, ეთერში გასული მასალა შეიცავს უსაფუძვლო ბრალდებებს ,,ბევრილი ჯგუფის“ მიმართ და გაჟღერებული ინფორმაცია სიმართლეს არ შეესაბამება.

განმცხადებელი დავობს ქარტიის ინფორმაციის სიზუსტის (პირველი), შესწორების (მეხუთე) და ფაქტის განზრახ დამახინჯების (მეთერთმეტე) პრინციპების დარღვევაზე.

ქარტიის საბჭო განცხადებას ღია სხდომაზე განიხილავს და გადაწყვეტს დაირღვა თუ არა ქარტიის პრინციპები.

საქართველოს ჟურნალისტური ეთიკის ქარტიის საბჭოს გადაწყვეტილებით, Alia.ge-ზე გამოქვეყნებულ მასალაში ქარტიის პირველი (არაზუსტი ინფორმაცია) და მეშვიდე (დისკრიმინაცია) პრინციპები დაირღვა.

მედიასაშუალების წინააღმდეგ ქარტიას არასამთავრობო ორგანიზაცია “ფემინამ” მომართა. სადავო ჟურნალისტური პროდუქტი - “სანამ დედა საყვარელთან ერთად სასტუმროში იყო, 3 წლის ბავშვი მანქანაში გაიგუდა?” – საზარელი ტრაგედია რუსთავში” ვებგვერდზე 2020 წლის 20 ივლისს გამოქვეყნდა.

განმცხადებელი განმარტავდა რომ სტატიაში მოყვანილი ინფორმაცია, არასრულწლოვანის ტრაგიკულად დაღუპვასთან დაკავშირებით სიმართლეს არ შეესაბამებოდა. გარდა ამისა, მხარე აღნიშნავდა, რომ სტატიაში დედის პირადი ცხოვრების დეტალებზე ხაზგასმით იკვეთებოდა პათოსი ტრაგედიაში ქალის დანაშაულის შესახებ და იგრძნობოდა მის მიმართ შეურაცხმყოფელი და დისკრიმინაციული დამოკიდებულება.

გადაწყვეტილების სამოტივაციო ნაწილი მოგვიანებით გამოქვეყნდება.

საქართველოს ჟურნალისტური ეთიკის ქარტიის სამდივნომ დასაშვებად ცნო “ქალთა ინიციატივების მხარდამჭერის ჯგუფის” განცხადება რუსთავი2-ს, გადაცემა “პროფილის” წამყვანის მაია ასათიანის წინააღმდეგ.

სადავო გადაცემა ეთერში 2020 წლის 22 ოქტომბერს გავიდა.

განმცხადებლის განმარტებით, გასულ გადაცემაში გადაცემის წამყვანმა ხელი შეუწყო ტრანსგენდერი ადამიანების მიმართ დისკრიმინაციის წახალისებას და მათდამი არსებული სტიგმის გაძლიერებას.

განმცხადებელი დავობს დისკრიმინაციის წახალისების (მეშვიდე) პრინციპის დარღვევაზე.

ქარტიის საბჭო განცხადებას ღია სხდომაზე განიხილავს და გადაწყვეტს დაირღვა თუ არა ქარტიის პრინციპი.

საქართველოს ჟურნალისტური ეთიკის ქარტიის სამდივნომ დასაშვებად ცნო სამოქალაქო პლატფორმა 20/20 განცხადება ტელეკომპანია “იმედის” ჟურნალისტის ხატია ქვათაძის წინააღმდეგ.

სადავო ჟურნალისტური სიუჟეტი “თავდასხმა საქართველოს ბანკის ფილიალზე” ტელეკომპანიის ეთერში, საინფორმაციო გამოშვებაში “ქრონიკა” 2020 წლის 21 ოქტომბერს გავიდა.

განმცხადებლის განმარტებით, სიუჟეტში გაჟღერებული ინფორმაცია, რომ ირაკლი კვარაცხელიას მჭიდრო კავშირი აქვს ნაციონალურ მოძრაობასთან მისდამი აღრმავებს ნეგატიურ განწყობებს, ახალისებს დისკრიმინაციის მის მიმართ და ქმნის მისი სიცოცხლის მოსპობის საფრთხეს.

განმცხადებელი დავობს დისკრიმინაციის წახალისების (მეშვიდე) პრინციპის დარღვევაზე.

ქარტიის საბჭო განცხადებას ღია სხდომაზე განიხილავს და გადაწყვეტს დაირღვა თუ არა ქარტიის პრინციპი.